Koisruattavu
| Koisruattavu | |
|---|---|
 Školaniekku luadiu kodiruadoloi | |
| Käytändän ala | opastus |
Koisruattavu libo kodiruado (ven. Дома́шнее зада́ние) on ruado, kudaman opastai andau opastujile iččenäzekse ruavokse kluasan ulgopuolel. Mostu praktiekkua käytetäh materjualan mustoh panemizekse, tieman opastumizen tarkastamizekse da opastetun uvvessah kaččomizekse[1][2].
Histourii
Opastundua kodiruadoloinke tiettih vie Muinas-muailmas: Muinas-Jegiptas, Muinas-Grecies da -Riimas opastukseh kuuluttih urokat školas da kodiruavot[1].
XVIII vuozisual Pyhän Riiman valdukunnan "rahvahan školis" oli kovembi kluassu-urokkusistiemu, kudamah kuuluttih iččenäzet ruavot; se levii Jevrouppah da se otettih käyttöh Ven'al. Päivänlaskun tutkijat ollah sidä mieldy, ku kodiruavon nygyaigastu muoduo popul’ariziiruičči amierikkalaine uvvistai Horas Mann: hänen alguhpanos XIX vuozisuan puolivälis Amierikan Yhtysvallois školaniekat allettih suaja kodiruadoloi[1][2].
XX vuozisual kodiruadolois kiistettih: opastajat Amierikan Yhtysvallois oldih sidä mieldy, ku lapsien liigu ruatutandu urokkoin jälles on paha tervehyöle, sen jälles erähis ozavaldivolois väliaijakse kieldävyttih kodiruadolois algukluasois. Jälles II Muailman voinua amierikkalazien školaniekkoin kodiruadoloin miäry konzugo kazvoi talovuollizien da poliittizien ongelmien periä, konzugo pieneni yhteiskunnan ahtistukses, kudai oli sidä mieldy, ku kodiruado ahtistau luomisruavon. Kriitiekkah kaččomattah XXI vuozisual kodiruavon luadimine opastujal Amierikan Yhtysvallois ottau kahteh kerdah enämbän aigua (läs 4,5 čuassuu), migu 1990-luvul[3]; kodiruadoloin suurus voi vaihtellakseh ozavaldivoloin mugah, erähis školis kodiruadoloi ei anneta[4][5].
Suomes da Skandinuavien enimis mualois kodiruadoloin miäry on minimualline, akcentu luajitah urokkoin luaduh da kriittizen ajattelun kehittämizeh; lapset lugietah da ruatah projektoinke urokkoin aigah. Japounies urokkoin ruadomiäry on vägi hyvä, ga on ohjattu iččenäžyön da praktiekkuneroloin kehittämizeh. Itualii, Irlandii, Pol’šu da Ispuanii kuulutah moizih mualoih, kus koisruattavan ruadamine ottau kuvves kymmenessäh čuassussah nedälis. Läs moine aigu on Kitais — sie školaniekat paiči kodiruadoloi opastutah repetiitoranke[4][5].
Ven’al
Enzikerdua kodiruadolois mainitah XVII vuozisual, konzu Ven’al ruvettih perustamah opistoloi. Ven’an valdukunnan rahvahan opistoloin ustuavan käyttöh ottamizenke (1786) F’odor Jankovič lujitti kluassu-urokkusistieman: kodiruado rodih opastundan vältämättömäkse ozakse, da oli enimälleh mehuanine piäh panendu libo mustoh panendu. Se säilyi vuozisuan XX algussah, konzu metodistat allettih muuttua urokkoin syväindön; kodiruavot hil’l’akkazin roittih ei vaiku kerduamizen instrumentannu, ga tiedoloin käyttämizekse[6].
Nevvostoliiton jälgehizinny vuozinnu kodiruado oli školan vältämättömänny ozannu. XXI vuozisuan rajal sidä otettih vastah materjualan kerduamizen ozannu da tutkindoloih valmistuksennu; sähköpäivikkölöin sa onlain-platformoin roindu muutti sen muvvon. Samal aigua liženi ruaduo: viijen da kuvven kluasan opastujat puaksuh luajittih monien opastusainehien kodiruadoloi kahten-kolmen čuasun aigah, vahnembien kluassoin opastujat — vie hätkembän[4][7].
