Kanzoinväline šahmattoin päivy
| Kanzoinväline šahmattoin päivy | |
|---|---|
 | |
| Merkičys | Šahmattoin leviemine da kehittämine muailmas, šahmattukul’tuuran da -tiedoloin tazon nostamine. |
| Pandih alguh | Kanzoinväline šahmattuliitto |
| Pietäh | joga vuottu |
| Algavuu | 1966 |
| Päivymiäry | 20. heinykuudu |
| Liittyy | vuvven 1924 heinykuun 20. päiväh — Kanzoinvälizen šahmattuliiton perustandupäiväh. |
Kanzoinväline šahmattoin päivy (ven. Международный день шахмат) on ei-virralline kanzoinväline pruazniekku, kudai on omistettu šahmatoile da niilöin popul’arizaciele. Sidä pietäh joga vuottu 20. heinykuudu vuvves 1966 algajen.
Histourii
Kanzoinväline šahmattuliitto kehoitti luadie kanzoinvälizen šahmattoin päivän[1].
Vuvvennu 1966 UNESCO pani alguh sen päivän. Piendypäiväkse hyväksyttih 20. heinykuudu — Kanzoinvälizen šahmattuliiton perustandupäivän Pariižas vuvvennu 1924 (VIII Olimpiuadan kezäkižoin piendän aigu)[1][2].
Tämän päivän tarkoituksennu on šahmattoin leviemine da kehittämine kogo muailmas. Se nostau šahmattukul’tuuran tazuo, kudai luadiu kižas kaikile suadavan da inkl’uziivizen toimindan lajin, sih voibi kižata hos mittumas kohtas. Kižah voijah kižata kaikin, igärajoituksih kaččomattah, se voittau kieli-, sugupuoli-, fiizizii eroloi da sociualuazeman. Šahmattoih kižuandu avvuttau älyllizien neroloin, muston, luovan ajattelun kehittäjes[1][3].
20. heinykuudu vuvvennu 1966 enzikerdua piettih Muailman šahmattoin päiviä"[1].
21. kylmykuudu vuvvennu 2019 deleguattu Armieniespäi Mger Margar’an da 52 muailman muadu kehoitettih luadie rezol’ucien Kanzoinvälizen šahmattoin päivän tärgevyön da popul’arizacien tunnustamizekse[4][5].
12. talvikuudu vuvvennu 2019 Yhtistynnyzien Kanzukundien Piäassamblei kannatti tämän kehoituksen — Rezol’ucii А/74/L.24[2][3].
Vuvves 2020 kanzoinvälizet piätapahtumat mennäh Yhtistynnyzien Kanzukundien kannatuksel[2][3].
Liittyjät tapahtumat
- XVI vuozisual Ispuanien kuningahan Filipp II dvorčas piettih enzimäine Kanzoinväline šahmattukilbu[6].
- Vuvvennu 1851 Londonas piettih enzimäine kanzoinväline šahmattukilbu, kudai sovitettih Muailman tevolližuon ozuttelun piendäh[7].
- 9. ligakuudu vuvvennu 1977 — "Šahmattoin päivy". Kanzalline pruazniekku Amierikan Yhtysvallois, kudai pandih alguh prezidentan D. R. Fordan kehoitukses vuvvennu 1976[2].
Tunnussanat
Joga vuottu Kanzoinvälizenny šahmattoin päivänny kanzoinvälizet piätapahtumat mennäh tunnussanoin Myö olemmo yksi pereh! -hantuzis[2].
Perindöt
Sinäpiän joga vuottu pietäh moizii pidoloi kui[1][2]:
- Kanzoinvälizet šahmattukilvat;
- Temuattizet ozuttelut;
- Urokat šahmattu-aihies opastuslaitoksis;
- Vastavukset sportumiehienke.
Šahmattukižan samanaigazii seansoi pietäh tyrmisgi[8].
