Tijazen päivy
| Tijazen päivy | |
|---|---|
 | |
| Tiippu | Ekolougine |
| Merkičys | talvekse Ven'an alovehil jiännyzien linduloin suojelemine |
| Pietäh | Ven'al |
| Päivymiäry | 12. kylmykuudu |
Tijazen päivy (ven. Сини́чкин день) on ekolougine prauzniekku, sen tarkoituksennu on suojella linduloi, kuduat jiädin viettämäh talvie Ven'an alovehil. Sidä joga vuottu pietäh kylmykuun 12. päivänny.
Histourii
Pruazniekku perustettih vuozien 2000 allus Ven'an linduloin suojeluliiton ehotukses niilöin linduloin suojeltavakse, kuduat jiädih viettämäh talvie Ven’an alovehil — tijazet, tiglit, ruskeirindazet, käbylinnut, puudujuoksijat, tilhit, närhit da muut. Ven’al linduloin päiviä piettih Pyhien muokkuanähnyölöin Zinovijan da Zinovien, linduloin puolistajien, päivänny, tädä päiviä sežo piettih mečästäjien da kalastajien talven mecästys- da kalastuskavven avuandan pruazniekannu[1]. Tijaine on ylen tärgei lindu ven’alazes kul’tuuras — sen kirkahan keldastu da taivahankarvastu höyhenpeitetty pietäh talven tunnusmerkinny, а iččie tijastu slavjuanat počitoittih da piettih Jumalan linnunnu. Pyhän Zinovien päivänny Ven’al oli tavannu viettiä aigua lunnonhelmas da kaččuo linduloin ičenviendiä: ezimerkikse, tijazien parvet kodiloin lähäl ennustetah viluloin lähästy tulendua; linnut äijäl da lukettajen pajatetah — sit talvi rodieu selgei da päivypastoloinke; linnut kerävytäh syötinlaudazilluo — sit talvel rubieu tuhumah da lundu panemah[2].Uskottihgi, gu juuri täl päiväl, 12. kylmykuudu, talvekse jiännyöt linnut tullah mečispäi lähembi kylii da linnoi. Sinäpiän oli tavannu kohendella da riputella syötinlaudazii. Uskottih, tijaine tuou kodih ozua da hyväntahtožuttu, puuloih, syötinlaudazien rinnale, linduloin muaniteltavakse siveltih nuorazii suolattomien špiikkupalazienke.
Kuvailu
.jpg)
Pruazniekan hantuzis ammattimiehet kiinitetäh suurdu huomavuo ekolougizih maltoloih: puaksuh, tahtojen avvuttua linduloi, vahnembat da lapset jätelläh syötinlaudazile keitettyy pudruo, droždeileibiä, mageipastostu, lihasosiskua. Moine syömine on ebätervehelline linduloile, niis voibi roija kaikenualastu voimattomuttu, surmassahgi. Suolazet da vahnaksetulluzet syömizet ollah sežo linduloile syömizih pädemättömät, syötettäväkse jyrkäh kielletyt. Ammatimiehet ehoitetah syöttämäh linduloi kagruheinän siemenil, brosal, ozral, kagral, päiväzenkukan suolattomil da kuivattomil siemenil[3]. Linnut suvaijah mindal’ua, muaoriehua, gretsienpuunoriehua (tuorehinnu, ilmai keittämisty, pastamistu da suoluamistu)[4].
Jelena Kaškarova, Tuliedu aigua rakendajen -perehprojektan johtai[4]:
Yksi enzimäzis askelis, kuduat avvutetah lapsile ellendämäh luonnonvaroin suojelendan targevytty, on lujendua heijän yhtevytty luondoh. Sih niškoi voibi puaksumbah taluo lapsii meččäh kaččomah mečän eläjien elaigua da taboi eri vuvvenaijoil, tutkie kazviloi, böbökköi, meččyelättilöi da linduloi, а talvil — syötellä linduloi, kudamil viluloin aigua pidäy olla ristikanzan abu.
Pruazniekan perindöt
Uskotah, gu Tijazen päiväs alguau kylmän kavven lähtölaskendu. Ven'al pyhien Zinovijan da Zinovien počitoindupäivänny piettih mecästäjien da kalastajien päiviä. Gu mečästäi sinäpiän pyydänöy hoš yhten jänöin, sit tulienvuon rubieu puaksuh puuttumah mečästyssualehtu (jänöi oli pruazniekkustolan piäsyömine). Kalastajat kerävyttih pruazniekkustolan tuakse, kudamale nostettih keitetyt kalasualehet. Rahvas uskoi, midä bohatembi on stola da iänekkähämbät stolapaginat, sidä enämbi dengua rodieu perehes. Ven’al pruazniekku simvoliziiruičči luonnon da ristikanzan yhtevytty, da kiinitti huomavuo linduloin suojelemizeh, kudamil on jygei kestiä vilut aijat[5].