2020-vuozien allukse uvvessah ruvettih pagzizemah kodiruadoloin tarkoituksenmugažuos. Opastajat da yhteiskunnallizet ruadajat pandih merkile, ku nygyaigazet tehnolougiet avvutetah ruadua kodiruadoloi formuallizesti käyttäjen tekstan generuattoroi. Valdivollizen Duuman piälikkö V’ačeslav Volodin elokuul vuvvennu 2025 ilmoitti, ku kodiruadolois pidäy kieldävyö, sendäh ku opastujil on liijakse ruaduo da tegoälyn kehittäjes net puaksuh roijah aijan tyhjäkse menettämizekse. Ližäkse häi merkičči, ku tutkimus- da luomisruadotehtävät kehitetäh kriittisty ajatteluu, sendäh kyzymys tarviččou šeikuiččemistu[8].
Syvyskuun 1. päiväs vuvvennu 2025 tuli voimah Opastusministerstvan käsky № 704, kudai rajoittau opastusruadomiärii da azettau tietyt aijat kodiruadoloin ruadamizekse eri-igäzien školaniekkoin keskes. Nenga enzimäzen, toizen da kolmanden kluasan opastujile nevvotah andua kodiruadoloih yhteh čuassussah, nelländen da viijenden kluasan opastujile kahtessah čuassussah, kuvvenden-kaheksanden — 2,5 čuassussah, yheksänden-yhtendentostu — 3,5 čuassussah. Dokumentu valmistettih yhtes Federuallizen käyttäjien oigevuksien puolistamizen da ristikanzan hyvineländän tarkastuspalvelunke[9].
Tarkoitukset
Pedagougiekkumetoudiekkoin mugah kodiruadoloin piätarkoituksennu on urokal opastetun piäh panemine, kerduamine da tiedoloin "loukkoloin" paikkuamine. Moine ruado avvuttau opastujile tarkastua ellendämizen tazuo čuhkuamizittah, avvuttau mustoh panemizes da tulieloih tiemoih varustandas. Se avvuttau opastajale sežo arvostua sen, kui opastui on opastunnuh materjualan da reknailla omua tuliedu ruaduo[1][10].
Toizien eduloin joukos ollah huomavon, syvendymizen da tieman tutkimusneron kehittämine; školaniekal kehitytäh moizet nerot kui ičenjärjeständy da aijan ohjuandu[2]. Kriittine da luomiruavon ajattelu pedagougoin mielen mugah kehittyy sežo tutkimusprojektoin avul da kirjalližuon iččenäzes luvendas[9]. Nygyaigazien tehnolougieloin kehitändäs školaniekat voijah vallita pättävän muvvon (luvendu, videosellitändy), mi avvuttau ottamah luguh tiedoloin vastahotandan stiilit. Iččenäine ruado kehittäy ičenellendämisty: keskikazvuhizet parembi ellendetäh omii kiindoloi da opastutah planiiruimah omua tuliedu aigua[1].
Valdivollizen Duuman opastuskomitietan piälikön Belih Irinan mugah erähii opastusainehii, moizii kui kirjalližus, ei voija opastuo vaiku kluasan ruavon aigua — suurien tevoksien luvendu, kudai kehitttäy lapsien luomisruadoneroloi, sežo on kodiruavonnu[9].
Kriitiekku
Amierikkalazen psihoulogan Harris Kuperan 2000-luvun puolivälin tutkimukset ozutettih, ku kodiruadoloin suuruon da hyvän akadiemizen opastundan väline korrel’acii on ylen pieni da pozitiivine effektu kodiruadolois nägyy enimyölleh vahnembis kluasois[11]. 18 tuhanden opastujan tutkittuu tuli ilmi, ku kodiruadoloin suurien miärien piäsyynny on školaohjelman liigu tävvendämine da opastujil tulou ičel sellittiä vaigieloi materjualoi, mi puaksuh vedäy motivacien häviemizeh. Toine tutkimus, kudamah otti ozua 4,3 tuhattu opastujua, ozutti, ku lapset, kudamat äijän aigua menetetäh kodiruadoloinke, ollah aktiivizembat urokoil, ga heil on stressua da probliemua tervehyös. Ližäkse liijat ruavot pahendetah vähävarazien lapsien suavutuksii, sendäh ku heile ei tävvy kannatustu da ololoi opastundah niškoi, a vahnembien abu voi ollah pahakse, ku hyö ei tietä materjualua[12][13].
