Muailman ruskeipiärahvahien päivy
| Muailman ruskeipiärahvahien päivy | |
|---|---|
 | |
| Tiippu | Ei-virralline pruazniekku |
| Merkičys | yhtistiä ruskeitukkazii rahvahii, opastua heidy ottamah vastah omua iččie da eliä hengellizes sovus oman ičenke |
| Pandih alguh | vuvvennu 2005 |
| Pietäh | ymbäri muailmua |
| Päivymiäry | 26. oraskuudu |
| Liittyy | tukkien ruskieh värih |
Muailman ruskeipiärahvahien päivy (ven. Всеми́рный день ры́жих, angl. World Redhead Day) on ei-virralline kanzoinväline pruazniekku, kudai on omistettu ruskeitukkazile rahvahile. Sidä joga vuottu pietäh oraskuun 26. päivänny.
Ilmestymizen versiet
On olemas se-toine versii pruazniekan ilmestymizen alguperäs. Yhten mugah muailman ruskeipiärahvahien päivän keksittih sizärekset, nengaleiten hyö tahtottih avvuttua ruskeipiärahvahile ottamah vastah da suvaiččemah iččie, arvostamah omua ulgonägyö da eliä hengellizes sovus oman ičenke[1].
Tostu versiedu myö gollandielaine taidoilii Bart Rovenhorst ečči omah projektah Bred-linnas ruskeitukkastu mallii. Häi vuotti, gu hänellyö tulou ei enämbiä kymmendy mallii, ga mualuajan ruadopajah tuli 150 tyttyö. Valličendah kerävynnyöt muga miellyttih täh vastavukseh, ga kai piätettih pidiä tämänmostu piduo joga vuottu[2].
On olemas kolmas versiigi, sen mugah tädä pruazniekkua ruvettih pidämäh vuozien 1980 allus amierikkalazen Stiven Duglasan kehoitukses, kudai perusti Kanzoinvälizen ruskeipiärahvahien liiton[3].
Enzimästy kerdua ruskeipiärahvahile omistettu linnupruazniekku piettih vuvvennu 2005 Astenan linnas Hollandies. Myöhembi täs tapahtumas rodih kanzoinväline tapahtumu. Ruskeipiärahvahien päiviä enimiten levieh pietäh Irlandies, Šotlandies, Yhtistynnyzis Kuningaskunnis. Nämmis mualois 13 prosental eläjis ollah luonnollizet ruskiet tukat. Pruazniekkupäiviä pietähgi Alangomualois, Amierikan Yhtysvallois da Ven'al[4].
Päivän tapahtumat
Muailman ruskeipiärahvahien päivänny järjestetäh kaikenmostu pruazniekkutapahtumua äijis mualois ymbäri muailmua. Pietäh festivualiloi, ilonpidoloi luonnol, temuattizii illaččuloi, tansifleš-moboi, kižoi, tiedokilboi, kilbailuloi, fotokuvuamizii, fil’moin ulgokačondoi, käziruadoloin, pričoskan da makijuažan luajindan muasteriopastuksii[1]. Äijät kluubat, buarat da restoruanat laskietah ruskeittukkazii sydämeh maksottah da taritah heile ilmastu juomistu da gostitandusyömisty.
Illinois-štuatan Haivud-linnas oraskuun 26. päivänny pietäh jogavuodehistu Ruskeipiärahvahien päivy -festivualii, kudamah tullah ruskeitukkazet rahvas Amierikan Yhtysvaldoin kaikis čuppuloispäi.
Mugaže sinäpiän školis, koulledžois, jougoaigulaitoksis da lapsien päivykodilois pietäh paginoi da luvendoloi, kudamien tehtävii on tugie lapsii da keskenkazvuzii, ket vastavuttih negatiivizeh ilgivallanpidämizeh da nagramizeh[5].
Ven'al kirjastoloin ruadajat valmistetah uvvet kniiguozuttelut, kudamis ezil ollah kniigat ruskeipiähengilöinke. Niilöin keskes ollah V. P. Krapivinan ven. "Оранжевый портрет с крапинками", N. J. Abgar’anan "Man'un'a", Artur Konan Doilan ven. "Союз рыжих", Astrid Lindgrenan "Peppi Pitkysukku", Džoan Roulingan romuanusarju Garri Potteras, Džin Uebsteran ven. "Длинноногий дядюшка" da toizet[6].
Tämänmoizet pruazniekat
On mondu ruskeipiärahvahile omistettuu pruazniekkua: Ruskeipiärahvahien ukkavopäivy (12. pakkaskuudu), Kanzoinväline ruskeipiärahvahien päivy (6. syvyskuudu), Kanzalline ruskeipiärahvahien päivy Amierikan Yhtysvallois (5. kylmykuudu).
Eri mualois järjestetäh "ruskieloi festivualiloi": angl. "Redhead Days" (sidä pietäh elokuun loppupuolel Tilburg-linnas, Alangomuat)[7], "Ruskei festivuali" (sidä joga vuottu pietäh Iževskas vuvves 2003 lähtijen), angl. "Irish Redhead Convention" (sidä pietäh Irlandien Krosheiven-kyläs elokuun loppupuolel)[8].
Huomavukset
- ↑ 1 2 Ефремова, О. День рыжих 2025: история и традиции праздника. Комсомольская правда (2025). Kačondan päivymiäry: 5. kylmykuudu 2025.
- ↑ День рыжих. Российская государственная библиотека для слепых (6. syvyskuudu 2023). Kačondan päivymiäry: 5. kylmykuudu 2025.}
- ↑ Бурдина, А. Уникальная красота: почему рыжеволосые люди заслуживают отдельного праздника. Учительская газета (2023). Kačondan päivymiäry: 5. kylmykuudu 2025.}
- ↑ Необычные праздники – Всемирный день рыжих. Информационно-аналитический портал "За Новомосковск" (26. oraskuudu 2023). Kačondan päivymiäry: 5. kylmykuudu 2025.}
- ↑ Корякина, А. День рыжих в 2025 году: яркий праздник со смыслом. Vfokuse.mail.ru (29. elokuudu 2024). Kačondan päivymiäry: 5. kylmykuudu 2025.}
- ↑ Рыжая команда: 12 книг с незабываемыми рыжеволосыми персонажами. LiveLib (6. syvyskuudu 2024). Kačondan päivymiäry: 5. kylmykuudu 2025.}
- ↑ 5000 рыжих людей собрались в Нидерландах ради необычного фестиваля. РБК LIfe (29. elokuudu 2023). Kačondan päivymiäry: 5. kylmykuudu 2025.}
- ↑ Irish Redhead Convention – in pictures. The Guardian News (21. elokuudu 2016). Kačondan päivymiäry: 5. kylmykuudu 2025.}