Džinsoin roindupäivy
| Džinsoin roindupäivy | |
|---|---|
 Džinsat | |
| Päivymiäry | 20. oraskuudu |
Džinsoin roindupäivy on pruazniekku, kudamua omistetah džinsoin tuotandon alguh panemizele. Pruazniekkua pietäh 20. oraskuudu. Sinäpiän vuvvennu 1873 Levi Strauss da Džeikob Devis suadih patentan "ruadokombinezonoin ilmai hiihnoi kormaniloinke veiččeh, dengoih da čuassuloih niškoi" tuotandoh[1][2].
Histourii
"Kuldukiihistyksen" kuulužuos biznesmies Levi Strauss rubei ombelemah štaniloi parusiinas da myömäh niilöi kullanpezijöile. Štaniloin mujuttamizes lujannu mujunnu käytettih indiguo Genujaspäi. Parusiinua tuodih Francien Nim-linnaspäi (de Nimes). Siepäi on tuldu sovan nygyaigazet nimet anglien kieles: denim da jeans.
Enzimäzet džinsat maksettih 1 dollaru 46 centua. Net oldih štanit monien kormaniloin da ombeluksienke, kudamii lujoitettih kahteh kerdah. Enzimäine tuotandopartii kerras myödih da terväh Levi Strauss perusti San-Franciskos firman "Levi Strauss & Co".
Sit rodih viijes kormanigi, kudamua Levi’s-katalougas merkittih kui "watch pocket" (kormani čuassuloih niškoi).
Vuvvennu 1886 sobah enzikerdua luajittih nahkumerki kahten hevonke, kudamat vietäh štaniloi eri čurih. Legendan mugah mostu koitteluu toven oli pietty da puaru ei revinnyh.
Vuvvennu 1926 roittih džinsat vedolukkuzenke iespäi[3].
XX vuozisuan puolivälis džinsat roittih buntariloin simvolankse, net oldih niilöin atribuutannu, ken liitti iččie vastukul’tuurah.
Vuvvennu 1990 Time-žurnualu sanoi 501. modelin "XX vuozisuan movvakkahimakse sovakse".
Džinsat ollah movvas tänäpäigi. Eri malliloin hyvyös net ollah kaikile pättävänny sovannu[1].
Tapahtumat
Pruazniekkupiän äijät džinsoin tuottajat ezitetäh omii uuzii kollekcieloi. Joga vuottu tapahtumas äijän kirjutetah joukkoviestimis.
Toziaziet
Džinsoin luadii Levi Strauss nikonzu niidy ei pidänyh, häi suvaičči klassiillizii kost’umoi. Biznesmiehen eläjes nämmä sovat oldih enne kaikkie ruadosovinnu[4].
Konzu ozuttelii Džeims Din pani piäle džinsat, net roittih buntariloin sobien ozakse.
Kallehimat džinsat maksettih 60 tuhattu dollarua. Se oli originualumalli 501 "Levi Strauss & Co", sen osti keräilii Japouniespäi.
Ollah sidä mieldy, ku Jevroupas džinsat roittih kuulužikse amierikkalazien sodamiehien hyvyös, niilöi hyö piettih joudoaijal da myödih paikallizile eläjile[5].
Huomavukset
- ↑ 1 2 Джинсы отмечают юбилей и остаются на пике моды, РИА Новости (20 oraskuudu 2013). Kačondan päivymiäry: 9. sulakuudu 2025.
- ↑ Народный дресс-код, Коммерсантъ (20 oraskuudu 2023). Kačondan päivymiäry: 9. sulakuudu 2025.
- ↑ 20 мая: какой праздник сегодня отмечают в России и мире, Lenta.ru (20 oraskuudu 2024). Kačondan päivymiäry: 9. sulakuudu 2025.
- ↑ Natalya Pyhova. Как деним покорил мир: 15 фактов о джинсах. BurdaStyle.ru (12. ligakuudu 2018). Kačondan päivymiäry: 9. sulakuudu 2025.
- ↑ День рождения джинсов, КТО?ЧТО?ГДЕ? (31 pakkaskuudu 2017). Kačondan päivymiäry: 9. sulakuudu 2025.