Vuvvennu 2004 Ven'al Kremlis Kanzoinvälizenny šahmattoin päivänny 12. Muailman čempion A. J. Karpov andoi samanaigazen kižan seansan. Häi sežo kižai Ven'an Federacien Valdivollizen Duuman deputuatanke V. V. Žirinovskoinke. Kižuandu loppih tazapainoh da ozapuolet kižattih briljantufiguuroin taidokogomuksel, niilöin hindu on 150 tuhattu Amierikan Yhtysvaldoin dollarua[9].
Vuvvennu 2020 Dagestuanas pruazniekkua piettih onlain- da oflain-ruadotavas. Piettih avvonaine blicturniiru nuorien sportumiehien keskes[2].
Vuvvennu 2022 Piiteris Tavričeskois savus sinäpiän kižattih täyzikazvošahmattoih, kus peškoinnu da sloninnu oldih rahvas[2].
Vuvvennu 2023 Moskovas pruazniekkupidoloi piettih Moskovan kniigutalois da kirjastos № 232 da № 239[7].
.jpeg)
Mielenkiinittäjät toziaziet
- Vuozinnu 319—543 Muinas-Indies rodih da oli olemas Čaturanga-kiža, kudai merkičči monien voiskien torua (oli nelli ozanottajua). Jälles sih kižuamah ruvettih Persies, myöhembä se levii Suurdu šulkutiedy myöte da toizih alovehihgi. ХV vuozisual Jevroupas kehityi šahmattoin klassielline laji[2][10].
- Persien kieles šahmatat-sana tarkoittau sidä, ku "kuningahan voitettih libo halličii kuoli" — "šah mat"[2][10].
- XI—XIII vuozisualoinnu kiellettih šahmattoih kižuandas, sen kiellon julgai kirikkö da Ostien kardinualu-episkoppu P’otr Damiani vuvvennu 1061. Vuvvennu 1125 eräs pappilois keksi kerättävän šahmattulaudazen kirikön kiellon kierdämizekse (salvatunnu se juohatti kniigan kantu)[10].
- Vuvvennu 1770 keksii Vol'fgang fon Kempelen luadi Šahmattuavtomuatan, se oli ristikanzan figuuru turkilazis sovis puuhizen stolan tagan. Avtomuattu voitti kaikkii kižuajii. Monen vuvven peräs tiijustettih, ku sydämes istui elävy vägevy kižuaju[10].
- Vuvvennu 1849 luajittih erilline šahmattoin kogomus, kudamii ruvettih käyttämäh kilvois — Staunton[11].
- Vuvves 1894 vuodessah 1921 šahmatois muailman čempionannu oli Emanuil Lasker — enzimäine šahmatistu, kudai otti čottah psiholougizii piirdehii kižan aigah (ezimerkikse, kižuajan stiilii tutkijes häi suatoi händy moizeh tilah, kudai hänele ei olluh mieldy myöte)[10].
Kuulužien grossmeisteroin luvettelu
XIX vuozisuan lopun — XX vuozisuan kižuajat[11][12]:
- Vil’gel’m Steinic — 1. virralline muailman čempion, temuattizen šahmattužurnualan alguhpanii;
- Emmanujil Lasker — vuozien 1894—1921 muailman čempion;
- Hose-Raul’ Kapablanka — 3. muailman čempion vuozinnu 1921—1926;
- Aleksandr Aleksandrovič Al’ohin — 4. muailman čempion vuozinnu 1927—1935, kudai ezitti Ven’an valdukundua, Nevvostoliittuo da Franciedu. Ainavo kuolluh kižuaju, kudamal sil aigua oli muailman čempionan arvonimi.
- Mihail Mojisejevič Botvinnik — enzimäine nevvostolaine 6. muailman čempion vuvves 1948 vuodessah 1963, perusti šahmattuškolan Nevvostoliitos;
- Robert Džeims (Bobbi) Fišer — 11. Muailman čempion vuvvennu 1972, kudai luadi šahmatat kuulužikse Amierikan Yhtysvallois.
