Kanzoinväline bloggeran päivy
| Kanzoinväline bloggeran päivy | |
|---|---|
 | |
| Tiippu | Ammatilline pruazniekku |
| Virrallizesti | International Weblogger’s Day |
| Pandih alguh | 2004 |
| Pietäh | joga vuottu |
| Päivymiäry | 14. kezäkuudu |
| Liittyy | Blogguamizeh |
Kanzoinväline bloggeran päivy (angl. International Weblogger’s Day, sidä tundietah InWeDay-nimelgi) on jogavuodehine pruazniekku, kuduadu pietäh 14. kezäkuudu. Päivy on omistettu internet-luadijoile ymbäri muailmua da luajittu sih niškoi, gu yhtistiä net, sego blogguamizen levittämizekse ičenilmoitandan da mielien vaihtandan välinehenny.
Bloggeran ammatti
Bloggeru on ristikanzu, kudai vedäy blogua, siännön mugah julguau viestii da jagau mielii, neroloi da tiedoloi kaččoju- da kuundeliijoukole. Blogguamine voi olla kui himoruavonnu, mugai ammatinnu.
Ammattibloggerat voijah suaja dengua eri keinoloin vuoh:
- Rekluamu: rekluamubanneroin da konteksturekluaman sijoittamine blogas.
- Partn’oran programmu: dengan lunnastamine laitoksien tuottehien/einehien da palveluloin kehoittamizel.
- Denganannandu: tuven suandu kompuanieloin maksettuloin viestien julguamizes.
- Omien tuottehien da palveluloin myöndy: kirjat, kursit, opastukset, nevvondat da toizet, mit ollah bloggeran oman ičen luajitut. Ammatillizet bloggerat ollah nerokkahat tekstoin da viestien kirjuttamizes, marketingas da sociualuverkoloin ohjavos. Hyö maltetah luadie kunnon kontentua, kudai vedäy oman ičen puoleh da pidäy kuundelii- da kaččojujoukkuo sego pidäy silmäl blogan kačondoi da parandau omii neroloi suuremban suavutuksen suamizekse[1].
Histourii
Idei luadie muailman bloggeran päiviä tuli mieleh bloggeroin joukkoloile vuvvennu 2004, sendäh gu heil oli himo yhtistiä kaikkii, ket ollah blugguamizen hommis. Enziallus läs 500 bloggerua enämbi migu 40 muaspäi kannatettih tämän ehoituksen, da 14. heinykuudu vuvvennu 2004 piettih enzimäine Muailman bloggeran päivy[2]. Vuvvennu 2007 sih yhtyttih toizien blogoin omistajat, hyö kannatettih sidä jullaten omil sivuloil viestii, gu ollah yhty mieldy ruadodovarišoinke[3].
Tämän pruazniekan tarkoituksii oli azuo yhtenäine päivy, konzu bloggerat voidas sanella omis suavutuksis, paista tärgielöis aihielois daigi muga pidiä omua ozanottuo onlain-kirjuttajien kogo muailman yhtevykseh. Pruazniekan tehtävii on vie bloggeroin panoksen tunnustamine internetan da median kehitykseh, uuzien kirjuttajien da luadijoin kannattamine blogoin luadimizeh, heijän opastandu da neroloin parandamine, sego huomavon kiinittämine bloggeroin ezitettävih tärgielöih kyzymyksih.
Enzivuozinnu hyö jullattih omis verkopäivykirjois erillizii viestilöi, erähis linnois kai jätjestettih onlain-vastavuksii, kudamil bloggerat iče suadih tuttavuo da paista omis projektois[4].
2000-luvun puolivälis Muailman bloggeran päiväs rodih merkittävy tapahtumu blogualal. Sinäpiän bloggerat ymbäri muailmua jullattih erillizii viestilöi, hyö juattih omii mielii da saneltih suavutuksis, yhtyttih erilazih pidoloih, mit piettih kui onlain-formuatas, mugai paikan piäl.
Päivän piendytavat
Sinäpiän bloggerat kirjutetah toine toizele kannatussanoi, juatah kuulužii kanualoi da resursoi, sego järjestetäh interaktiivoi kaččojujoukkoloinke. Erähis mualois pruazniekan nimeh pietäh vastavuksii, kudamil kontentan luadijat voijah tuttavuo omien ruadodovarišoinke. Ven'al sinäpiän pietäh jogavuodehizii bloggeroin "elävii" vastavuksii.
Muailman bloggeran päivän ližäkse vie on olemas Blogan päivy (angl. Blog Day). Sidä pietäh 31. elokuudu[5].
Muailman bloggeran päiviä voi pidiä omannu jogahine verkokontentan luadii, kaččojien/tiluajien lugumiäräh da blogan aihieh huolimattah[6].
Huomavukset
- ↑ Международный день блогера. ast.ru (14. kezäkuudu 2023). Kačondan päivymiäry: 29. oraskuudu 2024.
- ↑ «Международный день блогера» час общения. ФКУ «Цифровая культура» (14. kezäkuudu 2024). Kačondan päivymiäry: 29. oraskuudu 2024.
- ↑ Международный день блогера. «Тюменская областная научная библиотека имени Дмитрия Ивановича Менделеева». Kačondan päivymiäry: 29. oraskuudu 2024.
- ↑ Wayback Wednesday: International Webloggers Day 2004. Cosmic Observation. Kačondan päivymiäry: 29. oraskuudu 2024.
- ↑ 14 июня отмечается Международный день блогера. Информационный портал «РЕВИЗОР.РУ» (14. kezäkuudu 2022). Kačondan päivymiäry: 29. oraskuudu 2024.
- ↑ Международный день блогера в 2023 году — история и особенности праздника. «МИЦ «Известия» (13. kezäkuudu 2023). Kačondan päivymiäry: 29. oraskuudu 2024.