Kanzoinväline juoksun päivy
| Kanzoinväline juoksun päivy | |
|---|---|
 | |
| Tiippu | Kanzoinväline |
| Toizin | Muailman juoksun päivy |
| Pandih alguh | 2009 |
| Pietäh | joga vuottu |
| Päivymiäry | Kezäkuun enzimäine kolmaspäivy |
| Liittyy | juoksus |
Kanzoinväline juoksun päivy (angl. Global Running Day) on muailman pruazniekku, kudamua joga vuottu pietäh kezäkuun enzimäzenny kolmanpiän. Sen tarkoituksennu on levittiä tiedoloi juoksus kui pättäväs sportulajis da yhtistiä juoksunsuvaiččijoi kogo muailmas.
Pruazniekas
Histourii
Muailman juoksun päivän idei on roinnuh Yhtysvallois vuvvennu 2009[1]. Alguu myöte pruazniekku oli kanzalline, ga idei terväh rodih kuulužakse da levii toizile manderile. Kezäkuun 1. päiväs vuvvennu 2016 pruazniekku virrallizesti sai muailman pruazniekan stuatusan[2].
Vuvvennu 2017 Kanzoinväline ulgoatletiekkoin federacieloin associacii (IAAF) kannatti tämän alguhpanon da sit aijas Kanzoinvälisty juoksun päiviä pietäh kezäkuun joga enzimästy kolmattupäiviä äijis mualois.
Piendän histourii
Ottua ozua pruazniekkah voi joga ristikanzu da sportuyhtevys. Kanzoinvälizen juoksun päivän erähii helpoloi piendöi on lähtie juoksemah. Voibi yhtyö hos mittumah ulgoatletiekan tapahtumah, kudamua pietäh Ven'al, libo ičel juosta distancii.
Sinäpiän sežo pietäh yhteiskunnallizii pidoloi, kudamii kannatetah suat sportuyhtistykset kogo muailmas da kudamat on omistettu mennyön aijan tundiettuloile ulgoatlietoile. Nämmih pidoloih nygözet kuulužat sportumiehet puaksuh otetah ozua ozanottajinnu libo kunnivogostinnu.
Sežo pietäh Ven'an kanzoinvälisty krossukilbua. Kilbah yhtytäh kui ammattimiehet, mugai juoksunsuvaiččijat eri juoksuneroloinke da eri tervehyön eričyksienke. Kilbah tullah paralimpiicatgi, erähät heis kilbaillah kal'askoil, kilvan siännöt annetah luvan sille[3].
Juoksunsuvaiččijat voijah panna kirjoile omat tulokset Kanzoinvälizen juoksun päivän portualale[4]. Sit voibi kirjuttua maršruuttu, sen piduhus da olopaikku. Portualal pietäh sežo virtualizii juoksuloi, kudamih voi yhtyö jogahine[5][6].
Päivästy ennittäjen -projektu
Piätapahtumat mennäh louzungan Päivästy ennittäjen -hantuzis[7]. Projektu oli pandu alguh Kanzoinvälizen ulgoatletiekkoin federacieloin associacien johtajien kannatuksel. Sit projektas ozanottajat yhtel aigua eri aigupoujasois järjestetäh juoksuloi, vaihtetah toine tostu yhtes planietan kolkaspäi toizeh vuoros olijah aigupoujasan mugah. Juoksuu ruvetah pidämäh Uvves Zelandies, sit siirrytäh Avstrualieh, Japounieh, Jevrouppah, Afriekkah, Suvi-Amierikkah da Pohjas-Amierikkah.
Juoksuloin aigulistu on luajittu nenga, ku niilöi pietäh joga čuassuu, sendäh vuorojuoksu kestäy suutkat. Vuvvennu 2018 juoksu oli pandu alguh Okelndas (Uuzi Zelandii), sit jatkettih sidä Mel'burnas, Tokios, Pekinas, Bangkokas, Delis, Minskas, Ramallas, Addis-Abebas, Johannesburgas, Niccas, Berlinas, Londonas, Rabatas, Abidžanas, Prajas, San-Paulus, Buenos-Airesas, Gavanas, Torontos, Limas, Mehikos da Los-Andželas, loppih se Vankuveras.
"Juoksu on kaikile pädii, se on vessel da kilvanalaine. Se voi olla yhtevyksih da yksinäžyöh nähte... Ga enne kaikkie se kehittäy vägilöi, tirpačustu, rungua da tervehytty.[8]
— IAAF:n prezidentu Sebastjan Kou
Huomavukset
- ↑ 5 июня отмечают День бега: История и особенности праздника
- ↑ Забег-марафон "Всемирный день бега"
- ↑ Всемирный день бега в 2024 году: история и традиции праздника
- ↑ Join The Virtual Race (англ.). Global Running Day. Kačondan päivymiäry: 21. oraskuudu 2024.
- ↑ СЮЖЕТ: ПРАЗДНИКИ И ВЫХОДНЫЕ В РОССИИ В 2024 ГОДУ Международный день бега в 2023 году — история праздника
- ↑ Всемирный день бега
- ↑ В Парке Победы прошел забег «Обгоняя солнце»
- ↑ Всемирный день бега: история, традиции, когда и как отмечается