Kanzoinväline linduloin päivy

On otettu Рувики-späi
Kanzoinväline linduloin päivy
L. Fedotjeva «Ozan lindu»
L. Fedotjeva «Ozan lindu»
Merkičys Pruazniekan tarkoituksennu on linduloin lajiloin moniluadužuon da luvun säilyttämine.
Pandih alguh 1926
Pietäh Kanzoinväline pruazniekku
Päivymiäry 1. sulakuudu
Perindöt

Luonnonsuojelulaitokset, opastus- da kul’tuurulaitokset pietäh moizii pidoloi: akcieloi, kilboi, flešmoboi, ozutteluloi, luvendoloi,

ekolougizii talgohii da muudu piduo.

Kanzoinväline linduloin päivy on kanzoinväline ekolougine pruazniekku, kudamua joga vuottu pietäh Ven'al 1. sulakuudu vuvves 1926 algajen. Päivy vallittih muuttolinduloin suvimualoispäi tulendan kunnivokse. Pruazniekan tarkoituksennu on linduloin lajiloin moniluadužuon da luvun säilyttämine.

Histourii

19. kevätkuudu vuvvennu 1902 allekirjutettih enzimäine "Kanzoinväline muatalohuos hyövyllizien linduloin suojelukonvencii" ymbäristön suojelualal, se rubei ruadamah 12. talvikuudu vuvvennu 1905[1][2].

Vuvvennu 1918 Nevvostoliitos allekirjutettih "Kanzoinväline sobimus muuttolinduloih nähte"[3].

18. ligakuudu vuvvennu 1950 Pariižas allekirjutettih "Kanzoinväline linduloin suojelukonvencii", kudai tuli vuvven 1902 konvencien sijah, sit pagin oli linduloin kaikis lajilois[2].

Amierikan Yhtysvallois

Vuvvennu 1894 Oil-Sitin (Pensil’vuanii) školien inspektoran Čarl’z Bebkokan kehoitukses opastuslaitoksis ruvettih pidämäh lapsien pruazniekkua "Linduloin päiviä" 4. oraskuudu[4].

Pruazniekan piendyidein kannatettih Vil’jam Datčer (Amierikan ornitolougoin yhtistyksen piämies) da Pitsburgan telegruaffuhrouniekku -lehti, kudai perusti linduloin suojelun kluubu-muzein školas opastujih niškoi[4].

Sinäpiän lugiettih linduloile omistettuloi kirjalližustevoksii. Nenga loppih joga opastusvuozi, luajittih linduloile da niilöin suojelule omistettuloin opastusprogrammoin yhtehvedoloi[4].

"Konzu myö suammo opastua täh omii lapsii, zakonoi sit jo ei pie, " sanoi Amierikan ornitolougoin yhtistyksen piämies Vil’jam Datčer[4].

Muuttolinduloin päivy Kanzallizes koskemattoman luonnon rauhoitetus alovehes Solton-Sis

Ven'an valdukundu

Vuvvennu 1865 Linduloin päiviä ruvettih pidämäh školien luonnonsuojeluyhtistykset — "Oraskuun liitot", Ven’an elättilöin akkiloičusyhtistyksen ozastot[5].

  • N. F. Kaščenko — professoru, eläintiedäi Tomskaspäi, piästi ilmah broš’uuran Oraskuun liittolois da linduloin huokuttelemizes[5].
  • Ornitolougu Gans fon Berlepš kirjutti enzimäzen kniigan ven. «Всеобщая защита птиц»[5].

"Linduloin päivän piendyidei, kudamah rajan tagua kiinnostui kymmenii da sadoi tuhanzii sen innokkahii kannattajii, tuli meile vie heikonnu vähäl nägyjänny allonnu…", sanoi linduloinsuojelun popul’arizoiččii, eläintiedäi A. A. Silantjev[5].

Nevvostoliitos

11. da 12. oraskuudu vuvvennu 1924 piettih Linduloin päiviä. Moskovan luonnonkeskusstansien nuoret luonnonsuvaiččijat  (ven.) (olo. opastajien N. I. Dergunovan da P. P. Smolinan johtol azetettih pöntölöi Pogonno-Losino-Ostrovskoin mečänhoidoalal. Pruazniekkua sežo piettih Smolenskan alovehel, P. P. Mazurovan Jermolinskois školas. Pruazniekan tunnussanoinnu oldih "Älgiä tappakkua linduloi! Avvuttakkua niilöile: azettakkua pöntölöi da syötinlaudazii!"[5].

