Meijän pajo
Meijän pajo on priäžäläine karjalakse pajattai pajojoukko, kudai perustettih 20. sulakuudu vuvvennu 1992.
Perustandu
"Meijän pajo" luajittih sih aigah, konzu 1990-vuozil ottavuttih karjalazen pajon elavuttamizeh. Priäžän čupul jo ruattih kuulužat Vieljärven da Pyhärven horat. Petroskoile oli suadu Oma Pajo.
Ohjuajat da soittajat
Enzimäzenny "Meijän pajon" ohjuajannu oli Marija Matrosova.
Monien vuozien aigah horua ohjai Vera Ivanova.
Vuvves 2001 algajen horan ohjuajannu on Julija Tolmačova. Joukon soittai Dmitrii Muhorin ruadau "Meijän pajos" allus algajen.
Ohjelmisto
"Meijän pajo" pajattau karjalan kielel uuzii kirjutettuloi pajoloi da vahnoigi. Priäžäläine Aleksandr Saveljev, kudai iče pajatti joukos, on kirjutannuh "Meijän pajoh" niškoi äijän pajuo: kui pajoloin sanua, mugai muuzikkua. Saveljevan kirjutettu Minä mustan -pajo rodih Priäžän piirin gimnakse. Tädä pajuo tänäpäi suvaijah da pajatetah toizetgi pajojoukot.
Nygöi "Meijän pajon" pajatettavien pajoloin joukos on jo enämbi 30 omua kirjutettuu pajuo. Paiči Aleksandr Saveljevua muuzikan niilöih ollah kirjutettu "Meijän pajon" nygözet ohjuajat Julija Tolmačova da Dmitrii Muhorin. Nämmä pajot on luajittu Aleksandr Volkovan, Zinaida Dubininan da toizien karjalankielizien kirjuttajien sanoih.
Matkustandu
"Meijän pajuo" hyvin tutah omal čupul, Karjalas da sen ulgopuolel. Pajojoukko kävyy pajattamah karjalazih kylih da ottau ozua monih festivualiloih.
Vuozipäivät
Omassah 20-vuozipäiväkse, kudai piettih vuvvennu 2012, meijänpajolozet ombelutettih ičelleh uvvet ruutat. Niilöin dizainerannu oli Karjalan tundiettu taidolii Irina Porošina.
30-vuozipäiväkse ommeltuloin uuzien ruuttien dizainerannu oli Ven'an dizaineroin liittoh, Karjalan gildien muasteriloin joukkoh kuuluju Aleksandra Levickaja.
Omassah 30-vuozipäiväkse joukko piästi ilmah uvven pajokogomuksen, kudamah kuuluu 15 pajuo karjalan kielel. Nämmä pajot on kirjutettu Aleksandr Saveljevan, Zinaida Dubininan, Aleksandr Volkovan, Valentina Kiurun, Ivan L'ovkinan sanoih. Niilöin muuzikan kirjuttajinnu ollah joukon ohjuajat Dmitrii Muhorin da Julija Tolmačova. Pajokogomukseh on liitetty mustopuikkoine pajoloin fonogrammoinke.
Arvostus
Vuvvennu 1997 "Meijän pajole" annettih rahvahan ansambli -arvonimi.