Julija Tolmačova
| Julija Tolmačova | |
|---|---|
 Julija Tolmačova sanelemas Kindahan kyläh nähte. | |
| Täyzi nimi | Julija Sergejevna Tolmačova |
| Roindupäivy | 17. tuhukuudu 1979 (45 vuottu) |
| Roindukohtu | Anuksenlinnu, Anuksen piiri, Karjalan avtonoumine socialistine nevvostotazavaldu |
| Kanzalližus |
 Nevvostoliitto,  Ven'anmua |
| Toimindu | Pajojoukon ohjuaju, muuzikkufolklouran opastai |
| Palkindot da arvonimet |
Karjalan tazavallan vuvven 2019 laureattu, Karjalan tazavallan kul'tuurualan arvostettu ruadai |
Julija Tolmačova (17. tuhukuudu 1979) on muuzikkufolklouran opastai, Priäžän Meijän pajo -ansambl'an ohjuaju, Karjalan tazavallan kul'tuurualan arvostettu ruadai (2024).
Eloskerdu
Julija Tolmačova on roinnuhes Anuksenlinnah karjalazeh pereheh. Opastui Anuksen keskiškolas № 2 da Anuksen muuzikkuškolas. Školan loppiettuu jatkoi opastundan Petroskoin muuzikkukolledžas. Loppi sen vuvvennu 1998 da sai rahvahallizen horan ohjuajan ammatin.
Muuzikkukolledžan jälles Tolmačova opastui Petroskoin valdivollizes konservatouries suomi-ugrilazien rahvahien muuzikan laitoksel. Loppi sen vuvvennu 2004 da sai etnomuuzikan tiedäjän ammatin. Vie konservatouries opastujes Julija Sergejevna rubei ruadamah Priäžän kul'tuurutalois Meijän pajo- da Veteruanoin horan, sit lapsiengi Pilli-stuudien ohjuajannu.
Vuozinnu 2009—2014 Julija Tolmačova ruadoi Priäžän kanzallizen piirin hallindon kul'tuuruozaston piälikönny.
Vuvves 2014 ruadau Priäžän kanzallizen taidoškolan opastajannu. Opastau muuzikkufolklourua.
"Meijän pajon" ohjuajannu Tolmačova on vuvves 2001 algajen. Häi on Pengerel-perehansambl'angi ozanottajannu, ansambl'as hänen ližäkse pajatetah da soitetah hänen ukkoh Dmitrii Muhorin da poigah Daniil Muhorin.
Yhteiskunnalline ruado
Vuvves 2018 Julija Tolmačova on Priäžän kanzallizen piirin Vmeste-fondan johtajannu. Fondu on perustettu vuvvennu 2015 Priäžän kanzallizen piirin hallindon endizen piämiehen Oleg Jermolajevan alguhpanos. Fondan ruavon tarkoituksennu on kul'tuuran kehittämine kylis, niistiilapsien avvutandu, ruavahien ristittyzien tervehellizen eloksentavan da perindöllizien käziruadoloin kehittämine.
Kindahat-projektu
Vuvvennu 2019 priäžäläzien Julija Tolmačovan da Svetlana Hrebtovan hyvyös on pandu rattahile Kindahat-projektu. Sen hyvyös elbyi ruado Priäžän kanzallizen piirin Kindahan kylän säilyttämizekse da kehittämizekse. Matkailun kehittämine on sen erähii tärgielöi ruadoloi. Kylän gostih niškoi on luajittu oma ohjelmu, kudaman pohjannu on karjalaine kul'tuuru da kindahalazet zuakkunat.
Palkindot da arvonimet
- Vuvvennu 2019 Julija Tolmačova sai kolmanden sijan Karjalan tazavallan ližäopastuksen alan ruadajien kilvas "Syväimen annan lapsile"[1]. Kilvan pidäjinny oldih Karjalan tazavallan opastanduministerstvu da Karjalan opastuksen kehitysinstituuttu.
- Samannu 2019 vuon Tolmačova rodih Vuvven laureatakse Karjalas, hänen ruado karjalazen kul'tuuran säilyttämizekse da kehittämizekse oli korgiesti arvostettu.
- Vuvvennu 2024 Tolmačova sai Karjalan tazavallan kul'tuurualan arvostettu ruadai -arvonimen.
Huomavukset
Kirjalližus
- Jelena Ruppijeva. Karjalazen kul'tuuran akkiloiččijat // Oma Mua. — 2020. — 29. pakkaskuudu (№ 3). — С. 5.