Nina Grebeškova

On otettu Рувики-späi
Tarkastettu kirjutus
Нина Гребешкова
Nedežda Ivanovna Gorbunkovan roulis. Brilliantovaja ruka -fil'man kadru (1968)
Nedežda Ivanovna Gorbunkovan roulis. Brilliantovaja ruka -fil'man kadru (1968)
Roindunimi Nina Pavlovna Grebeškova
Roindupäivy 29. kylmykuudu 1930(1930-11-29)[1][2] (93 vuottu)
Roindupaikku Moskovu, Ven'an federatiivine socialistine nevvostotazavaldu, Nevvostoliitto
Kanzalližus  Nevvostoliitto
 Ven'anmua
Ammatti

ozuttelii ozuttelijatar ozuttelijatar ozuttelijatar

ozuttelijatar
Karjieru 1950 — nygyaigu.
Palkindot Заслуженный артист Российской Федерации — 2001
IMDb ID 0337380
Nimikirjutus Изображение автографа
Логотип РУВИКИ.Медиа Медиафайлы на РУВИКИ.Медиа

Nina Pavlovna Grebeškova (roinnuhes 29. kylmykuudu 1930, Moskovu, Ven'an federatiivine socialistine nevvostotazavaldu, Nevvostoliitto) on Nevvostoliiton da Ven'an akt'ouru, kudamua kaččojat enne kaikkie tundietah roulilois Nevvostoliiton aigah kuvattulois kinokomiedielois, moizis kui ven. «Кавказская пленница, или Новые приключения Шурика», ven. Бриллиантовая рука, ven. 12 стульев», ven. «Иван Васильевич меняет профессию», ven. «Не может быть!», ven. «За спичками», ven. «Спортлото-82»], ven. «Частный детектив, или Операция «Кооперация» da toizis[3][4].

On Ven'an Federacien arvostettu artistu (2001)[3].

Kuuluu Ven'an Federacien kinonluadijoin liittoh[5].

On kino-ohjuajan, käzikirjutuksien kirjuttajan, akt'ouran, Nevvostoliiton rahvahan artistan Leonid Gaidain leski[3].

Eloskerdu

Nina Pavlovna Grebeškova on roinnuhes 29. kylmykuudu vuvvennu 1930 Moskovas. Hänen tuattah Pavel Aleksandrovič Grebeškov oli mualuajannu; ruadajes hänel erinomah puutui mualata ornuamentu. Nina Pavlovnan muamah Jekaterina Ivanovna Grebeškova ruadoi ombelijannu, sovanombelijannu. Ninal oli kaksi vellie — Nikolai da Valentin[6].

Konzu Nina loppi keskiškolan toizen kluasan, algavui Suuri Ižänmualline voinu. Tuattah Pavel Aleksandrovič lähti frontale puolistamah ižänmuadu, muamah Jekaterina Ivanovna ajoi Ninan da hänen vellienke evakkoh Penzan alovehele[6][7].

Nina Pavlovnal ollah lämmät mustelut školavuozis. Penzan alovehen Surmino-kylän školas, kunne Nina lähti opastumah kolmandeh kluassah, opastajinnu oldih Frunzen akadiemien opastajat. Opastus toi hyviä mieldy, innostutti huaveh roita opastajakse. Häi suvaičči olla lapsienke. Akt'ouran ammatis Nina ni duumainnuh ei, Kogo Ven'an kinonluajinduinstituutas (ven. Всероссийский государственный институт кинематографии) häi ei ni tiedänyh[4][6][7].

Voinan loppiettuu Nina Pavlovnan pereh tuli järilleh Moskovah. Tyttöine jatkoi opastundan keskiškolas. Hänenke yhtes opastui runoilijan Vladimir Lugovskoin tytär Maša. Jälgimäzes kluasas Maša kučui Ninua omale roindupäiväle. Sih tulluzile kluassudovarišoile Nina lugi runoloi da saneli erilazii histourieloi. Roindupäivyniekan tuattah kiinnostui Ninan ezitysneroh da kehoitti pedagouguinstituutan sijah oppie omii vägilöi ozuttelijan alal. Runoilii suostutti neidisty yhtes Mašanke piäzemäh Kogo Ven'an S. A. Gerasimovan nimizeh kinonluajinduinstituuttah. Varmuttu Ninan instituuttah piäzendäs ei olluh: kilbu oli suuri, enämbi 100 hengie pyrgivyi yhtele sijale. Yhtelläh vessel da avvonaine neidine enzikerras piäzi opastumah instituuttah, händy otettih Sergei Gerasimovan kursale[6][8].