Ven’an opastajat sellitetäh kodiruadoloin miärän opastusprogrammoil. Opastai-ammattiliittoh kuulujan Anna Šternbergan sanoin mugah hyväksytyt normat vuajitah opastujas opastuo "tiedoloin ylen suuri miäry", kudamua ei puutu andua kodiruadoloittah. Opastajan sanoin mugah pidäy muuttua opastusprogrammu pidäjen paginua kiinnostunnuzienke. Dmitrii Lutovinov, Ven’an opastusministerstvan alazen yhteiskunnallizen nevvoston piälikkö tunnusti, ku kodiruadoloin miäry on "toven suuri" da se on sendäh, ku ei ole reglamentua kodiruadoloin suuruos. Opastai-ammattiliiton piälikkö Dmitrii Kazakov paistes hyväksytys 1. syvyskuudu vuvvennu 2025 Opastusminsiterstvan käskys № 704 ilmoitti, ku uvvet normatiivat pidäy kaččuo vaiku nevvoloinnu, objektiivizestihäi ei sua tarkah miärätä min verdu aigua pidäy joga školaniekal kodiruadoloin ruadamizekse[9].
Huomavukset
- ↑ 1 2 3 4 5 Что такое ДЗ (домашнее задание): надо ли делать, обязательно ли, зачем выполнять и для чего, Умскул Журнал (20 syvyskuudu 2024). Kačondan päivymiäry: 22. syvyskuudu 2025.
- ↑ 1 2 3 Кто придумал домашнее задание и зачем (неопр.). SportZania. Kačondan päivymiäry: 22. syvyskuudu 2025.
- ↑ Pinsker, Joe. The Cult of Homework, The Atlantic. Kačondan päivymiäry: 22. syvyskuudu 2025.
- ↑ 1 2 3 Домашние задания в школе: история, международный опыт, плюсы и минусы, влияние на детей и перспективы отмены в России (рус.). obr.so. Kačondan päivymiäry: 22. syvyskuudu 2025.
- ↑ 1 2 Домашнее задание: есть ли в нем необходимость? — Центр развития интеллекта «Пифагорка» (неопр.). Центр развития интеллекта «Пифагорка». Kačondan päivymiäry: 22. syvyskuudu 2025.
- ↑ Бакулина Е. А., 2010, с. 156—157.
- ↑ Педсовет. Домашнее задание вызывает стресс (19 sulakuudu 2008). Kačondan päivymiäry: 22. syvyskuudu 2025.
- ↑ Володин предложил обсудить отмену домашнего задания для школьников, РБК. Kačondan päivymiäry: 22. syvyskuudu 2025.
- ↑ 1 2 3 4 Депутаты подготовили единые требования к домашним заданиям в школах, РБК. Kačondan päivymiäry: 22. syvyskuudu 2025.
- ↑ Нужна ли домашняя работа в школе?, Блог «Школы Будущего Online». Kačondan päivymiäry: 22. syvyskuudu 2025.
- ↑ Стресс, конфликты, переутомление, недосып: почему школам пора отказаться от домашних заданий. Kačondan päivymiäry: 22. syvyskuudu 2025.
- ↑ Слепухина, Ирина. Учеба без передышки: почему домашние задания могут вредить школьникам. Kačondan päivymiäry: 22. syvyskuudu 2025.
- ↑ Cooper H., Robinson J. C., Patall E. A., 2006.
Kirjalližus
- Cooper H., Robinson J. C., Patall E. A. Does Homework Improve Academic Achievement? A Synthesis of Research, 1987–2003 (английский) // Review of Educational Research. — American Educational Research Association, 2006. — Т. 76, вып. 1. — doi:10.3102/00346543076001001.
- Бакулина Е. А. Перспективы использования домашнего задания в обучении математике (русский). — Проблемы и перспективы развития образования в России, 2010. — С. 156—159.