Kanzoinväline koirien päivy
| Kanzoinväline koirien päivy | |
|---|---|
| Tiijosto:2 июля.jpg | |
| Tiippu | Ei-virralline |
| Pietäh | joga vuottu |
| Päivymiäry | 2. heinykuudu |
Kanzoinväline koirien päivy on pruazniekku, kudamua joga vuottu pietäh kogo muailman koiranomistajat da koiriensuvaiččijat 2. heinykuudu [1].
Kaččomattah sih, ku pruazniekku ei suannuh virrallistu stuatussua, sinäpiän on tavannu ämmättiä omii kodielättilöi: koiranomistajat ostetah heile magieloi syömizii, bobazii da amunicieloi, volont'uorat suatetah koirien suojupaikkoih syömizii da rohtuloi.
Histourii da piendytavat
Vuvvennu 2012 Kanzoinväline sociualualguhpanoloin fondu työndi Yhtistynnyzih Kanzukundih pakičuksen luadie 2. heinykuudu pruazniekan. Idei ei suannuh kannatustu virrallizel tazol, ga sen kehoituksen oli otettu vastah äijät koiranomistajat muailman eri mualois[2].
Sinäpiän koiranohjuajien yhtistykset kogo muailmas pietäh koirien ozutteluloi. Luajitah hyvyönluadijoi akcieloi, kudamis kerätäh koirien magiezii, syömizii, varua koirien suojuspaikkoin kunnostamizikse. Volont'uorat kävväh suojuspaikkoih, kus kävelläh koirienke pihal da kižatah heijänke.
Kanzoinvälizenny koirien päivänny pietäh luvendoloi, kudamis sanellah, ku ei pie olla viluverellizenny elättilöin kohtah da kehitetäh avvuttamah koirile.
Joukkoviestimis ozutetah filmoi koiris, sanellah heijän roulis koiranohjuajien palvelulois da juohatellah tundiettuloi elättilöi.
Mieldykiinittäjät toziaziet
A-Z-Animals-kompuanien tiedoloin mugah, kudai viittuau Muailman tervehyönhoidoyhtistykseh, vuvvennu 2022 muailmas oli läs 900 miljonua koirua. Niilöis ižändöittäh oli 75—85 % muailman nämmis elättilöis. Kaikkiedah muailmas oli 200 miljonua koittomua koirua, kudamat villikoirih verratunnu, oldih kodi-elättilöinny, ga muututtih sit pihakoirikse[3].
Vuvvennu 2023 Elättilöin syöndän da hyvinvoindan tutkimuskeskus da tutkimuslaitos Ipsos piettih tutkimuksen, kudaman mugah Ven'a rodih nelländel sijal muailmas kodikoirien luvus. Niilöin lugu oli 25,5 miljonua[4].
Erähis mualois pietäh omua Koiran päiviä. Amierikan Yhtysvallois, Kanuadas da niilöin lähäl olijois mualois Koiran kiitändypäiviä pietäh 26. elokuudu. Se päivy rodih vuvvennu 2004 Amierikan Yhtysvallois kui Kanzalline koiran päivy kodielättilöin eloksentavan azientiedäjän Kolin Peidžan alguhpanos. Piendypäivy ei olluh petties vallittu - juuri sinäpiän tuatto lahjoitti hänele enzimäzen koiran. Hil'l'akkazin pruazniekkua ruvettih pidämäh muan ulgopuolelgi[5].
Nepalas pruazniekku on kiini uskondotapahtumis da sidä pietäh viizi päiviä kestäjän "tulifestivualin" Tihar toizennu päivänny. Koirat ollah Nepalas pyhäelättilöinny, kudamat ollah yhtevyksis kuolendan jumalanke Jama. Sinäpiän koirii čomendetah kukkugirl'andoil da poččivoijah magevuksil[6].
Japounies Kaikkien koirien päivy on kiini Hatikon mustopäiväh da sidä pietäh 11. pakkaskuudu. Akita-inu roduhine koiru, kudai on Japounies uskolližuon simvolannu, yheksä vuottu joga päiviä tuli Sibuja-stansiele da vuotti kuolluon ižändän tulendua. Sen uskolližus muga vaikutti japounielazih, hyö azetettih sit sille mustopaččahan[2][7].
Kačo ližäkse
- Koiranohjuajan päivy
Huomavukset
- ↑ 2 июля – международный день собак
- ↑ 2,0 2,1 2 июля - Международный день собак
- ↑ How Many Dogs Are In The World?
- ↑ Численность домашних питомцев в России за три года выросла на 11% — опрос
- ↑ Национальный день собаки в США
- ↑ Все лучшее - собакам: праздник в Непале, восхваляющий четвероногих друзей человека
- ↑ В Японии отмечают сто лет со дня рождения пса Хатико
|
Tämän kirjutuksen luadijanoigevukset kuulutah ANO "RUWIKI-verkotiedosanakniigale". Käyttiä tädä materjualua toizil verkosivustoloil voibi vaiku ANO "RUWIKI-verkotiedosanakniigan" luvan suaduu. |