Suoru liinii Vladimir Putinanke (2024)

Suoru liinii Vladimir Putinanke (2024)
Enzimäine piendypäivy	24. talvikuudu 2001
Puaksuvus	joga vuottu
Luadii	Ven'an piämiehen hallindo
Verkosivusto	москва-путину.рф

Suoru liinii Vladimir Putinanke (2024) on Ven'an piämiehen Vladimir Putinan jogavuodine lehtistökonferensii, kudai on yhtistetty suoran liinienke. Se piettih 19. talvikuudu vuvvennu 2024. Kyzymyksii valdivon piämiehele ruvettih keriämäh sms-viestilöin da internetan kauti talvikuun 7.-8. päivien välizel yöl vuvvennu 2024.

Vuvven 2024 talvikuun 18. päivän tiedoloin mugah rahvahan kiändymyksien lugu eri muvvos oli enämbi 1,5 miljonua.

Valmistus

Algajen 00:00 čuasus 8. talvikuudu talvikuun 19. päivässäh vuvvennu 2024 otettih vastah tekstu- da videokyzymyksii Ven'an piämiehele erillizen mobiilisovituksen, sms-viestilöin, telefonan avul, Vkontakte da Odnoklassniki-sociualuverkoloin kauti, sežo verkosivustol moskva-putinu.ru (москва-путину.рф).

Vuvvennu 2024 call-keskuksen ruadajat Rahvahan frontan štuabas enzikerdua otettih käyttöh tegoälyn kanzalazien kiändymyksien sellittämizekse. Neuroverko GigaChat lajitteli kiändymyksii sociualuverkolois, audioviestilöi da sms-viestilöi vallittuloin tiemoin mugah.

11. talvikuudu vuvvennu 2024 Vladimir Putin kävyi Sberan keskustoimistoh Moskovas, kus kačoi kehityksien ozutteluu tegoälyn alal. Sen ližäkse GigaChat edukädeh sanoi valdivon piämiehele sit, mittumat probliemat enne kaikkie huolestutettih kanzalazii suorale liiniele kiändyjes:

Selgei on, mittumih kyzymyksih pidäy varustuakseh, mittumii on suuri vuitti: eländykohtien luadu da suadavus, transportan infrastruktuuru, liečetiedo, valdivollizet struktuurat da laitokset, denguavut.

Valdimir Putin tuttavui piätiemoih kanzalazien suorale liiniele kiändyjes (2024)

Vuvven 2024 talvikuun 18. päivän tiedoloin mugah rahvahan kiändymyksien lugu suorale liiniele eri muodolois oli enämbi 1,5 miljonua. Ielolijoinnu työttylöin kiändymyksien mugah roittih Keskus-, Luodeh- da Suvifederualuokrugat. Aijallizembii tiemoi oldih alovehien gazifikacii, poltoainehen da kunnanpalvelun hindoin kazvo, erillizen sodaoperacien ozanottajien da heijän perehien kannatandu.

Vuvven 2024 tulokset

Ozutandan tärgielöi tiemoi oldih Ven'an sociualupoliitiekku (20 % kiändymysty), kyzymykset eländypaikois (9 %), talohuos (9 %), tervehyönhoijos (8 %), kunnan talovuos (8 %), Erilline voinuoperacii (6 %).

Talovus

Valdivon piämies vuvven 2024 talovuon tilan sanoi "pyzyjäkse da uskottavakse", arvosti VVP:n kazvuo kui läs 3,9 %, а smietti, ku vuvvennu 2025 se rodieu 2,5 %. Sen ližäkse verdaili tilah Jevroupan liitos (VVP:n kazvo on nol'a vuvvennu 2024) da Amierikan Yhtysvallois (läs 6%). Erikseh mainičči Ven'an ruavottomuon rekordupieneh luguh nähte (2,3 %). Vladimir Putin pani merkile muokkuandutevolližuon tuotandon suuren kazvon Ven'an Federacies, mi on muan iččenäžyön lujittamizen tunnustuksennu.

Vladimir Putin: "Talovustila on pyzyi da uskottavu".

Vuvven 20024 infl'acies paistes, kudai oli 9 %, piämies ilmoitti, ku sil on objektiivizii da subjektiivizii syylöi. Objektiivizien syylöin joukkoh kuulutah:

• Kuluttamizen kazvo Ven'al;
• Muailman logistiekkah vaikuttajien hindoin kazvo.

Subjektiivizien syylöin joukkoh kuulutah:

• Keskusbankan infl'acieh vaikuttajien instrumentoin, kudamat ei olla kiini perusstavkah, myöhästynnyh käyttö;
• Ven'an Federacien halličuksen myöhästynnyh ruado erähien aloin kehittämizes.

Erikseh piämies saneli Ven'an uuzien alovehien talovuon tilas, pani merkile kerättylöin veroloin kazvon Luganskan rahvahan tazavallas (kazvoi 90 %:l), Doneckan rahvahan tazavallas ДНР (79 %), Hersonan da Zaporožjan alovehel (200 %).

