Karjalan zooparku
| Karjalan zooparku | |
|---|---|
| Карельский зоопарк | |
 Piäzy Karjalazeh zooparkah | |
| On perustettu | 2011 |
| On sijoitunnuh | Kirkkolahti, Sordavalan piiri, Karjalan tazavaldu, Ven'a |
| Pinduala | 30 gektuarua |
| Elättilöi | 450 zvierii da 100 linduu |
| Verkosivusto | kareliazoo.ru |
Karjalan zooparku on Karjalan tazavallan Sordavalan piiris Kaalamon kyläkunnan Kirkkolahten kyläs olii zooparku. Se on Ven'an luodehpuolen suurin zooparku, sen pinduala on kolmekymmen gektuarua da sie eläy 450 zvierii da 100 linduu[1]. Zooparku on viijenkymmenen kilometrin piäs Sordavalaspäi.
Histourii
Karjalan zooparku on perustettu Karjalan tazavallan Sordavalan piirih Jänisjärven rannale vuvvennu 2011[2]. Vuozien aloh zooparku suureni da kehityi, vuvvennu 2019 se rodih Ven'an luodehpuolen suurimakse zooparkakse da se otettih Ven'an zooparkoin da akvariumoin liittoh[2].
Elätit
Allus algajen Karjalan zooparku oli reknailtu kui kabjuelättilöin eländykohtu. Niidy on tuodu Ven'an eri čuppulois da ulgomualoispäi[2]. Zooparkas on tačmupedroi, morualoi, zubroi. Viijen vuvven peräs sie ruvettih elämäh enzimäzet pedoelätit: pumat, jälles tigrat da leijonatgi[3].
Zooparkan suurel alovehel mainittuloin elättilöin ližäkse eläy mostu elättii, kui verbl'uudu, meččypočči, koza, lambahat, reboi, mustunahkureboi, pol'arnoi hukku, guanako, lama, šotlandielaine lehmy, al'paka, kodijänöi, lemuuru, hiähky, kodijänöi, hor'ku, oblezjanat, jenouttu, meripoččine, popugait, eri lajii pedolinduu da vezilinduu da toizii elättilöi[4].
Elättilöi, kudamat ei olla varattavat, voibi syöttiä, sih nähte zooparkan tulendukohtas myvväh morkouhkua.
Käyndy
Karjalan zooparku ruadau ymbäri vuvven. Lippuloin hindu rippuu sit, ongo ristikanzu tulluh Karjalaspäi vai muijalpäi. Lapset, kudamil ei ole kolmie vuottu, da Suuren Ižännmuallizen voinan veteruanat, niistiilapset, 1. joukon niistiet viettäjänke voijah kävvä zooparkah ilmai. Ostua lippu alendetus hinnas voijah lapsekkahat perehet, 2. da 3. joukon niistiet da Erillizen voinan operacien ozanottajat.
Paiči elättilöin kačondua Karjalan zooparkas on iloituksii kävyjih niškoi: trolleit da potkulavvoil ajelendat, sovvandat järvie myöte, ruatah koufeilat da lapsien perti, pietäh leijonoin šouloi[5].
Zooparkan rinnal ruadau Čornije kamni -hoteli, kus voijah olla yödy monekse päiväkse Kirkkolahten kyläh tulluot.
