Muailman nuorižon neroloin päivy
| Muailman nuorižon neroloin päivy | |
|---|---|
 Vuvven 2024 Muailman nuorižon neroloin päivy | |
| Tiippu | Muailman |
| Pandih alguh | talvikuus vuvvennu 2014 |
| Päivymiäry | 15. heinykuudu |
Muailman nuorižon neroloin päivy (ven. Всемирный день навыков молодёжи; angl. 'World Youth Skills Day') on yksi Yhtistynnyzien Kanzukundien kanzoinvälizis päivis, kudaman talvikuus vuvvennu 2014 perusti Piäassamblei (rezol'ucii A/RES/69/145). Päivän perustandan tarkoituksinnu oli kiinittiä huomavuo nuorien neroloin vältämättömäh parendamizeh, kehittiä sih pädijät sociualu-talovuollizet olot de sellittiä nuorien ruavottomuon da vajuan ruadopäivän ongelmat.
Tämän päivän piendän ajatuksen ehoitettih Šri Lankan ezittäjät Yhtistynnyzis Kanzukunnis. Idein luadijat Piäassamblein erähäl istundol ilmoitettih suuren huolen nuorižon ruavottomuon kazvamizen da miärän täh[1].
Piendän päivymiäry
Kanzoinväline päivy hyväksyttih, talvikuus vuvvennu se sai pruazniekkupäivän virrallizen stuatusan. Nygöi sidä joga vuottu pietäh keskikezän aigua — 15. heinykuudu[2].
Tavoittehet da ruavot
Päivän piendän tarkoituksii on mustoittua nuorile kestävän kehityksen arvos, tarbehes kannattua dengal tervehyönhoiduo, ammatillistu opastustu da ruadopaikkoin suamistu[1].
Kuvailu
Nuorien rouli on ylen tärgei inkl’uziivizen da muuttumattoman yhteiskunnan nostamizeh da sen vagavah kehitykseh. Nuorien aktiivistu ozanottuo kyzytäh ilmaston muuttumizen, ruavottomuon, köyhyön, sugupuolien välizen eriarvožuon, riijoin, muahmuuton da toizien tovellizien varavoloin vastazeh toimindah.
Nuorus on elaijan aktiivizin aigu, konzu ristikanzu piäzöy virgah, yhtyy yhteiskunnallizih ruadoloih, perehtyy. Nuorien ližäneroloin suamine avvuttau heile hyvin muuttelemah vaihtujas ruadomarkintilandehes da azumah oigieloi piätöksii ruavos da elaijas. Avvuttajakse nuorien talovuollizien elosololoin parandamizekse pidäs ruveta mualoin halličuksil[1].
Yhtistynnyzien Kanzukundien vuvven 2021 tiedoloin mugah, ruavottomus nuorien keskes on enämbi 23 %. Vuodessah 2024 tämä lugu vie enämbäl on kazvanuh[1].
Nuorien ruadopaikkoin lugumiäry alalleh vähenöy, da eriarvožus ruadomarkinoil vastukavai kazvau. Joga viijes nuori, ruadai ristikanzugi eläy suures kurjuos libo ei voi piästä opastumah. Nuoret naizet kaikkineh jovvutah suostumah pienipalkazeh libo opastustu ei-vastuajah ruadoh, ruveta ruadoh puoleh palkah libo väliaigazen ruadosobimuksen mugah[1].
Yhteh aigah nuorien ruavottuomuon da vajuan ruadopäivän ongelmu on samanmoine kui kehittyjis mualois mugai tevolližusmualois[1].
Uuzih ololoih sovittamizekse nuoril pidäy ruveta suamah da harjavumah kyzyttylöih neroloih. Sendäh gu neroloin kehittämine, opastus da ammatilline opastumine ollah tärgielöi suavutusozii. Vaigu nygözet sistiemat ei vastata nuorien opastustarbehii. Sentäh nuorien ammatilline opastamine da ruadopaikkoin suamine roittih Yhtistynnyzien Kanzukundien tärgeviminny kačeltavinnu kyzymyksinny kestäväh kehitykseh niškoi vuodessah 2030[1].
