Kanzoinväline lumileopardan päivy
| Kanzoinväline lumileopardan päivy | |
|---|---|
 | |
| Virrallizesti | International Snow Leopard Day |
| Algavuu | vuvves 2013 |
| Päivymiäry | 23. ligakuudu |
| Piendy | fotokuvien ozuttelut, seminuarat, dokumentufil'moin ozutandat, festivualit |
Kanzoinväline lumileopardan päivy (ven. Междунаро́дный день сне́жного ба́рса, angl. International Snow Leopard Day) on jogavuodehine pruazniekku, kudamua pietäh 23. ligakuudu. Se perustettih vuvvennu 2013 Biškiekas Lumileopardan säilyttämizen muailman fourumal[1].
Histourii
Ligakuus vuvvennu 2013 Biškek-linnas piettih enzimäine Kanzoinväline fourumu, kudai omistettih lumileopardan säilyttämizele. Fourumale tuli kahtentostu muan ezittäjiä, oligi sie rahvastu Ven'anmuaspäi. Fourumal hyväksyttih Biškiekan julgisanomu, kudamas sanotah lumileopardan häviendän suurimis varavolois da miärätäh tärgevimät toimiaskelet sen säilyttämizekse[2].
Lumileopardu on pandu Kanzoinvälizen luonnonsuojeluliiton Ruskieh luvetteluh da Ruskieh kniigah sen vähän lugumiärän periä da häviendän pordahil olendua. Tämä harvinaine kažirovun elätti eläy Keski-Aazien ylängös. Ven’al sidä vastatah vai Suvi-Siberin Altai-Sajanskoin ekoalovehen mägilöil[3].
Kanzoinvälizenny lumileopardan päivänny tiedo- da opastuslaitoksis järjestetäh lumileopardale omistettuloi fotokuvaozutteluloi, seminuaroi da dokumentufil’moin ozuttelendoi[4], niilöin keskes oli Francien vuvven 2021 dokumentufil’mu Lumileopardan ečos -nimel (ven. "В поисках снежного барса") da Ven'an vuvven 2024 Altain mägilöin ižändy -dokumentufil'mu (ven. "Хозяин Алтайских гор").
Alovehienvälizen yhtistyksen "Irbis-nimizen lumileopardan tutkimus- da säilytyskeskuksen" selvityksen mugah kogo Ven’an jogavuodehizen luguhotandan tulokset ozutetah, gu vuvvennu 2024 muas on 87 lumileopardua, enin täs luvus eläy Altain tazavallas[5].
Tänävuon Altain tazavallas lugiettih 10 lumileopardua enämbi migu mulloi. Se merkiččöy yhty, gu eläimien eländysijoin vardoičus, toimet peitočipyvvändiä vastah, lumileopardoin syömisvarastoloin endizeh kundoh suandu ollah hyövykse da tuvvah tulostu, sanoi Irbis-yhtistyksen yhtehizen kerähmön johtai Ali Uzdenova[5].
Lumileopardan päivy Altain tazavallas
Altain tazavallas Lumileopardan päiviä pietäh 26. oraskuudu.
Vuvvennu 2010 enzimäine lumileopardoin (irbisoin) kunnivokse järjestetty akcii piettih Agač-kyläs. Vuvven mendyy ajatus sai kannatuksen Gorno-Altaiskas, sie järjestettih jo äijiä suurembi pido. Da sit rodih jogavuodehine tapahtumu.
Vuvvennu 2023 Altain luonnonsuojelualovehen ruadajat da volont’ourat päivän piendän nimeh lähtiettih tutkimusmatkah.
Altain luonnonsuojelualovehel lumileopardua tutkitah vuvves 2000, tädä ruaduo pietäh matkoin aigua Čihačovan mäinharjandehele, se on yksi Ven’an tärgevimii rajat ylittäjän eläinjoukon eländy- da olendusijoi. Tutkimusmatkan ozanottajat kačotah fotokameruridoi, suavut fototiijot tutkitah tiedomiehet. Muga elättilöin lugumiäriä kačotah da pietäh silmäl, sanoi Altain luonnonsuojelualovehen johtai Igor’ Kalmikov[6].
26. oraskuudu vuvvennu 2024 festivuali piettih linnan keskuslagevol. Pruazniekku algavui perindöllizes kost’umukullus — sidä pietäh vuvves 2022 yhtes Sail’ugemskoin kanzallizen puustonke[7][8][9].
Huomavukset
- ↑ Международный день снежного барса, РИА Новости (23 октября 2021). Kačondan päivymiäry: 14. ligakuudu 2025.
- ↑ 23 октября отметили Международный день снежного барса, Alpagama (24 ligakuudu 2024). Kačondan päivymiäry: 14. ligakuudu 2025.
- ↑ Международный день снежного барса. Зоологический музей МГ У. Kačondan päivymiäry: 14. ligakuudu 2025.
- ↑ 23 октября – Международный день снежного барса. Виртуальный аграрный и экологический центр. Kačondan päivymiäry: 14. ligakuudu 2025.
- ↑ 1 2 В России посчитали снежных барсов, РИА Новости (23 sulakuudu 2024). Kačondan päivymiäry: 14. ligakuudu 2025.
- ↑ День снежного барса на Алтае отмечают 26 мая. Зеленая Россия (26. oraskuudu 2023). Kačondan päivymiäry: 14. ligakuudu 2025.
- ↑ Горные призраки: в России отмечают День снежного барса, Национальные проекты РФ (26.05.2024). Kačondan päivymiäry: 14. ligakuudu 2025.
- ↑ Матвеюк, Василий. В Республике Алтай с размахом отметили День снежного барса, ЧС-ИНФО (27 oraskuudu 2024). Kačondan päivymiäry: 14. ligakuudu 2025.
- ↑ День снежного барса отметили в Республике Алтай. ecoportaltai.ru (28. oraskuudu 2024). Kačondan päivymiäry: 14. ligakuudu 2025.