Vuvvennu 1954 Nina Grebeškova loppi Kogo Ven'an kinonluajinduinstituutan (sih aigah Kogo Nevvostoliiton) (Vladimir Belokurovan ruadopaja)[9].

Kinos rubei ezittymäh vie instituutas opastujes, enzimäine rouli oli ven. «Смелые люди» -fil'mas (1950). Sidä roulii Nina kebjieh ozutti – häi oli hoiskiennu da ei korgiennu kazvol. Jälles Nina äijän kerdua ozutti keskenkazvuhizii, školaniekkoi, pionieroi. Sit hänel oldih nuorien muamoloin da opastajien roulit[7][8].

Kučču Leninguadaspäi ven. «Честь товарища» -fil'man kuvavuksih tuli, konzu Nina oli kolmanden vuozikursan opastujannu. Hänel oli Gal'a Bogačovan rouli. Tämän fil'man jälles kehoitukset kuvavuksih ei loppevuttu[6][8].

Vuvvennu 1954 ven. «Испытание верности» -fil'man kuvavuksih ozuttelijan kučui iče Ivan Pirjev, kudamanke ruadua oli suuri lykky, semmite nuoreh ozuttelijah nähte[6][8].

Vuozinnu 1954-1990 Nina Pavlovna oli Kinoakt'ouran teatrustuudien ozuttelijannu[4][6][8][10].

Enimyölleh tundietunnu Nina Grebeškova on roulilois ohjuajien Leonid Gaidain da Georgii Danelijan fil'mois[4][6][8].

Nina Grebeškovan lähimäzenny ystävänny oli Tatjana Nikulina, kudamanke yhtes opastuttih školas[11].

Ozuttelijan tundiettuvimii rouliloi ollah psihiatrizen bol'ničan liäkäri fil'mas ven. «Кавказская пленница, или Новые приключения Шурика» (1966), Nadežda Ivanovna Gorbunkova (Sem'on Sem'onovič Gorbunkovan akkah — ven. «Бриллиантовая рука» piäroulis olijan akkah) (1968), Musik da tsuaritar Tamara ven. «12 стульев» -fil'mas (1971), Anna Gorbuškina ven. «Не может быть!» -fil'man enzimäzes novellas (1975), Klava-t'outa ven. «Спортлото-82»-fil'mas (1982) da toizet. Nina Grebeškovan ozutetut roulit fil'mois ven. «Бриллиантовая рука» da ven. «Не может быть!» ijäkse kirjutettih hänen nimen kinonluajindan histourieh. Grebeškoval oldih roulit läs kaikis Gaidain merkittävis fil'mois paiči ven. «Иван Васильевич меняет профессию» -fil'mua[4][6][7][8].

Nina Pavlovnan da hänen ukon Leonid Gaidain jälgimäzenny yhtehizenny ruavonnu oli kinokomiedii «ven. На Дерибасовской хорошая погода, или На Брайтон-Бич опять идут дожди», kudamua enzikerdua ozutettih vuvvennu 1992, sit fil'mas ozuttelijua ozutettih vaiku epizoudas da fil'man titrois hänen nimie ei ole[8].

Oman 90-vuozipäivän vuvvennu Nina Grebeškova ezityi druamuseriualas ven. «Содержанки-2». Sit fil'mas hänel oli vahnan laučal istujan naizen rouli[8].

90-vuozipäivänke vuvvennu 2020 Nina Pavlovnua hyvitteli Ven'an piämies Vladimir Putin. Kremlin virrallizel verkosivustol jullatus telegrammas pandih merkile ozuttelijan monipuoline nero, kudai avvutti luadie kinonluajindan alal "ylen hyvän mielenkiinittäjien da monipuolizien ruadoloin gallerein", sežo "opastukselline ruado da oma panos kuulužan kino-ohjuajan da käzikirjutuksien kirjuttajan Leonid Gaidain muston da omaperäzen tuotandon säilyttämizekse"[12].

