Muailman muhelun päivy
| Muailman muhelun päivy | |
|---|---|
 | |
| Tiippu | Ei-virralline pruazniekku |
| Pandih alguh | vuvvennu 1999 |
| Päivymiäry | ligakuun enzimäine piätteniččy |
| Liittyy | muheluh |
Muailman muhelun päivy (ven. Всемирный день улыбки libo ven. Международный день улыбки; angl. 'World Smile Day') on kanzoinväline ei-virralline muhelun pruazniekku. Tädä päiviä joga vuottu pietäh ligakuun enzimäzenny piätteniččän[1]. Pruazniekku rodih vuvvennu 1999.
Histourii
Pruazniekan alguperän histourii liittyy taidoilijah Harvi Bollah Amierikan Yhtysvalloispäi. Vuvvennu 1963 hänen puoleh kiännyttih edustajat amierikkalazen State Mutual Life Assurance Company of America -kaičusfirmas, kudai sil aijal hommai toizen kompuanien — angl. Guarantee Mutual Company, da tämän yhtymizen periä ruadajien morualline mieliala oli katkennuh. Rahvas ei tietty, midä vuottua ielleh, heil hävii tuliiaijan varmus da hyö roittih gu keskelekavonnuzikse. angl. State Mutual Life Assurance Company of America -firmu kyzyi Bollua keksimäh mustohjiäjiä kuvua, kudai kohottas firman ruadajien mieldy.
Taidoilii algai sit, gu kuvai muhizijan keldazen pyörikön, se vai ei roinnuh hänele mieldy myö, gu kiändäjes piälailleh kuva muutui buuristunnuokse. Sit Bollu ližäi sille kaksi silmiä, da ezile tuli muhizii nuamu, kudamua nygözel aijal tietäh da sanotah smailiekakse. Täh piirustusruadoh hänel meni ei enämbiä kymmendy minuuttua. Kuvan keksimizes Harvi Boll sai tiluajis 45 dollarua.
Tämän kuvanke angl. State Mutual Life Assurance Company of America -kompuanii luajitutti rynnäsmerkii da jagoi net ruadajien keskes. Sen tehtävänny oli panna ruadajii muheloittamah telefonpaginoin aigua da toizien ruadotehtävien täyttäjes. Toimisto kačoi varustua vai sada palua mostu rynnäsmerkii, ga ruadajat ruvettih lahjoittamah niidy kävyjile, niilöin suavutus kazvoi ylen suurekse. Ruvettih tiluamah kymmenen tuhanden rynnäsmerkin partieloi. Vuvvekse 1971 myödih enämbi 50 miljounua rynnäsmerkii smailiekanke, kuvas rodih kanzoinväline tunnusmerki, kudai oli kaikkiel — spičkuvakkazis algajen. Amierikan Yhtysvallois kai piästettih ilmoile poštumarku, kuduas oli muhizii nuamu.
Boll ei piässyh omal aijal registriiruimah smailiekan luadiioigevuksii, da sentäh, hänen poijan sanoin mugah, eigo pidänyh pahua mieldy, eigo žiälöinnyh. Erähäs pagizuttelus häi sanoi:
Rahvaskunnan da taijon histouries igänäh ei olluh niyhty mostu tevostu, kudai muga levieh levenemäh piästyy, tuos sen verdua ozua, hyviä mieldy da mielenhyvytty. Täs ei olluh nimidä luajittuu helpoh, ga sit rodih kaikkienellendetty.
Vahnettuu Harvi Boll lopullizesti miäräi oman tehtävän täl muailmal — häi pidi omua iččie kanzoinvälizenny ozan poslannu.
Vuvvenu 1999 häi perusti ei-kaupallizen hyvyönluadijan Muailman muhelun ven. World Smile Foundation -fondan, kudai andau licenzielöi smailiekale (Harvey Ball Signature Smiley -tavarmerki) da tugou lapsien projektoi. Tämän smailiekku-tuotehmerkin käytös lunnastetut varat mennäh fondah, niilöi pietäh hyvyönluajindutarkoituksih.
Sinävuongi, vuvvennu 1999, taidoilijan kehoitukses enzikerdua piettih Muailman muhelun päiviä. Järjestäy sidä Muailman muhelun fondu. Pruazniekkupäiviä keksijes Boll enämbäl kaikkie tahtoi ozuttua oman vastuksen smailiekan kaupallistumistu vastah sego internettua vastah, kudamua myö levii muhizii naumu[1].
Harvi Boll uskoi, täs päiväs pidäs roita oma hyväle mielele da hyvile tegoloile.
Pruazniekkua pietäh ligakuun enzimäzenny piätteniččän. Piätteniččy vallittih sentäh, gu kahtu lebopäiviä vaste pidäs, gu rahvahil olis vai hyviä mieldy. Ligakuu ehoitettih sendäh, gu tämä kuu on sygyzyn keski — aigu, konzu rahvastu valduau paha mieli (а Muhelun päivän tehtävih kuuluu ajua se iäre)[2].
Pruazniekan louzungu on: "Luaji hyvys — sua kedätahto muhahtamahes".
Pruazniekan piendy
Muailman muhelun päiviä pietäh harrastajat ymbäri muailmua järjestäjen akcieloi, flešmoboi (ezimerkikse, rahvas seizatutah avvonazel kohtal smailiekan muodozeh kuvah), karnavualua, konsertua, kuvakilboi[3]. Pruazniekkua suvaijah pidiä lapsien päivykodoilois, školis da kai yliopistolois.
Sociualuverkolois internetan käyttäjät juatah vesselii minuškoi muhizijoin nuamoinke. Äijis mualois movvas on lahjoittua toine toizele mustolahjua smailiekan kuvanke.
Erähät kompuaniet uskaldetah Muailman muhelun päivänny suurii alenduksii omile partn’ouroile libo klijentoile tilavolois smailiekoinke[2].
Huomavukset
- ↑ 1 2 Мир отмечает Международный день улыбки. РИА Новости (2. ligakuudu 2009). Kačondan päivymiäry: 10. kylmykuudu 2025. Arhiviiruittu 6. ligakuudu 2017
- ↑ 1 2 Дарья Ивашкина. Всемирный день улыбки в 2025 году: история и традиции праздника. Комсомольская правда. Kačondan päivymiäry: 10. kylmykuudu 2025.
- ↑ Ольга Чудина. 4 октября отмечают Всемирный день улыбки: как появился праздник. Учительская газета (4.10. 2024). Kačondan päivymiäry: 10. kylmykuudu 2025.