Denguabuloin da eläkehmaksoloin maksandu digitualizis rublis

On otettu Рувики-späi
Denguabuloin da eläkehmaksoloin maksandu digitualizis rublis
Цифровой рубль.jpg
Algu 2025-2026
Paikku Ven'a
Syy Menoloin vähendämine dengusiirdoloi luadijes

Denguabuloin da eläkehmaksoloin maksandu digitualizis rublis(ven. Вы́плата посо́бий и пе́нсий в цифровы́х рубля́х) on valdivon sociualumaksoloin siirrändy digituallizeh tabah Ven'al vaihieloinmugazen digitualizen rubl'an käyttöhotandan hantuzis. Digitualine rubl'u on dengoin kolmas muodo, kudai yhtistäy ičessäh käzidengoin da käzittömien dengoin maksanduominažuksii[1].

Vuvven 2025 ligakuun 1. päiväs digitualizis rublis ruvetah maksamah erähii maksoloi federuallizes b’udžietaspäi. Se rubieu koskemah tiettylöi sociualudenguabuloi. Vuvven 2025 heinykuukse halličus ei ilmoitannuh tarkua luvetteluu maksolois. Vuvves 2026 valdivo suau käyttiä uuttu muoduo joga maksoh nähte, sit luvus ollah eläkehmaksot da b’udžiettualan ruadajien palkat[2].

Kontekstu

Ven’an banku pani rattahile digitualizen rubl’an pilouttuprojektan elokuul vuvvennu 2023. Sit aijas lähtien fiizizet persounat, bankat da laitokset testiiruijah operacieloi digitualizen rubl’anke[3].

Sulakuun lopus vuvvennu 2025 Ven’an rahavaroin ministru  (ven.) (olo. Anton Siluanov ilmoitti, ku suuri digitualizen rubl’an käyttöhotandu rodieu vuvvennu 2026[4]. Sikse aigua pidäy työnyttiä da testiiruija tarvittavu rahavaroin infrastruktuuru.

Digitualistu rubl’ua ruvetah käyttämäh virtualizes tilas: Ven’an banku rubieu piästämäh ilmah digitualistu rubl’ua digitualizennu koudannu, a uvven val’uutan tilit roijah Keskubankan platformal[1].

Uuzi dengoin muodo rodieu fiiziezil da juriidizil persounil tallel digitualizis kukkarolois. Kukkarot ei roija sivottu konkriettizeh bankah, ga käyttiä digitualizii rublii suau perindöllizeh tabah: bankusovituksien avul. Piäzyn kukkaroh voibi suau hos mittuman bankan kauti, kudamas klijentua palvellah. Reknaillah, ku tuliel aigua rodieu mahto käyttiä digitualizii rublii internettah piäzemättäh[5].

Digitualizii rublii suau käyttiä maksoloih da dengoin siirdoloih niškoi, niilöi suau muuttua käzittömikse, a sit tarvittajes ottua ku käzidengat. Fiizizih persounih niškoi tranzakcielois digitualizis rublis ei ruveta ottamah bankumaksoloi. Niilöih ei azeteta krediittulaitoksien limiittoi. Juriidizien persounienke ruadajes huavatah käyttiä minimuallizii bankumaksoloi[6].

Vallasolijat pannah merkile uvven val'uutan eduloi rajoiylittäjis siirdolois da tranzakcieloin tarkailemizes[1].

Digitualizen rubl'an käyttöhotandan aigulistu

15. heinykuudu vuvvennu 2025 Valdivolline Duumu hyväksyi käskyn digitualizen rubl'an vaihienmugazes suures käyttöhotandas[7], sen allekirjutti prezidentu 23. heinykuudu vuvvennu 2025. Uvven zakonan mugah digitualizen rubl'an vaihienmugaine suuri käyttöhotandu algavuu 1. syvyskuudu vuvvennu 2026. Enzimäi se rubieu koskemah suurii bankoi da kauppuverkoloi, kudamien tulot ollah enämbi 120 miljonua rubl'ua da kaikkii myöjii da bankoi liitetäh vuvvekse 2028.

1. ligakuudu vuvvennu 2025 digitualistu rubl'ua ruvetah käyttämäh federuallizien kululoin ozas da erähis sociualumaksolois. Mittumis maksolois — vuvven 2025 heinykuun lopus ei olluh tietois.

Vuvven 2026 pakkaskuun 1. päiväs digitualistu rubl'ua ruvetah käyttämäh joga maksolois federuallizes b'udžietaspäi. Se koskou eläkehmaksoloi, denguabuloi, stipendielöi da b’udžiettualan ruadajien palkoi.

Vuvvennu 2027 digitualistu rubl’ua ruvetah käyttämäh alovehellizis maksolois sego b’udžiettoin ulgopuolizien fondoin sistiemois[2].

Omatahtožuon periuateh

Keskusbankas pannah merkile, ku digitualizen rubl’an käytändäs ei ole paginua pakoittamizes:

Kanzalazet, kui nygöigi, voijah iče piättiä, mittumua rubl’an muoduo käyttiä — käzidengannu, käzittömänny libo digitualizennu. Sen valliččou iče ristikanzu[8].

Ku Ven’al eläi ei tahto käyttiä digitualizii rublii, hänel suau olla digitualistu kukkaruo avuamattah[1]. Se koskou denguabuloin da eläkehmaksoloin suajii: hyö iče vallitah maksoloin suandutavat (käzidengat, käzittömät libo digitualizet)[2].