Oman luomisruavon aigah ozuttelii on ezitännyh enämbän 80 roulii fil'mois[4][5].

Kuuluu Ven'an Federacien kinonluadijoin liittoh[5].

Pereh[13][14]

  • Ukkoh — Leonid Gaidai (1923—1993), ohjuaju, käzikirjutuksien kirjuttai, akt'ouru; Nevvostoliiton rahvahan artistu (1989). Yhtes elettih 40 vuottu[7].
    • Tytär — Oksana Leonidovna Gaidai (Hud'akova) (roinnuhes vuvvennu 1958), ekonomistu[5].
      • Vunukku — Ol'ga Hud'akova, ekonomistu, ruadau bankas, rodivui Maluazies[15]. Pienenny tyttäzenny Ol'ga otti ozua kuvavuksih leonid Gaidan fil'mas ven. «Частный детектив, или операция «Кооперация»»[16].

Luomisruado

Fil'mogruafii

  • 1950 — ven. Смелые люди — školan loppenuh
  • 1951 — ven. Спортивная честь — Ton'an ystävätär
  • 1953 — ven. Честь товарища — Gal'a Bogačova
  • 1954 — ven. Испытание верности — Var'a Lutonina
  • 1956 — ven. Беспокойная весна — Raja
  • 1957 — ven. Звёздный мальчик — Hallonhalguajan tytär
  • 1957 — ven. Ботагоз (Казахфильм) — Liza
  • 1959 — ven. Девочка ищет отца — Praskovjan vunukku
  • 1959 — ven. Муму — Tatjana
  • 1960 — ven. Нормандия — Неман
  • 1960 — ven. Трижды воскресший — Zoja
  • 1961 — ven. Жизнь сначала — Kat'a, Viktoran andilas
  • 1961 — ven. В пути — matkustai brihačunke
  • 1961 — ven. Чужой бумажник (короткометражный) — pionieruvožuatoi
  • 1961 — ven. Музыка Верди (короткометражный) — portan johtokunnan ruadai (epizoudu, ei ole titrois)
  • 1962 — ven. Остров Ольховый — Jelena
  • 1963 — ven. Слепая птица — suattai
  • 1964 — ven. Приключения Толи Клюквина — Slava Ogon'kovan muamah
  • 1964 — ven. Сказка о потерянном времени — opastai
  • 1965 — ven. Чёрный бизнес — harjukangaskombinuatan ruadai, "komsomoluprožektorah" kuului
  • 1966 — ven. Кавказская пленница, или Новые приключения Шурика — psihiatrizen bol'ničan liäkäri
  • 1968 — ven. Бриллиантовая рука — Nadežda Ivanovna Gorbunkova, Sem'on Sem'onovič Gorbunkovan akkah
  • 1968 — ven. Пробуждение — Alkan muamah
  • 1968 — ven. Доживём до понедельника — Alločka, telefonas paista suvaiččii
  • 1971 — ven. 12 стульев — Musik / Tsuaritar Tamara
  • 1975 — ven. Не может быть! — Anna, Gorbuškinan akkah
  • 1975 — ven. Шире шаг, маэстро! — Anna Afanasjevna, kyläbol'ničan piäliäkäri
  • |1976 — ven. Дни хирурга Мишкина — voimattomanhoidai Nataša
