Marin kirjukielen päivy
| Marin kirjukielen päivy | |
|---|---|
 | |
| Virrallizesti | Marin kirjukielen päivy |
| Päivymiäry | 10. talvikuudu |
| Liittyy | enzimäzen marinkielizen kniigan ilmahpiäständäs |
Marin kirjukielen päivy (niittymar. Марий тиште кече) on Mari Elan tazavallan valdivolline pruazniekku. Se pandih alguh vuvvennu 1998. Pruazniekkua pietäh 10. talvikuudu.
Histourii
10. talvikuudu vuvvennu 1775 Piiterin laukkoih tuodih ven. «Сочинения, принадлежащие к грамматике черемисского языка»-kniigu, kudaman piästi ilmah Ven'an tiedoakadiemii. Se oli enzimäine marin kielioppi. Sen luadi Kazanin arhijepiskoppu Veniamin (Pucek-Grigorovič). Sen jälles marilazis, heijän perindölöis da tavois rubei piäzemäh ilmah muudugi kniigua, rodih sežo enzimäzii runotekstoi da sanakniigoin käzikirjutuksii[1][2][3][4].
Enzimäine kniigu marin kielel — "lyhendetty katehiizissu…" nägi päivänvalgien vuvvennu 1804. Se oli omistettu hristianskoin uskon kyzymyksile[1]. Jälles piästih ilmah "Katehiizissu", "Jevangelii"[2][3].
Vuvvennu 1832 pappi A. Al'binskii Pertnuri-kyläspäi luadi marin kirjaimikon, kudaman pohjal myöhembi piästettih ilmah enzimäzet Aberit ven. «Упрощённый способ обучения чтению детей черемисского населения» (erikseh mägi- da niittymarin murdehel)[1][2][3][4].
Vuozisuan XIX lopus — XX vuozisuan allus nähtih päivänvalgien muutgi julgavot marin kielel: Ioann Kedrovan da Gavriil Jakovlevan aberit, Feodor Vasiljevan "Čeremissoin kielioppi" da muut[3]. Kaikkiedah marin kielen mägi-, niitty- da päivännouzumurdehil vuvves 1775 vuodessah 1917 piästettih ilmah enämbi 250 kniigua[2].
Vuvvennu 1907 rubei piäzemäh ilmah joukkoviestimii: marin kielel piästettih ilmah jogavuodine julgavo «Марла календарь» ("Marin kalenduaru"). Sen sivuloile jullattih materjualoi yhteiskunnallizes elokses, vuvvenaijois, kuudamazes da päiväzes, kirjazien kirjutandunevvoloi da toizii suaduloi materjualoi. Julgavo enne kaikkie oli tarkoitettu muanruadajile. Vuvvennu 1913 tämän julgavon ilmahpiäständy loppih[1].
В 1915 rubei piäzemäh ilmah enzimäine lehti marin kielel «Война увер» ("Sodaviestit"). Ga sidägi ei hätkie jullattu — vuodessah 1917[1].
Nygyaigu
Vuvvennu 1990 Kogo marin kerähmö ilmoitti uvven pruazniekan piendäs — Marin kirjukielen päiväs (niittymar. Марий тиште кече), kudai piätettih pidiä 10. talvikuudu[5]. Seiččemen vuvven aigah pruazniekal ei olluh virrallistu stuatussua. Kylmykuul vuvvennu 1998 se hyväksyttih Mari Elan tazavallan piämiehen käskys da sit aijas se on tazavallan valdivollizennu pruazniekannu[1][3].
Marin kirjukielen päiviä leviesti pietäh tazavallas. Sinäpiän pietäh Yhtehisty saneluu «Марла чын возена» (karj. "Kirjutammo marikse oigieh"), tiedo-praktiekallizii konferensieloi da seminuaroi, muasteripajoi, ozutteluloi, vastavuksii, konsertoi[6][7][4].
Huomavukset
- ↑ 1 2 3 4 5 6 Губернова, Н. В. "Бесценный памятник письменности". Республиканская библиотека для слепых (10. talvikuudu 2020). Kačondan päivymiäry: 25. ligakuudu 2024.
- ↑ 1 2 3 4 10 декабря – День марийской письменности. Марийская митрополия (9. talvikuudu 2021). Kačondan päivymiäry: 28. ligakuudu 2024.
- ↑ 1 2 3 4 5 Эльвира Куклина. 10 декабря – День марийской письменности (план, история), Мари Арслан (5 talvikuudu 2022). Kačondan päivymiäry: 25. ligakuudu 2024.
- ↑ 1 2 3 День марийской письменности , Культура.РФ. Kačondan päivymiäry: 25. ligakuudu 2024.
- ↑ 10 Декабря - День марийской письменности. Параньгинская централизованная клубная система (14. talvikuudu 2023). Kačondan päivymiäry: 28. ligakuudu 2024.
- ↑ День марийской письменности. Программа праздника, Кидшер (30 kylmykuudu 2023). Kačondan päivymiäry: 25. ligakuudu 2024.
- ↑ День марийской письменности – истоки и современность | Национальная библиотека имени С.Г. Чавайна Республики Марий Эл (рус.). Национальная библиотека имени С. Г. Чавайна (5. talvikuudu 2022). Kačondan päivymiäry: 25. ligakuudu 2024.