Francielaine galdari
Francielaine galdari (fran. balconnet, angl. Juliet balconies[1][2]) on galdariloin eräs laji, kudaman ominažuonnu on kentyalustan kogonaine olemattomus libo sen olendu, ga rajoitetun alanke (vähembi 50 santimetrua). Käytetäh sežo nimie portfnetru (fran. porte-fenêtre)[3][4].
Histourii
On olemas mondu versiedy tämän rakendehen alguperäs. Enzimäzen mugah se rodih Jevroupas Keskiaigoih nygyaigazen tualietan vaihtokse[5]. Toizen versien mugah francielazet galdarit oli luajittu käytöndöllizis syylöis: sendäh ku kaijat uuličat ei annettu nostua kodiloi levielöin ulgorakendehienke, piätettih luadie kompaktnoloi variantoi, kudamis sai istuttua kukkazii[6].
Samah aigah on olemas mieli, ku nygyaigazet francielazet galdarit enzikerdua roittih Ispuanies libo Itualies. Suuren ikkunan hyvyös pertilöis oli äijiä valgiembi, helpombigi oli tuulettua pertilöi[5][7].
On olemas mieli, ku vie yksi levennyzis nimis — Juliet balcony — on roinnuh arhitektuururakendehel jälles Viljam Šekspiiran Romeo da Džuljetta -ozutelmua. Sit se on paikannu, kus piähengi pagizou oman mielespiettävänke[8].
Lajit da niilöin eričykset
Francielazii galdariloi voi olla kahtu luaduu:
- kentyalustattah;
- pienen kentyalustanke.
Toine laji voi erota ezin puoles. Se voi olla puolekse pyöryžy da kohtikulmikon muodoine. Enzimästy variantua pietäh perindöllizenny, toine puaksumbah on nygyaigazis talolois[9].
On GOSTu, kudai miäriäy francielazien galdariloin luajindueričyksii. Sit on oma ohjavo sit, ku suojeluaidaine pidäy azettua nenga, ku ristikanzu ei pakkus siepäi[10].
Francielaizien galdariloin aidazet erotah käytettylöin materjualoin mugah. Ezimerkikse, sit voi olla tavottu ristakko. Sih niškoi sežo käytetäh proufilitrupkii: raudahizii, teräsraudahizii da al'umiinizii. Toiči aidazien luajindas käytetäh betonua — sit luajitah kolonnoi da toizii tämänmoizii čomenduksen ozii. Voijah käyttiä st'okluagi, ga sit sil pidäy olla iškunkestäjänny.
On olemas sežo tavallizen da francielazen galdarin yhtisteh. Se on standartusuuruhizele galdarile ikkunoin panendu kaiken korgevuon myödäh. Ga moizen arhitektuururakendehen azetandu francielazen galdarin lajiloin joukkoh ei ole kogonah hyvä: sih niškoi on oma terminy — "francielazet ikkunat"[9].
Hyvät da pahat puolet
Ebäilemättäh francielazen galdarin hyvih puolih kuulutah:
- sähkön siästämine sendäh, ku sen ikkunoin hyvyös päivänvalgei piäzöy pertih äijiä parembi;
- suuri pinduala tuuletandah nähte, kudamas hyödyy on äijiä enämbi;
- pienen fatieran vizualine levendämine;
- käyttämine dekoratiivizennu ozannu[8].
Pahois puolis on pandavat merkile moizet:
- perti, kudamaspäi piäzet galdarile, voi kezän aigua olla ylen räkki;
- erähät materjualat voijah olla ylen kallehet;
- ei kaikis talolois ole mahto azettua moizii rakendehii[6];
- erähis tapahtuksis pidäy suaja luba luajindah[11];
- st'oklien puhtahinnu piendy voi tarvita ližäponnistuksii[6].
Gallerei
Francielaine galdari modernan stiilin mugah
Francielaine galdari Pariižas
Francielaine galdari Venas (Avstrii)
Francielaine galdari Vuppertalis (Germuanii)
.jpg)
.JPG)
Huomavukset
- ↑ Juliet balconies (англ.). Balconette. Kačondan päivymiäry: 30. ligakuudu 2023. Arhiviiruittu 24. kevätkuudu 2012
- ↑ Balconet (англ.). Encyclopedia.com. Kačondan päivymiäry: 30. ligakuudu 2023.
- ↑ Порт-фнетр. Словарь галлицизмов русского языка. sanstv.ru. Kačondan päivymiäry: 30. ligakuudu 2023.
- ↑ Елена Слободян. Можно ли выходить на французский балкон? Аргументы и факты (7. kylmykuudu 2022). Kačondan päivymiäry: 30. ligakuudu 2023.
- ↑ 5,0 5,1 Зачем нужен маленький «французский балкон», если на него даже выйти нельзя. Novate.Ru (28. ligakuudu 2022). Kačondan päivymiäry: 30. ligakuudu 2023.
- ↑ 6,0 6,1 6,2 Плюсы и минусы французского балкона. planken.guru. Kačondan päivymiäry: 30. ligakuudu 2023.
- ↑ Языева С. Б., Жирухина Т. В., с. 149.
- ↑ 8,0 8,1 Bob Vil. What is a Juliet Balcony? A complete guide (англ.). Clever Patio (7. syvyskuudu 2023). Kačondan päivymiäry: 30. ligakuudu 2023.
- ↑ 9,0 9,1 Все о французском балконе. Системы ВЕКА. Kačondan päivymiäry: 30. ligakuudu 2023.
- ↑ ГОСТ Р 56926-2016.
- ↑ Все о французском балконе. вПлатье.ру. Kačondan päivymiäry: 30. ligakuudu 2023.
Kirjalližus
- ГОСТ Р 56926-2016 "Конструкции оконные и балконные различного функционального назначения для жилых зданий. Общие технические условия". — М.: Стандартинформ, 2016.
- Языева С. Б., Жирухина Т. В. Конструктивные элементы фасадов, трансформировавшиеся из функциональных в декоративные // Молодой исследователь Дона. — 2018. — № 5 (14). — С. 144—150.