Tijazen päivän kiellot Ven'al:
- sinäpiän ei suannuh abevoija linduloi, ei suannuh niidy ajua iäre; ei suannuh iškie lihakse kodilinduloi;
- ei suannuh naija;
- ei suannuh tartuo uuzih suurih ruadoloih;
- ei suannuh löyhkiä ostoksil, sanella hyvii uudizii;
- ei suannuh lahjoittua jallaččii da sukkii;
- ei suannuh čakkaillakseh da riijellä;
- ei sunnuh olla andamattah suolua velgah kyzyjöile;
- ei suannuh lykkie syöndyveros jiännytty syömisty, net pidi andua linduloile[6];
- sinäpiän ei kehoiteta kylyh kävyndiä[7].
Nugözel aijal pruazniekkua vaste pietäh toimenpidoloi, kudamien tarkoituksennu on levittiä tiedoloi linduloin hoijos. Sinypiän pietäh ekolougizii urokkoi, kudamil sanellah lindulois da niilöin syöndän eričyksis, sego muasteripajoi, kudamil nevvotah syötinlaudazien luajindua. 12. kylmykuudu on tavannu riputella syötinlaudazii, kudamile pannah linduloile hyövyllisty da syöndäh pättäviä syömisty talven aigua. Syötinlaudastu ei pie pidiä ainos täytetynny reunoissah — eiga linnut heitetäh syömizen ečindän; ainos käytettävis olijan syömizen täh rodieu liigua pinoližiägi[3]. Gostitandu syötinlaudazel on vai tävvendäi syötändy, kudamal ei pidäs olla linduloin jogapäiväzenny tayziarvozennu syömizenny. Tijazii kehoitetah syöttelemäh syötinlaudazilpäi, ei pie ripoittua syömisty muale — linnut ollah aiga varačut, asfal’tale libo lumele lykittylöi syömizii kerras tabaillah rohkiembat kyyhköit da čiučoit. Pruazniekan nimeh školis da lapsien päivykodilois järjestetäh omaluaduzien da funksionuallizien syötinlaudazien luajindukilbailuloi (syötinlaudazii luajitah plastiekkubutilkois, jäiččykonteinierois, polietilenpakietois)[7].
Mieldykiinittäjät toziaziet
- Tijazien liikkehet linduloin tundijoin mugah ollah vähänkuluttajan lennon hyvänny ezimerkinny: tijazet voijah piästä lendämäh vauhtil 35 kilometrii čuasus da yhtelaigua harvah räpsyttiä siibii.
- Ihan XVII vuozisadassah tijazien hävittämine oli kielletty cuarin käskyn mugah. Sen rikkojat maksettih suuret štruafut libo suadih plettii.
- Tijazet maltetah iče varustua kololoi, kudamii hyllättih endizet omistajat, puaksuh tullah elämäh tyhjih pöntölöih.
- Kaikkiedah muailmas on enämbi 60 tijazien lajii.
- Tijazet luajitah puaroi kaikekse igiä, linnut voijah lahjoittua omua syömisty, gu vai ollah yhtes oman toizen puolenke, a gu kudaitahto puaras kuolou, jiännyh lindu äijäl kärziy kaimuamizen täh.
- Kylmykuun 12. päiväkse linnut tullah lähembi kodiloi, ielpäi tietäh vilun tulendua.
- Tijazet maltetah andua 40 erilastu iändy — oman nimet net suadih juuri ven. зинь-зинь (libo ven. "синь-синь") -iänien mugah.
- 24 čuasus yksi tijaine voibi hävittiä enämbi 300 madostu — linnut ollah ahnahat syömäh, kylläl syödyygi se rubieu eččimäh syömisty da panemah net tallel tuliekse kerdua. Kaksi linduu voibi pellastua syöjis pienen savun.
- Tijazil on erinomaine musto — net mustoitetah net paikat, kus on syömisty, da helpoh lennetäh sinne.
- Tijastu voibi kezyttiä. Sih niškoi linnut ollah aiga luottajat, ga muututah käzintulijoikse haudomizen aigua.
- Tijazet syötetäh poigazii 30-40 kerdua čuasus[7].
Huomavukset
- ↑ Синичкин день 2024: какого числа, история и традиции праздника. Kačondan päivymiäry: 18. talvikuudu 2025.
- ↑ Бобровская О. Синичкин день: что это за праздник и как его отмечать (рус.). mir24.tv. «МИР24» информационно-аналитический интернет-портал. Сетевое издание. Закрытое акционерное общество «Межгосударственная телерадиокомпания «Мир». (9. kylmykuudu 2018). Kačondan päivymiäry: 18. talvikuudu 2025.
- ↑ 1 2 Традиции предков: зачем в России 12 ноября отмечают Синичкин день, Русское географическое общество. Kačondan päivymiäry: 18. talvikuudu 2025.
- ↑ 1 2 Синичкин день: праздник с заботой о пернатых и экологии, AiF. Kačondan päivymiäry: 18. talvikuudu 2025.
- ↑ 12 ноября — Синичкин день: история и традиции экологического праздника, Известия (12 kylmykuudu 2024). Kačondan päivymiäry: 18. talvikuudu 2025.
- ↑ Синичкин день: делимся интересными фактами о желтогрудых птицах. barnaul.press. Kačondan päivymiäry: 18. talvikuudu 2025.
- ↑ 1 2 3 Синичкин день 12 ноября 2024: история святых и традиции праздника, «Красный Север» (12 kylmykuudu 2024). Kačondan päivymiäry: 2025-12-018.