Kogo Ven'an kävelypäivy
| Kogo Ven'an kävelypäivy | |
|---|---|
 | |
| Tiippu | Sportupäivy |
| Pietäh |
 Ven'anmua |
| Päivymiäry | syvyskuu-ligakuu |
Kogo Ven'an kävelypäivy (ven. Всеросси́йский день ходьбы́) on sportupruazniekku, kudamua syvyskuun — ligakuun aloh pietäh Ven'an eri linnois. Tädä päiviä vuvves 2015 lähtijen järjestäy Ven'an olimpiuadukomitiettu.
Histourii
Enzimästy kerdua kävelyn päiviä piettih 9. ligakuudu vuvvennu 2014 kanzoinvälizen Ven'a on sportuvaldivo -fouruman avuajazien aigua Čeboksari-linnas. Lähtöpaikale tuli 15 tuhattu linnalastu, avuamas piduo oldih Ven’an Federacien sportuministru Vitalii Mutko da Kanzoinvälizen sportu kaikile -liiton (TAFISA) piämies Džu Ho Čang[1].
Enzimäizen Kogo Ven'an kävelypäivän pidi 3. ligakuudu vuvvennu 2015 Ven'an olimpiuadukomitiettu joukkosportan Olimpiuadumua-kehitysprogramman hantuzis, kudaman tarkoituksennu on kävelyn propagandiiruičendu kaikile pädijänny fiiziellizen toimindan muvvonnu tervehyön da hyvän kunnon pidämizekse. Piätapahtumat järjestettih 11 ozanottailinnas, kuduat ezitettih muan 11 aigualovehtu. Ven'an Federacien piämies Vladimir Putin pidi tervehtyspaginan järjestäjile da ozanottajile. Jällel ilmoitettih, gu sportupruazniekkah tulluot yhtes käveltih läs miljardua askeldu[2].
Myöhembäh Kogo Ven'an kävelypäiviä ruvettih pidämäh joga vuottu ligakuun enzimäzinny lebopäivinny.
Järjeständy
Tapahtuman järjestetäh Ven’an Federacien erillizil alovehil alovehellizien olimpiuadunevvostoloin perustetut komitietat. Järjeständytoimikundah kuulutah fiskul’tuuran da sportan, kazvatandan da opastundan toimehpaniivirrastoloin edustajat, alovehellizien sportuliittoloin ozanottajat eri sportulajilois, kanzalazien da laitoksien omatahtozen fiskul’tuuruyhtistyksen ozanottajat liikundukul’tuuran popul’arizacien da joukkosportan kehittämizen alal, Ven'a-ammattiliiton fiskul’tuuru- da sportuyhtistyksen kuulužat ruadajat[3].
Päivän programmu
Kogo Ven'an kävelypäivän programmu voibi vaihtuo eri linnois sen mugah, midä niilöin järjestäjät kačotah parembannu. Perindön mugah pruazniekan piäozannu on kävelendy joukolleh libo moizien kävelendöin sarjat ielpäi verustettuu maršruuttua myö tazazel libo vähälebätazazel alovehel, kudaman piduhus on kolmes viidessäh kilometrii. Päivän tapahtumuprogrammah voijah panna sportukävelyn kilbailut, kudamih otetah ozua ammattisportumiehet, ga yhtelläh Ven’an olimpiuadukomitiettu pidäy omua projektua enne kaikkie kevelendäs kiinostunnizien pivonnu ilmai kilbailendua — kävelyn levittämizekse (luguh ottajen skandinuavistu kävelyy) fiiziellizenny toimindannu. Kävelypivon jälgeh aktiivizimile ozanottajile annetah Ven’an olimpiuadukomitietan kiitoskirjua da järjestäjien hommattuu palkinduo[4].
On tärgei pruazniekkutapahtuman kul’tuuru- da vesseldysozagi: tavan mugah sen programmas ollah arvonimensuannuzien ammattisportumiehien ezitykset, artistoin konsertat laval da muasteriopastukset[4].
Huomavukset
- ↑ Александр Кузин. В России будет ежегодно проходить день ходьбы. rg.ru. Российская газета (9. ligakuudu 2014). Kačondan päivymiäry: 17. kylmykuudu 2025.
- ↑ Почти миллиард шагов: в России прошел первый Всероссийский день ходьбы. gtrksakha.ru. ГТРК «Саха» (5. ligakuudu 2015). Kačondan päivymiäry: 17. kylmykuudu 2025.
- ↑ Положение о Всероссийском дне ходьбы. olympic.ru. Олимпийский комитет России (1. elokuudu 2024). Kačondan päivymiäry: 17. kylmykuudu 2025.
- ↑ 1 2 Методические рекомендации про проведению Всероссийского дня ходьбы 2024. olympic.ru. Олимпийский комитет России (20. elokuudu 2024). Kačondan päivymiäry: 17. kylmykuudu 2025.
Linkat
- Всероссийский день ходьбы (рус.). Олимпийский комитет России.