  • 1977 — ven. Гармония — Larisa Pavlovna Baranova, konstruktorub'uron johtajan sijahine
  • 1978 — ven. Живите в радости — sekretari Kuman'kova
  • 1978 — ven. Расмус-бродяга — fru Nil'son
  • 1980 — ven. За спичками — Hyvärizen akkah
  • 1982 — ven. Слёзы капали — Galkina
  • 1982 — ven. Спортлото-82 — Klavdija Antonovna, Kost'a Lukovan t'outa
  • 1984 — ven. Любочка — Emma Matvejevna, päivykoin johtai
  • 1984 — ven. Предел возможного — Ol'ga Ivanovna, päivykoin johtai
  • 1984 — ven. Неизвестный солдат — Agapovan tytär, Slaviekan muamah
  • 1985 — ven. Дайте нам мужчин! — Nina Pavlovna, školan johtai
  • 1985 — ven. Опасно для жизни! — Zinaida Petrovna Stepanova
  • 1988 — ven. Француз — opastai
  • 1988 — ven. Это было прошлым летом — liäkäri
  • 1989} — ven. Частный детектив, или Операция «Кооперация» — Anna Petrovna Puhova, Jelenan muamah
  • 1990 — ven. Овраги — Doganovskaja
  • 1992 — ven. На Дерибасовской хорошая погода или На Брайтон-Бич опять идут дожди — siiričiastui Braiton-Bičal (epizoudu, nimie titrois ei ole)
  • 1993 — ven. Настя — okrugan prefektan sekretari
  • 1995 — ven. Орёл и решка — bintal kiäritty naine
  • 1998 — ven. Дар божий
  • 1999 — ven. Поклонник — valehbuabo
  • 2001 — ven. Нина — Ninan muamah
  • 2001 — ven. Сыщики — Lidija Viktorovna, susiedu
  • 2002 — ven. Лавина — muamo
  • 2002 — ven. Каменская-2 — Kamenskoin susiedu paluatas
  • 2002 — ven. Железнодорожный романс — Veran buabah
  • 2002 — ven. Медики — Inessa Andrejevna
  • 2004 — ven. Виола Тараканова. В мире преступных страстей — Leonovan susiedu
  • 2005 — ven. Странствия и невероятные приключения одной любви — Veran susiedu
  • 2005 — ven. Звезда эпохи — Jevdokija Dmitrijevna Turčaninova
  • 2006 — ven. Сыщики-5 — susiedu
  • 2006 — ven. Первый дома — Nadežda Ivanovna Gurbunkova
  • 2007 — ven. Фото моей девушки — Tan'a-t'outa, Saša-diädän akkah
  • 2008 — ven. Агентство «Мечта» — Jevdokija Il'jinična, Kat'an omahine
  • 2008 — ven. Победитель — Kira Mihailovna, Sem'onovan školaopastai
  • 2009 — ven. Фонограмма страсти — Adaman susiedu
  • 2013 — ven. Легенда № 17 — Saša-buabo, Iran susiedu
  • 2016 — ven. Экипаж — biznes-kluasan matkustai
  • 2020 — ven. Содержанки-2 — buabo laučal piäveriällyö (epizoudu, 8. seerii)

