Muailman jiämaijon päivy
| Muailman jiämaijon päivy | |
|---|---|
 | |
| Tiippu | Ammatilline |
| Virrallizesti | World Ice Cream Day |
| Pandih alguh | 1979 |
| Pietäh | joga vuottu |
| Päivymiäry | 10. kezäkuudu |
| Liittyy | jiämaidoh |
Muailman jiämaijon päivy (angl. World Ice Cream Day) on kanzoinväline pruazniekku, kudamua pietäh joga vuottu 10. kezäkuudu. Pruazniekku ei ole virralline, sen tarkoituksennu on jiämaijon popul'arizacii da sen syöndykul'tuuran parandamine.
Pruazniekkah nähte
Histourii
Muailman jiämaijon päivän alguhpanijannu oli amierikkalaine Ben & Jerry’s-kompuanii Berlingtonas, Vermont-ozavaldivos[1]. Vuvvennu 1978 ystävät Ben Koen da Džerri Grinfild, jiämaijon tuotandon opastuksen suaduu, avattih oman jiämaijon koufeilan. Alguudah myöte hyö huavattih suittua tarbehekse dengua da ostua gruuzumašinan, tahtottih roita pitkien matkoin šouferiloikse[2]. Ga koufeilu terväh rodih kuulužakse da ystävät piätettih ielleh kehittiä biznessua.
Kezäkuun 10. päivänny vuvvennu 1979 Ben da Džerri piettih koufeilan enzimäzen roindupäivän. Sinäpiän hyö juattih jiämaiduo kaikile tahtojile ilmai. Se oli moine hyvä idei, pruazniekku rubei leviemäh sit kogo muadu myöte da jälles rodih muailman pruazniekakse.[3].
On olemas vie yksi pruazniekan alguhpanon histourii. Sen mugah 10. kezäkuudu vuvvennu 1786 Amierikan Yhtysvallois algavui jiämaijon massutuotando. Ga kirjallizii tovestuksii sille ei ole.
Perindöt
Hos Jiämaijon päiviä pietäh kogo muailmas, virrallizesti se ei ole hyväksytty. Sinäpiän kaikes muailmas pietäh festivualiloi, vilun magevuksen degustacieloi da syöndykilboi. Monis linnois järjestetäh sežo ilokkahii rahvahan pruazniekkoi, enimyölleh keskuslagevoloil libo puustolois. Suuret jiämaijon tuottajat puaksuh palkitah ozanottajii mustolahjoil da magieloil lahjoil.
Pruazniekkupiän pietäh ainavoluaduzii šouloi da muasteripajoi jiämaijon luajindas. Erähät jiämaidolaukat pietäh akcieloi da myvväh jiämaiduo alendushinnal.
Histourien toziaziet
- Vuvves 1813 jiämaido rodih vältämättömäkse syömizekse Amieriekan Yhtysvaldoin piämiehen virgahtulendupivos.
- Jiämaijon puikkozen on keksinyh 11-vuodehine Frenk Epperson vuvvennu 1905.
- Vuvvennu 1939 VDNH-ozuttelus Moskovas oli nostettu paviljounu "Jiämaido" arhitektoran A. N. Bel'skoin projektan mugah.
- Amieriekan Yhtysvallois heinykuu on kanzalline jiämaijon kuu, a sen kolmas pyhäpäivy on kanzalline jiämaijon päivy (angl. National Ice Cream Month). Sen on hyväksynnyh prezidentu Ronal'd Reigan vuvvennu 1984[4].
- Eniten jiämaijon luaduu tariččou kävyjile jiämaijon koufeilu Heladería Coromoto Merudas Venesuelas — 860. Vuvvennu 1996 se pandih Ginnesan rekordoin kniigah[5].