Magdalena Forsberg
| Magdalena Forsberg | |
|---|---|
 | |
| Roindunimi | ruoč. Magdalena Wallin |
| Roindupäivy | 25. heinykuudu 1967 (59 vuottu) |
| Roindukohtu | |
| Mua | |
| Toimindu | ampumahiihtäjä, maastohiihtäjä, urheiluselostaja |
| Ukko | Henrik Forsberg[d] |
 Медиафайлы на РУВИКИ.Медиа | |
Magdalena Forsberg (ven. Магдалена Форсберг, neissugunimi Wallin; roin. 25. heinykuudu 1967, Kramfors[d], Vesternorrland[d]) on ruoččilaine hiihtoambui da hiihtäi. Forsberg kuuzi kerdua oli Muailman hiihtoammundan kilboin voittajannu. Naizis häi on ainavo muailmas, ken kuuzi kerdua sai Muailman sportumal’l’an hiihtoammundas, ližäkse häi on 17 pienen muailman sportumal’l’an omistai eri hiihtoammundan lajilois. Forsberg on Olimpiuadukižoin bronzumedalin suannuh. Jälles kauttu 2001-2002 loppi sportukarjieran, silloi händy ei voidu ennittiä toizet – Forsberg Muailman sportumal’l’an ližäkse sai vie kai nelli piendy sportumal’l’ua.
Sportukarjieru
Hiihtändy
Forsberg rubei hiihtämäh vie lapsusaigua, specialistoin mugah hänes pidi kazvua nerokas hiihtäi. Nenga vuvvennu 1986 häi sai bronzumedalin nuorižon muailman hiihtokilvois (kilbujuoksus), sit vuvvennu 1987 sai bronzumedalin iččenäzes hiihtändäs.
Vuozinnu 1988-1994 kuului Ruočin hiihtäjien joukkoveheh. Yhtelläh aiguzennu hiihtändy ei lykystynnyh: Magdalena ei ozutannuh erinomazii tuloksii. Enämbän migu 30 hiihtokilbah Muailman sportumal’l’an suamizekse yhtyttyy häi vaiku kerran piäzi toizele sijale, a enzimäzien kymmenien joukos oli vaiku kuuzi kerdua. Hänen parahannu tuloksennu Muailman hiihtokilvois oldih Lahten kilvat (1989), kus häi piäzi kymmenendele sijale. Vuvven 1992 Olimpiuadan talvikižois Al’bervil’as piäzi 26. da 34. sijale. Lillehammeran Olimpiuadah häi ei voinnuh lähtie ahillannivelen satatuksen periä. Vuvven 1987 muailman hiihtokilvois Forsberg piäzi kolmandele sijale Ruočin joukkovehenke kilbujuoksus.
Hiihtoammundu
Jälles Olimpiuadukižoi Al’bervil’as, kus Magdalena ei suannuh nimidä, huavai lähtie hiihtoammundan ”leibih”, kui iče sanoi šuutkua ruadi. Häi rubei harjaittamah Sundsvall-kluubas samannimizes linnas. Jällespäi tädä kluubua ezittäjes Forsberg moni kerdua rodih Ruočin kilboin voittajakse. Enzimäzen kerran häi otti vintouhkan kädeh vuvvennu 1993, silloi hänel oli 27 vuottu, da jo kavven 1994-1995 aigua kuului Ruočin joukkoveheh.
.jpg)
Kavvet 1994-1995 da 1995-1996
Enzikerdua Forsberg yhtyi hiihtoambujien kilboih Muailman sportumal’l’an suamizekse talvikuul 1994. Se oli kilboin enzimäine etuappu Avstrien Bad Gastein -linnas. Silloi häi piäzi 13. sijale iččenäzes hiihtoammundas da 17. sijale sprintas. Ga jo nelländel etuapal Germuanien Rupol’dingas häi oli kukkuseremounies jälles iččenästy hiihtoammundua – häi piäzi seiččemendele sijale da sai kuldumedalin sprintas. Kavven loppussah Forsberg niyhty kerdua ei nossuh poudiumale, yhtelläh kukkuseremounieh yhtyi alalleh, kerran odva ei suannuh medalii, jäi nelländele sijale.
Ga jo tulien kavven Magdalena algoi poudiuman ”valloitandas”. Omas kodoimuas Ruočis Östersundas Muailman sportumal’l’an kilboin enzimäzel etuapal häi tuli kolmandennu iččenäzes hiihtoammundas. Toizel etuapal Norveegien Holmenkollenas sai kuldumedalin samas hiihtoammundas. Kavven loppussah Forsberg vie kaksi kerdua sai bronzumedalin da moni kerdua yhtyi kukkuseremounieh.
Eigo ni enzimäzen, nigo toizen kavven suavutuksien jälles suannuh duumaija, ku jo tulies kavves algavuu Magdalena Forsbergan aigukauzi da se ozuttau erinomazii tuloksii da ei sit sportas, kudamas algavui.
Kavvet 1996-2002
- Forsberg kuuzi kerdua sai Muailman sportumal’l’an (1997-2002);
- Häi kuuzi kerdua oli Muailman kilvoin voittajannu (1997(2), 1998, 2000, 2001(2));
- Kuuzi kerdua sai pienen Muailman sportumal’l’an perähajokilvois (1997-2002);
- Viizi kerdua sai pienen Muailman sportumal’l’an sprintas (1998-2002);
- Nelli kerdua sai pienen Muailman sportumal’l’an iččenäzes hiihtoammundas (1998, 2000-2002);
- Kaksi kerdua sai pienen Muailman sportumal’l’an hiihtoammundas joukolleh lähtijes (2001, 2002);
- Sai hobjumedalin Muailman hiihtoambujien kilvois (1999);
- Sai viizi bronzumedalii Muailman hiihtoambujien kilvois (1996, 1997, 1999, 2000, 2001);
- Vuvvennu 2002 Olimpiuadan talvikižois Solt Leik Sitis sai kaksi bronzumedalii;
- Kaksi kerdua sai bronzumedalin nuorižon Muailman hiihtokilvois.
Jälles sportua
Vuvven 2020 tiedoloin mugah sportukarjieran loppiettuu Magdalena Forsberg ei lähtenyh sportaspäi kogonah. Häi on kommentuatorannu Germuanien ARD-kanualal, on Eurosport-kanualan ekspertannu. Ližäkse hänel on oma ozutus Ruočin TV:s, kus häi sanelou matkustamizis. Forsberg on L`Oreal-kosmietiekkubrendan mainostajannu persounannu[1].
Palkindot
- Nelli Džerringan palkinduo (1997, 1998, 2000, 2001);
- Forsbergan nimi on ezitetty Hiihtoammundan kuulužuon zualas (2023)[2].
Pereh
On miehel endizel hiihtoambujal Henrik Forsbergal (vuvves 1997), kudai loppi karjieral yhtel aigua akanke. Perehes on kaksi poigua[3].
Huomavukset
- ↑ Как сейчас выглядят и чем занимаются титулованные биатлонистки (рус.). dzen.ru. Kačondan päivymiäry: 21. ligakuudu 2025.
- ↑ Призеры Олимпийских игр вошли в Зал славы биатлона (рус.). rsport.ria.ru (17. tuhukuudu 2024). Kačondan päivymiäry: 21. ligakuudu 2025.
- ↑ Биатлон и купидон (рус.). sport-express.ru. Kačondan päivymiäry: 21. ligakuudu 2025.