Sroičan časounu (Kemi)
| Nähtävys | |
| Sroičan časounu | |
|---|---|
 | |
| 64°56′49″ с. ш. 34°37′01″ в. д.GЯO | |
| Mua |
 Ven'anmua |
| Sijoittumine | Kemi |
| Jeparhii | Karjalan jeparhii |
| Prihodoin joukko | Kemin prihodoin joukko |
| Perustandan päivymiäry | 1710 |
| Stuatussu |
 ОКН № 1010012002 |
 |
|
 Медиафайлы на РУВИКИ.Медиа | |
|
Ven'an Federacien kanzoin |
Sroičan časounu (ven. Часо́вня Тро́ицы Живоначáльной) on pravosluavine salvettu puuhine časounu Karjalan tazavallan Kemin linnan histouriellizes keskukses, smietitäh, ku se on nostettu vuvvennu 1710 yhtes Uspen’n’an kirikönke, kudaman alovehel on časounu. On puuhizen arhitektuuran mustomerkinny, sil on federuallizen merkičyksen kul’tuuruperindön objektan stuatussu.
Histourii
Vuvvennu 1710 Kemis oli suuri tulipalo, kudaman aigah paloi Uspen’n’an kirikkö. Vikse samannu vuon kirikön alovehele nostettih Sroičan časounu[1]. Vuozinnu 1711—1714 vahnah kohtah nostettih uuzi Uspen’n’an kirikkö[2].
Vuozinnu 1950 Vladimir Krohinan johtol piettih časounan ei-tävvelline restuaracii[1].
4. talvikuudu vuvvennu 1974 Ven’an federatiivizen socialistizen nevvostotazavallan Ministroin Nevvoston azetukses časounu sanottih arhitektuuran mustomerkikse da se rubei kuulumah tazavaldalazen merkičyksen Ven’an kul’tuuruperindön objektoih[3]. Vuvven 1980 mennes časounua vouse ei käytetty[4], a vuvvennu 1988 sidä käytettih matkailu- da ekskursieloin tarkoituksis[5].
Kezäl vuvvennu 2022 loppiettih časounan restauracii, kudai luajittih Kul’tuuran kehitys -valdivollizen programman hantuzis. Časounan restauracieh ottavui Ivanovon laitos ven. ООО «Лидер-Строй», kudai aijembah oli Veškelyksen časounan restauracien ruadolois. Tämän ruavon hantuzis vaihtettih levo, uvvessah nostettih salvos da kohendettih časounan kupolu; sego histouriellizien lähtehien mugah suadih endizeh kundoh ikkunlaudaine ikkunan piäl pohjazes oččuseinäs[6].
Kuvailu
Sroičan časounu on Vicupan uuličal Kemin linnas, Leppäsuaren päivänlaskun čuras — linnan histouriellizes keskukses[7][8]. Se on Uspen'n'an kirikön alovehen päivänlaskučupus[9], muvvostau senke yhtehizen kogomuksen[10] da kuuluu sen vardoittavah kogomukseh[4]. Časounu on kebjei nellikkömuodoine salvos 3,7×3,73 m kupolanke[10]. Salvos on luajittu pedäjäs vierinkivialustale. Päivänlaskučuras on veräi. Veriän yläpuolel on ikkun, toine on pohjazes seinäs. Salvoksen piäs on kaksitazoine nellipuoline kupolu, kudaman alapuoli[к. 1] on bruussualustal da sen agjat ollah lyhendettylöin pystökangin muodozet. Kupolu on piälystetty huabulastuzil da sen piäs on ristu[11].
Časounan lattiet on luajittu levielöis puuhizis lavvois, lagi on luajittu lyhendetyn piramiidan muodozekse. Časounan sydämes seizou kaksi uuhistu ristua: yksi on azetettu lattieh päivännouzuseinän luo, toine — suviseinän luo. Ristan korgevus päivännouzuseinän luo on kolme metrii, se on čomendettu vestettylöil kirjutuksil, tekstan ezipuolele perindöllizen kirjutandutavan ližäkse kirjutuksii on bokkupuolisgi ylähänpäi alah. Ristan keskipuolel on leikattu[11] goreljefunuagliččemine[10], kudai on mualattu hibjanvärizeh ohrah, sit ymbäri on leikattuloi kazvikirjoi: toizen toizeh sivottuloi varziloi, lehtilöi, kukkii da puunandimii, kehysty on reunustettu mustal da muzavanruskiel junol. Ristu suviseinän luo on hoikembi, sen bruusan suurus on 0,2 metrii, da se, päivännouzun ristah verratunnu, on kirjoittah; on čomendettu vaiku vestettylöil kirjutuksil[11].
Časounu kuuluu Uspen’n’an kirikön prihodah da Ven’an pravosluavizen kirikön Karjalan mitropoulien Kostamuksen jeparhien Kemin prihodoin joukkoh[7].
Huomavukset
Kommentuariet
- ↑ Полица — пологая нижняя часть шатровой или двускатной кровли, предназначенная для отвода дождевой воды.
Lähtehet
- ↑ 1 2 Вахрамеев, 1988, VI. Исторические сведения, с. 2.
- ↑ Хёглунд, 1980, VI. Исторические сведения, с. 2.
- ↑ Постановление о дополнении и частичном изменении постановления Совета Министров РСФСР от 30 августа 1960 года № 1327 «О дальнейшем улучшении дела охраны памятников культуры в РСФСР» № 624 / Совет Министров РСФСР. — 1974. — 4 talvikuudu.
- ↑ 1 2 Хёглунд, 1980, X. Система охраны, с. 4.
- ↑ Вахрамеев, 1988, X. Система охраны, с. 4.
- ↑ В Кеми отреставрировали часовню Успенского собора, Республика (29 kezäkuudu 2022). Kačondan päivymiäry: 8. elokuudu 2025.
- ↑ 1 2 Кемь. Часовня Троицы Живоначальной. Соборы.ру. Kačondan päivymiäry: 8. elokuudu 2025.
- ↑ Часовня Троицы Живоначальной. Яндекс.Карты. Kačondan päivymiäry: 8. elokuudu 2025.
- ↑ Бокарёв А. Часовня у собора Успения Пресвятой Богородицы в Кеми. Храмы России (15. pakkaskuudu 2015). Kačondan päivymiäry: 8. elokuudu 2025.
- ↑ 1 2 3 Вахрамеев, 1988, VII. Описание памятника, с. 3.
- ↑ 1 2 3 Хёглунд, 1980, VII. Описание памятника, с. 3.
Kirjalližus
- Хёглунд В. Ф. Паспорт объекта / Главное управление охраны, реставрации и использования памятников Министерства культуры РСФСР. — 1980. — 12 декабря.
- Вахрамеев Е. В. Паспорт объекта / Главное управление охраны, реставрации и использования памятников Министерства культуры РСФСР. — 1988. — 20 мая.