Kižuajat XX vuozisuan lopus XXI vuozisadassah[2][11][12]:
- Anatolii Jevgenjevič Karpov — 12. muailman čempion vuvves 1975 vuodessah 1985;
- Garri Karimovič Kasparov — nuorin 13. muailman čempion vuvvennu 1985 (22-vuodine), kaheksakerdaine rekordsmienu, kudai voitti A. J. Karpovan da pidi sidä tiitulua vuodessah 1993. Oli enzimäzenny ozanottajannu kahtes ottelus tiedokonehenke kižates vuozinnu 1996—1997;
- Višvanatan Anand — enzimäine Indien šahmatistu, kudai oli muailman čempionannu vuozinnu 2000—2002, sit 2007—2013;
- Vladimir Borisovič Kramnik — 14. muailman čempion vuozinnu 2006—2007;
- Magnus Karlsen — 16. muailman čempion;
- Din Ližen’ — enzimäine kitailaine šahmatistu, kudai rodih 17. muailman čempionakse vuvvennu 2023;
- Gukeš Dommaradžu — nuorin 18. muailman čempion vuvvennu 2024 (18-vuodine).
Huomavukset
- ↑ 1 2 3 4 5 Международный день шахмат, РИА Новости (20 heinykuudu 2012). Kačondan päivymiäry: 16. kezäkuudu 2025.
- ↑ 1 2 3 4 5 6 7 8 9 10 11 Международный день шахмат 2025: какого числа, история и традиции праздника. Kačondan päivymiäry: 16. kezäkuudu 2025.
- ↑ 1 2 3 Международный день шахмат, РИА Новости (20 heinykuudu 2023). Kačondan päivymiäry: 16. kezäkuudu 2025.
- ↑ UN adopts July 20 as World Chess Day – International Chess Federation (амер. англ.). www.fide.com. Kačondan päivymiäry: 16. kezäkuudu 2025.
- ↑ General Assembly Adopts Three Resolutions on Culture of Peace, Highlighting Need to Foster Interreligious Dialogue, Moderate Social Media | Meetings Coverage and Press Releases (англ.). press.un.org. Kačondan päivymiäry: 16. kezäkuudu 2025.
- ↑ Международный день шахмат, РИА Новости (20 heinykuudu 2024). Kačondan päivymiäry: 16. kezäkuudu 2025.
- ↑ 1 2 20 июля — Международный день шахмат: история возникновения праздника, Известия (19 heinykuudu 2023). Kačondan päivymiäry: 16. kezäkuudu 2025.
- ↑ По случаю международного дня шахмат батюшка провел сеанс одновременной игры с… заключенными, Церковно-Научный Центр "Православная Энциклопедия". Kačondan päivymiäry: 16. kezäkuudu 2025.
- ↑ 20 июля – Всемирный день шахмат | Русский Базар | Russian Bazaar Newspaper in New York (Brooklyn, Queens, Staten Island, Manhattan, Bronx) and New Jersey. web.archive.org. Kačondan päivymiäry: 16. kezäkuudu 2025.
- ↑ 1 2 3 4 5 Международный день шахмат в 2024 году: дата, история и традиции праздника, sport-express.ru (19 heinykuudu 2024). Kačondan päivymiäry: 18. kezäkuudu 2025.
- ↑ 1 2 3 Величайшая из игр 20 июля — Международный день шахмат – МРГ-Онлайн (неопр.). mrg-online.ru. Kačondan päivymiäry: 18. kezäkuudu 2025.
- ↑ 1 2 Дугнист, Ася. Международный день шахмат в 2025 году: от игры к культуре, ВФокусе Mail (9 kezäkuudu 2025). Kačondan päivymiäry: 18. kezäkuudu 2025.