Iänittämine

  • 1953 — ven. Граф Монте-Кристо — Gaide' (Kristina Grada)
  • 1963 — ven. Приключения Питкина в больнице — sizär Heskel (Džanet Stark)
  • 1963 — ven. Морской кот — Livija Grigor'an (Leopol'dina Belenuce)
  • 1964 — ven. Золотой гусь — Grett (Renate Usko)
  • 1965 — ven. Верная Рука — indeicoin ystävy — Džudit (Leticija Roman)
  • 1969 — ven. Белые волки — Ketrin Emerson (Barbara Bril'ska)
  • 1972 — ven. Анатомия любви — Jeva (Barbara Bril'ska)
  • 1990 — ven. Николай Угодник и охотники — Agafon-mečästäjän akku nimie titrois ei ole

Palkindot

  • Ven'an Federacien arvostettu artistu (2001) — arvoruadolois taidoalal[10][17]

Dokumentufil'mat da TV-ohjelmat

  • ven. «„Больше, чем любовь“. Леонид Гайдай и Нина Гребешкова» (Kul'tura-kanualu, 2013)[18]
  • ven. «Нина Гребешкова. „Я без тебя пропаду“» (Enzimäine kanualu, 2016)[19][20]

Huomavukset

  1. ↑ Internet Movie Database (англ.) — 1990.
  2. ↑ Nina Grebeškova // Česko-Slovenská filmová databáze (чеш.) — 2001.
  3. ↑ 3,0 3,1 3,2 Гребешкова Нина Павловна. kino-teatr.ru (2. kezäkuudu 2023). Kačondan päivymiäry: 31. elokuudu 2023.
  4. ↑ 4,0 4,1 4,2 4,3 4,4 4,5 Нина Гребешкова. Вокруг ТВ. Kačondan päivymiäry: 31. elokuudu 2023.
  5. ↑ 5,0 5,1 5,2 5,3 Гребешкова Нина Павловна. tass.ru. ТАСС. Kačondan päivymiäry: 31. elokuudu 2023.
  6. ↑ 6,0 6,1 6,2 6,3 6,4 6,5 6,6 6,7 6,8 Нина Павловна Гребешкова. Узнай Всё (biographe.ru). Kačondan päivymiäry: 31. elokuudu 2023.
  7. ↑ 7,0 7,1 7,2 7,3 7,4 Власова Александра. В браке с гением: изменял ли Гайдай Нине Гребешковой? www.starhit.ru (29. kylmykuudu 2019). Kačondan päivymiäry: 31. elokuudu 2023. Arhiviiruittu 15. oraskuudu 2021
  8. ↑ 8,0 8,1 8,2 8,3 8,4 8,5 8,6 8,7 8,8 Татьяна Уланова. «Гайдай любил „Да бэ че до!“. Семейные тайны Нины Гребешковой. Аргументы и факты (29. kylmykuudu 2020). Kačondan päivymiäry: 31. elokuudu 2023.
  9. ↑ Гребешкова Нина Павловна (ТАСС).
  10. ↑ 10,0 10,1 Биография Нины Гребешковой. РИА Новости (29. kylmykuudu 2020). Kačondan päivymiäry: 31. elokuudu 2023.
  11. ↑ Велигжанина Анна. Нина Гребешкова: Многие думали, что я жена Никулина, а с Гайдаем ему изменяю. www.kp.ru. Комсомольская правда (29. kylmykuudu 2015). Kačondan päivymiäry: 5. kezäkuudu 2022. Arhiviiruittu 5. kezäkuudu 2022
  12. ↑ Нине Гребешковой, заслуженной артистке России. kremlin.ru (29. kylmykuudu 2020). Kačondan päivymiäry: 31. elokuudu 2023.
  13. ↑ Нина Гребешкова: «Меня упрекали, что ради Никулина я бросила Гайдая». www.segodnya.ua. Сегодня (26. kylmykuudu 2010). Kačondan päivymiäry: 31. elokuudu 2023. Arhiviiruittu 25. tuhukuudu 2022
  14. ↑ Нина Гребешкова, Оксана Гайдай, Ольга Худякова. Фрагмент телепередачи «Доброе утро». www.1tv.ru. Первый канал]] (30. pakkaskuudu 2013). Kačondan päivymiäry: 31. elokuudu 2023. Arhiviiruittu 20. sulakuudu 2022
  15. ↑ Смелова Ирина. Нина Гребешкова: Я была против брака дочери. sobesednik.ru. Собеседник (11. kylmykuudu 2010). Kačondan päivymiäry: 31. elokuudu 2023. Arhiviiruittu 4. kylmykuudu 2016
  16. ↑ Виктория Кудаева. Вы ахнете! Посмотрите, как выглядит единственная внучка Леонида Гайдая и кем она стала. irk.kp.ru (23. ligakuudu 2022). Kačondan päivymiäry: 31. elokuudu 2023.
  17. ↑ Указ Президента Российской Федерации от 21.11.2001 г. № 1338 «О награждении государственными наградами Российской Федерации». www.kremlin.ru. Официальный сайт Кремля (21. kylmykuudu 2001). Kačondan päivymiäry: 31. elokuudu 2023. Arhiviiruittu 17. ligakuudu 2020
  18. ↑ «Больше, чем любовь. Леонид Гайдай и Нина Гребешкова». Телепередача. smotrim.ru. Культура (2013). Kačondan päivymiäry: 31. elokuudu 2023. Arhiviiruittu 4. kylmykuudu 2022
  19. ↑ «Нина Гребешкова. Я без тебя пропаду». Документальный фильм. www.1tv.com. Первый канал (2016). Kačondan päivymiäry: 31. elokuudu 2023. Arhiviiruittu 4. syvyskuudu 2021
  20. ↑ «Нина Гребешкова. Я без тебя пропаду». Документальный фильм. www.1tv.ru. Первый канал (23. pakkaskuudu 2016). Kačondan päivymiäry: 31. elokuudu 2023. Arhiviiruittu 21. pakkaskuudu 2021

Linkat

Lähteh - "https://olo.ruwiki.ru/w/index.php?title=Nina_Grebeškova&oldid=126124314"