Ven'an lehtistöpäivy
| Ven'an lehtistöpäivy | |
|---|---|
 | |
| Pandih alguh | vuvvennu 1991 |
| Pietäh | joga vuottu |
| Päivymiäry | 13. pakkaskuudu |
Ven'an lehtistöpäivy on pruazniekku, kudamua pietäh 13. pakkaskuudu. Sen pani alguh Ven'an Federacien Korgeviman Nevvoston Prezidiumu 28. talvikuudu vuvvennu 1991 da se on kiini histouriellizes päivymiäräs — Ven'an enzimäzen Vedomosti-lehten painandan algupäiväs (se ei ole samannimine nygyaigaine Vedomosti-lehti), kudai perustettih Pedri I:n käskys. 2. pakkaskuudu vuvvennu 1703 (13. pakkaskuudu uvven stiilin mugah) Moskovas piäzi ilmah ven'ankielizen lehten enzimäine noumeru, sil tänäpäi on ven. «Санкт-Петербургские ведомости»-nimi, silloi sil oli ven. «Ведомости о военных и иных делах, достойных знания и памяти, случившихся в Московском Государстве и во иных окрестных странах»-nimi[1]. Pedri I pidi lehtie tärgienny keinonnu reformoin piendäs da Ven'an valdukunnan lujoittamizes.
Statistiekku
Vuvven 2009 allukse Ven'an Federacies oli pandu kirjoile enämbi 33 000 painettuu julgavuo. Keskimiärin joga päiviä levitettih enämbi 20 miljonua painettuloin julgavoloin kappalehtu.
Vuvven 2025 pakkaskuukse Roskomnadzoran tiedoloin mugah Ven'al on pandu kirjoile enämbi 155 tuhattu joukkoviestindy, ku bumuagal painettuu, mugai sähkösty[2].
Ven'an žurnalistan keskimiäräine palku vuvvennu 2024 oli 54 tuhattu rubl’ua.
Bumuagujoukkoviestimien luvendan vähenemine
Piäsyylöi, kudamien periä Ven'al eläjät ruvetah vähembäl lugemah bumuagujoukkoviestimii, on sähköjoukkoviestimien suadavus (29 %), painetttuloin joukkoviestimien hinnan kazvo (18 %) da lehtilöin da žurnualoin ilmahpiäzendän lopendu (11 %)[3]. Если в 2014 году предпочтение электронному формату отдавали 34 % читателей, то в 2022 году — 62 %[4].
Kogo Ven'an yhteiskunnallizen mielen tutkimuskeskuksen (ven. ВЦИОМ) vuvven 2022 allun tiedoloin mugah alalleh lugiettih painettuloi julgavoloi 14 % Ven'al eläjii, vie 21 % lugiettih sidä enne, ga heitettih luvendan. Enämbi migu puolet pandih merkile se, ku ei lugiettu enne da ei lugieta nygöi (63 %), ga se ei tarkoita sidä, ku sit joukos ei ole niilöi, ket ei lugietä joukkoviestimii sähkömuodolois. Samal aigua on joukko Ven'al eläjii, kudamih nähte bumuagujoukkoviestimet ollah tärgienny tiedoloin lähtehenny: net ollah rahvas, kudamil on enämbi 60 vuottu, hyö lugietah lehtilöi da žurnualoi kahteh kerdah enämbän, migu Ven’al eläjät kogonah (26 %), toizin sanoin joga nelläs ristikanzu sit igäjoukos. Luvut ollah suurembat sežo kyläläzien (20 %) da aktiivizien TV:n kaččojien keskes (33 %).
Ven’al eläjien alalleh lugiettavien lehtilöin joukos ollah paikallizet da piirilehtet[4].
Žurnalistoin palkindot
Vuvves 1997 algajen Ven'an lehtistöpäivänny juatah Ven’an Federacien halličuksen palkindoloi joukkoviestimien alal da abudengoi nuorien žurnalistoin projektoin kannattamizekse. Vuvvennu 2018 Ven’an Federacien piämiehen käskys perustettih Ven’an Federacien arvostettu žurnalistu -arvonimi[5].
Nevvostoliiton lehtistöpäivy
Lehtilöin ammatilline pruazniekku enzikerdua pandih alguh Nevvostoliitos. Ven'an federatiivizen socialistizen nevvostotazavallan Korgeviman Nevvoston Prezidiuman vuvven 1991 pakkaskuun 13. päivän käskys Nevvostoliiton lehtistöpäivän sijah (5. oraskuudu), kudai oli pietty bol'ševiekkoin Pravda-lehten enzimäzen noumeran painandan nimeh, luajittih pruazniekku uvven nimenke.
Valgoven'al lehtistöpäiviä pietäh 5. oraskuudu.
Vuvves 1994 algajen joga vuottu 3. oraskuudu pietäh Muailman lehtistöpäiviä.
Linkat
Huomavukset
- ↑ Санкт-Петербургские Ведомости. — Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
- ↑ Перечень наименований зарегистрированных СМИ. Роскомнадзор. Kačondan päivymiäry: 12. pakkaskuudu 2025.
- ↑ День российской печати: дата, история и традиции, РБК Life (10 pakkaskuudu 2025). Kačondan päivymiäry: 12. pakkaskuudu 2025.
- ↑ 1 2 Пресса, которую мы (не) потеряли, ВЦИОМ. Новости (12 pakkaskuudu 2022). Kačondan päivymiäry: 12. pakkaskuudu 2025.
- ↑ Премия в области средств массовой информации - Правительство России (рус.). government.ru. Kačondan päivymiäry: 12. pakkaskuudu 2025.