Erilline voinuoperacii

Vladimir Putin merijalguväin 155. erillizen gvardien joukon flavunke (2024)

Enne kui vastata kyzymykseh tilas Erillizen voinuoperacien alovehel, Vladimir Putin sanoi, kui merijalguväin 155. erillizen gvardien joukon saldatat työttih hänele oman sodaflavun da kyzyttih ozuttua sen stuudies, häi toivotti heile lykkyy, voittuo da hyviä kodih kiännyndiä. Valdivon piämiehen sanoin mugah joga päiviä saldatat eistytäh frontan liiniedy myöte, piästetäh alovehii "nellikkökilometriloin" mugah. Kurskan alovehen eläjänke paistes, kudai kyzyi, konzu siirretäh Ven'an rajalpäi Ukrainan lendovoimat, piämies sanoi, ku "saldatat vojuijah, juuri nygöi menöy boju" da uskoitti, ku "myö varmah niidy ähkiämmö iäre". Ven'an piämies pani merkile, ku ammutun tehniekan lugu Kurskan alovehel rodih suurembakse migu hävitettylöin tankoin, jalguväin bojumašinoin da muun frontal vuvvennu 2023 hävitetyn luvun. Sen ližäkse Vladimir Putin ilmoitti, ku kai murendetut siviili- da sociualuobjektat suajah endizeh kundoh, a rahvahile, kudamat jiädih kodiloittah da fatieroittah, annetah eländypaikkusertifikuatat, sih on varattu 108 miljardua rubl'ua. Pagin rodih sežo Hersonan da Zaporožjan alovehen, Luganskan da Doneckan rahvahan tazavallan endizeh kundoh suandas. Kolmen vuvven aigah doroguverko nämmil alovehil suatetah normatiivukundoh, Azovanmeres ymbäri rakendetah nellipolossahine rengastie. Jo on suadu endizeh kundoh enämbi 20 tuhattu sociualuobjektua da eländykohtua.

Vladimir Putin suoran liinien aigah (2024)

Piämies kommentiiruičči sežo kyzymyksen Erillizen voinuoperacien sodamiehile bojutegoloin ozanottajan stuatusan annandas, ei terrorizamanvastazen operacien ozanottajan. Putin sanoi, ku "haireh kohendetah da sodamiehet suajah kai, mi pidäy, luvemmo sen kai uvvelleh" .

Vladimir Putin arvosti Urhomiehien aigu -ohjelman todevuttamistu, sen aigah valmistetah rezervu Erillizen voinuoperacien ozanottajis. Idei moizien kursiloin perustandas tuli hänele, konzu vastavui studentoinke - Erillizen voinuoperacien ozanottajienke. Hänen sanoin mugah sodamiehien joukos pidäy vallita rahvas, kudamat voidas olla suurien laitoksien, municipualuyksikkölöin, ministerstvoin da virrastoloin johtajinnu:

Hairahtustu täs ei olluh niyhty...Äijile on jo luajittu ehoitukset, puututah biznessah da kaikkien tazoin valduelimih.

Vladimir Putin sežo ilmoitti, ku piätös Erillizen voinuoperacien allus pidi luadie aijembi, varustuakseh sih, sanoi, kui häi muutui erillizen operacien kolmen vuvven aigah:

Rubein vähembäl šuuttimah da heitin enimyölleh nagrandan.

Stratiegine turvalližus

Kommentiiruijen päivänlaskun joukkoviestimien ilmoitustu NATO:n ozastoloin mahtos "Orešnikan" iškun vastustamizekse, Vladimir Putin kehoitti luadie eksperementan:

Anna Päivänlasku da Ukrainu vallitah aloveh Kijevas, azetetah sinne omat kai ilmupuolistussistiemat, myö työnnämmö sinne "Orešnikan", anna hyö opitah azettua sen, kačommo, midä rodieu.

Mi koskou nimen valličuksen syylöi täh rakiettah nähte piämies sanoi: "Tottu, en tiijä".

Kačeltavat kanzoinvälizet kyzymykset

Suoran liinien aigah piämies Vladimir Putin vastai kyzymyksih, kudamat koskiettih kačeltavii kanzoinvälizii kyzymyksii. Nimenomah vastai, ku vie ei vastavunnuh Siirien endizen piämiehen Bašar Asadanke hänen Moskovah muutandan jälles, pani merkile, ku Ven’an da Siirien piämiärät on todevutettu, sendäh ku Ven'an Federacien Ammundutarbehil varustetut voimat vastustettih sie "terroristizen anklavan" roindua. Sellittäjen NBC:n toimittajan ilmoitustu sih nähte, ku "Ven'a ei suavutannuh Erillizen voinuoperacien piämiärii, kaimuau generualoi, on huononnuh", piämies ilmoitti, ku Ven'a jälgivuozinnu on vastukarai lujitannuh talohuon, iččenäžyön, puolistuskyvyn:

Teil ylen himoittau, ku Ven’a olis huononnuos tilas, ga minä olen tostu mieldy.