Denguabuloin maksandu

Tuhukuul vuvvennu 2025 Interfaks-agenstvu ilmoitti, ku Ven’an banku yhtes Federuallizen kasanke  (ven.) (olo. reknaillah algua koittelu digitualizen rubl’an käytändäs sociualudenguabuloin maksandas da perustehellizen rakendamizen kululois. Agenstvan tiedoloin mugah se tapahtuu elokuun 25. päiväs vuvvennu 2025. Interfaks vihjuau digitualizen rubl'an käytändän "tiekartah" b’udžiettuprocesas. Koittelu rubieu kestämäh syvyskuun loppussah. Dokumentas ei sanota, mittumii maksoloi ruvetah testiiruimah[9].

Hyväksytyn zakonan mugah ligakuus vuvvennu 2025 digitualizes muvvos ruvetah maksamah vuitin denguabulois[2]. Kui pandih merkile Keskusbankas nikelle ei ruveta avuamah digitualizii kukkaroloi avtomuattizesti[8].

Azientiedäjät pannah merkile, ku digitualizis rublis maksandu on pädii vallasolijoile, sendäh ku avvuttau valdivole valvuo varoin tarkoitusmugastu kulutandua. Finansumaltandan kehityksen liiton piäjohtai Veniamin Kaganov selliti:

…B’udžiettah niškoi on tärgei, ku kaznudengoi piettäs vaiku tarkoituksen mugah. Ezimerkikse, ku lapsien denguabuloih täyzi-igäzet ei ostettas viinua da tabakkua. Digitualizen rubl’anke sidä suau valvuo[6].

Eläkehmaksoloin maksandu

Runetas rodih viestilöi vallasolijoin pluanois siirdiä kaikkii eläkehmaksoloi digitualizikse. Ven’an bankan verkosivustol ilmoitetah, ku moizii pluanoi ei ole[10].

Tuhukuul vuvvennu 2025 Valdivollizen Duuman omažuon, mua- da omažusvälilöin kyzymyksien komitietan piälikkö Sergei Gavrilov sanoi sociualuverkoloin valehviestilöikse net, kudamis sanotah, "ku Ven’al eläjät nygöi ruvetah suamah eläkehmaksoloi digitualizis rublis, a kieldävymizekse pidäy työndiä pakičus regul’uattorah libo eläkkehelästy palvelijah bankah". Deputuattu pani merkile, ku valdivo ei voi ottua käyttöh vaiku ainavuo eläkehmaksoloin suandutabua, ku pagin ollougi perindöllizis bankusiirdolois, pagizemattah digitualizis dengois, kudamat ollah uvvennu instrumentannu[11].

Ku eläkkeheläine iče tahtou suaja eläkehmaksoloi digitualizes muvvos (vuvves 2026), sih niškoi (kuigi denguabuloin suamizekse digitualizis rublis) pidäy avata digitualine kukkaro. Sen jälles kirjuttua pakičus Sociualufondah  (ven.) (olo. da ilmoittua omas tahtos suaja maksoloi digitualizeh kukkaroh da kirjuttua sen noumeru. Kuni Sociualufondu ei sua mostu pakičustu eläkkeheläzes, maksamah eläkehty digitualizis rublis ei ruveta. Jälles voibi kieldävyö eläkkehesgi digitualizis rublis da kiändyö perindöllizih valdivollizien maksoloin suandutaboih[12].

Huomavukset

  1. ↑ 1 2 3 4 Будут ли платить пенсии в цифровых рублях?. Kačondan päivymiäry: 5. syvyskuudu 2025.
  2. ↑ 1 2 3 4 С 1 октября 2025 года пособия и пенсии будут выплачивать в цифровых рублях. Что это значит для получателей, Банки.ру. Kačondan päivymiäry: 5. syvyskuudu 2025.
  3. ↑ Цифровой рубль | Банк России. cbr.ru. Kačondan päivymiäry: 5. syvyskuudu 2025.
  4. ↑ Силуанов ждет масштабного внедрения цифрового рубля в 2026 году, Interfax.ru (28 sulakuudu 2025). Kačondan päivymiäry: 5. syvyskuudu 2025.
  5. ↑ Цифровой рубль | Банк России. cbr.ru. Kačondan päivymiäry: 5. syvyskuudu 2025.
  6. ↑ 1 2 Социальные выплаты в цифровых рублях. Насколько это реально? Мнения экспертов - Российская газета, Российская газета (10 tuhukuudu 2025). Kačondan päivymiäry: 5. syvyskuudu 2025.
  7. ↑ Госдума определила сроки массового внедрения цифрового рубля, РИА Новости (15 heinykuudu 2025). Kačondan päivymiäry: 5. syvyskuudu 2025.
  8. ↑ 1 2 Что такое цифровой рубль, зачем он и как работает, нужно ли заявление на отказ от цифрового рубля. | Банк России. www.cbr.ru. Kačondan päivymiäry: 5. syvyskuudu 2025.
  9. ↑ ЦБ и Казначейство РФ намерены осенью протестировать выплату пособий в цифровых рублях, Interfax.ru (5 tuhukuudu 2025). Kačondan päivymiäry: 5. syvyskuudu 2025.
  10. ↑ Миф 4. Все зарплаты бюджетников и выплаты для пенсионеров переведут на цифровые рубли, как когда-то заставили всех перейти на «Мир». | Банк России. www.cbr.ru. Kačondan päivymiäry: 5. syvyskuudu 2025.
  11. ↑ В Госдуме назвали фейком сообщения о переводе пенсий в цифровые рубли, TACC. Kačondan päivymiäry: 5. syvyskuudu 2025.
  12. ↑ sberbank.ru (рус.). www.sberbank.com. Kačondan päivymiäry: 5. syvyskuudu 2025.
Lähteh - "https://olo.ruwiki.ru/w/index.php?title=Denguabuloin_da_eläkehmaksoloin_maksandu_digitualizis_rublis&oldid=126362095"