Nuorižon neroloin päivy perustettih yhteiskunnan huomavon kiinittämizekse nuorien ruavottomuon ongelmah da sellittämizekse nuorile, gu neroloin da harjaituksien kehittämine on tärgevin keino hyvän ruavon suamizekse da heijän talovuollizien elosololoin parandamizekse[1].
Ohjelmu
Muailman nuorižon neroloin päivy joga vuottu on omistettu uvvele tiemale. Yhtistynnyzien Kanzukundien Piäassamblei tariččou tapahtumien tieman da ohjelman Yhtistynnyzien Kanzukundien ozanottajile valdivoloile, toimistoloile da laitoksile, muile kanzoinvälizile da alovehellizile yhtistyksile sego rahvahanyhteiskunnale. Tavan mugah net ollah tiijonandajat hommat, omatahtozien pivot sego tiijoitus- da propagandutapahtumat.
Sinäpiän pietäh konferensieloi, tiijonandajii luvendoloi, nuorien ammatillistu opastamistu da ruadopaikkoin suamistu koskijoi opastusseminuaroi. Opastuslaitoksis pietäh temuattizii urokkoi, školaniekkoin da opastujien käziruado-ozutteluloi. Hyvyönluadijat fondat kerätäh denguvarua sociualuprojektoin todevuttamizekse[3].
Yhtekse moizekse tapahtumakse rodih angl. WorldSkills-liikeh, se on nuorien ammattinerozien ruadajien da alle 22-vuodehizien opastujien väline kilbu. Liikkehen ozannu on se, gu nuoret rahvas pannah internettah fotokartočkua omis ruadopaikois, sen vuoh školaniekat da heijän vahnembat jo toizin kačotah uuzih ruadaiammattiloih da ammatillizen opastuksen keskiopastuslaitoksih.
Muailman nuorižon harjavuksien päivy — 2024
Vuvven 2024 pruazniekan tiemannu oli "Nuorižon nerot rauhah da kehitykseh niškoi". Tiemu merkiččöy nuorižon tärgiedy roulii rauhan rakendamizeh da konfliktoin sellittämizeh niškoi. Nuorile täydyy opastuo uuzih neroloih, kudamii kyzytäh rauhan kul’tuuran kehittämizeh, mieron kanzalližuon opastukseh da kestävän kehityksen avvuttamizeh oigevuonmugaizemban, inkl’uziivizemban da muuttumattomemban tulien aijan nostamizekse kaikile[4].
Muailman nuorižon harjavuksien päivy — 2023
Vuvven 2023 Muailman nuorižon neroloin päivän tiemannu oli "Školien da yliopistoloin opastajien da nuorižon varustamine muuttamah tuliedu aigua". Tiemu nostau opastajien, harjaittelijoin da toizien opastusalan ruadajien tärgiedy roulii nuorien ruadomarkinoile da yhteiskunnan elaigah ozanoton neroloin kehittämizekse[5].
Huomavukset
- ↑ 1 2 3 4 5 6 7 8 Всемирный день навыков молодёжи (рус.). https://celebratoday.com/. Kačondan päivymiäry: 14. heinykuudu 2025.
- ↑ Всемирный день навыков молодежи – международный праздник, Избиратель — Депутат (15 heinykuudu 2020). Kačondan päivymiäry: 18. heinykuudu 2024.
- ↑ Назаренко Алевтина. Всемирный день навыков молодежи (рус.). Крымскотатарский музей культурно-исторического наследия. Kačondan päivymiäry: 14. heinykuudu 2025.
- ↑ Тема 2024 года: Навыки молодежи для мира и развития (рус.). Организация Объединенных Наций. Kačondan päivymiäry: . Heinykuu 2025.
- ↑ 15 июля – Всемирный день навыков молодежи (рус.). Институт развития социально-экономических проектов и инициатив — ИРСЭПИ (15. heinykuudu 2023). Kačondan päivymiäry: 14. heinykuudu 2025.