Putin vastai amierikkalazele toimittajale, kudai sanoi generualu Igor' Kirillovan tappamistu Moskovas peitočitappamisyrrästyksekse. Yhtelläh häi pani merkile, ku erillizet palvelut "ei huomattu sidä iškuu". Kitain Sin’hua-tiijoitusagenstavan ezittäi kyzyi Ven'an piämiesty arvostamah Ven'an da Kitain yhtehisty ruaduo. Putin sanoi, ku kahten muan kauppuvaihto on 200 miljardua dollarua, investoičusprojektoin lugu on 600, kazvoigi yhtesruado alovehellizel tazol:

Tärgei on meijän alovehien johtajien ozanotandu Kitain ezittäjienke. Valgiedu viinua sie sežo on, ga miärän mugah.

Sociualupoliitiekku

Ven’ah nähte demogruaffizet ongelmat ollah tärgevimii, sendäh ku rodivundan tazo aleni ylen äijäl — 1,41 %:ssah, naizien lugu, kudamat ollah lapsensuanduijis väheni 30 %:l. Vladimir Putinan sanoin mugah roindulugu pidäy nostua vähimyölleh 2,3%:ssah. Mi koskou valdivon kannatusmiärii, piämies pani merkile muaman kapitualan da perehipotiekan ohjelmat, yhtehizen denguavun maksandan perehile lapsienke.

"Ylen tundujikse" sanoi valdivon piämies muahmuuttopoliitiekan kyzymyksii. Hänen mielen mugah, ku suas vähendiä muahmuuttajien luguu pidäy kehittiä ruavon tulokkahuttu kiinittäjen huomavuo toimindan korgeitehnolougiellizih aloih. On tärgei sežo kovendua vuadimuksii niilöih nähte, ket tullah ruadamah Ven’ale, ližätä opastuskomponentua, ku ulgomualoin kanzalazet ellendettäs Ven’an Federacien kul’tuuruominažuksii, tiettäs kieldy. Ven'an piämies sanoi, ku erähii ruadoloi täs on jo ruattu. Ezimerkikse, hyväksyttih zakon lapsien, kudamat maltetah ven'an kieldy, školah otandas.

Tervehyönhoido

Vladimir Putin vastai Nižnii Novgorodan eläjän pahoitteluh polikliiniekois ruadajien vähyös. Hänen sanoin mugah enimyölleh liäkärilöin vähys on perustervehyönhoijos da sen periä paikallizien valduelimien tarkoituksennu on kehittiä ruadoh nuorii azientiedäjii da tolkulleh jagua ruadomiärii. Suoran liinien aigah paistih sežo farmaceftiekkutevolližuon kehitändäs da omien rohtuloin tuotandas.

Internettu

Bloggeru Vlad А4 kyzyi Vladimir Putinan mieldy YouTuben hillendämizes Ven’al. Valdivon piämies sanoi, ku platforman omistai Google vähendi tytärlaitoksien rahoittamistu Ven’an Federacies, rajoitti laittehien tuondua, mi pahoi vaikutti servisan ruadoh.

Poliitiekois

Suoran liinien aigah Vladimir Putin sanoi omii mielii Ven’an da ulgomualoin poliitiekkoih nähte. Vastates kyzymykseh, kenenke häi juos čuajuu, häi juohatti Gel’mut Kol’ua:

Vastavuzin kansleri Kol’anke...häi oli merkittävy poliitiekku, kudai äijän luadi Germuanieh nähte.

Kommentiiruičči juondajan huomaičuksii Vladimir Žirinovskoin todevunnuzis ennustuksis Ukrainah, Lähäzeh Päivännouzuh nähte:

Häi suvaičči epatažua, ga oli äijäntiedäi da valmistunnuh ristikanzu. Sendäh hänen ennustukset todevuttihgi: niilöin pohjannu oli tovelline kygy da tiijot.

Baidenas, kudai armahti omua poigua Hanterua:

On ainos tärgei, midä sinus on enämbi, poliitiekas vai ristikanzas. Tuli ilmi, ku Baidenas on enämbi ristikanzas..

Boris Jel'cinas:

Päivänlaskus suvaittih Jel'cinua, ga konzu häi korrondi iänen Belgruadan bombitandan periä, händy kerras ruvettih vuardamah da sanomah humalniekakse.

Zelenskoin tulies aijas:

Händy otetah elätettäväkse net rahvas, kudamii häi nygöi palvelou.

Anekdouttu piämiehes

Ohjelmas juohattajen, ku pidäy enämbi duumaija Ven’an syväinongelmis, piämies sanoi anekdotan:

Pereh istuu stolas. Brihačču kyzyy muamal: "Mi kolmen kirjaimen sanoi on sanaristakos?". Dai kerras suau luzikal plokun oččah. Jälles oččah suau jo akku ukos. "Kodih nähte pidäy duumaija", sanou häi.

Ližiä tieduo

• Helpotukset Erillizen voinuoperacien ozanottajih nähte

Huomavukset