  • N. I. Dergunov piästi ilmah kirjutuksen "Linduloin päiväh" nähte K. A. Timir'azevan nimizen nuorien luonnonsuvaiččijoin luonnonstansien kirjutukset -julgavos[5].

1. sulakuudu vuvvennu 1926 Moskovas Linduloin päivy oli virralline. Nuoret luonnonsuvaiččijat azetettih pöntölöi Vorobjovi gori -kohtas[5].

  • Pruazniekkua avvutti valmistua V. V. Majakovskii. Hänen kezämökil piirustettih plakuattoi. Häi kirjutti louzungan: ven. «Мы ждём вас, товарищ птица, отчего вам не летится?»[5].

Vuvvennu 1927 Moskovan Linduloin päiväh otti ozua viizituhattu lastu. Hyö azetettih 1098 pöntyö[2][5].

"Hyö ei tietä, kus voidas olla aktiivizet, sendäh ruvetahgi rikkomah pezii. …Linduloin piävihaniekois lapsil pidäy roita niilöin parahikse ystävikse Linduloin päiväh liityndän avul", sanoi N. I. Dergunov, konzu rikottih azetettuloi pöntölöi[5].

Vuozinnu 1928 da 1929 pruazniekkua piettih 24. kevätkuudu. Sih otti ozua enämbi 65 tuhattu innostunnuttu. Hyö azetettih läs 15 tuhattu pöntyö[5].

  • Moizet joukkoviestimet kui: Moskovan žurnualat ven. «Юный натуралист" da ven. «Листки Биостанции юных натуралистов», Leningruadan žurnualu ven. «Живая природа», Har’kovan žurnualu ven. «Украинский охотник и рыболов» da lehti "Радянський мисливець та pибалка", kuhkutettih kaikkii ottamah ozua Linduloin päiväh[5].

Pruazniekan valmistandah otettih ozua pionieruyhtistykset da Luonnonsuvaiččijoin ozastot. Lapset luajittih pöntölöi, jälles hyö kuunneltih luvendoloi erilazis linduloin lajilois, otettih ozua kulguloih[5].

Vuozien 1940 lopus uvvessah piettih Linduloin päiviä. Pruazniekkua popul’ariziiruittih V. G. Averin (luonnonsuojelun ruadai) da P. P. Smolin (Kogo Ven'an luonnonsuojelun nuorižon ozaston piälikkö)[5].

Vuvvennu 1951 joga školal vältämättäh pidi luadie ei vähembä 20 pöntyö[5].

Ven’an linduloin suojeluliitto
  • Joga pionieral pidi luadie vuvven aigah yksi pöntö da kaksi syötinlaudastu linduloih nähte[5].

Vuvvennu 1953 pruazniekkah otti ozua enämbi viitty miljonua školas opastujua[5].

Vuvves 1958 pruazniekkua ruvettih pidämäh kaksi kerdua vuvves (keviäl, sygyzyl)[5].

Vuozien 1970 rajal Linnun päivän pruazniekkua ei ruvettu pidämäh[5].

Ven'al

Vuvvennu 1999 Kanzoinvälisty linduloin päiviä ruvettih pidämäh uvvessah Ven’an linduloinsuojelun liiton ornitolougoin hyvyös[5].

Vuvvennu 2000 pruazniekan luadimizeh otti ozua Moskovan halličus[6].

Perindöt

Kanzoinvälisty linduloin päiviä pietäh UNESCON Ristikanzu da biosfieru -luonnontiedoprogramman hantuzis[5].

Luonnonsuojelulaitokset, opastus- da kul’tuurulaitokset pietäh moizii pidoloi[2]:

  • akcieloi,
  • kilboi,
  • flešmoboi,
  • ozutteluloi,
  • luvendoloi,
  • ekolougizii talgohii da muudu piduo.
Lapsi pöntyö luadimas

Joga vuottu vuvves 1996 algajen Ven’an linduloin suojeluliitto valliččou vuvven linnun[2]:

  • 2023 — kuovikurmoi;
  • 2024 — vihandučiučoi;
  • 2025 — mustuvaroi.

Piendypäivät

Joga muas Kanzoinvälisty linduloin päiviä pietäh eri päivinny[3]:

  • 1. sulakuudu — Ven'a "Kanzoinväline linduloin päivy";
  • 4. oraskuudu — Amierikan Yhtysvallat "Linduloin päivy";
  • 5. pakkaskuudu — Amierikan Yhtysvallat "Kanzalline linduloin päivy";
  • 22. pakkaskuudu — Yhtistynnyh Kuningaskundu "Kanzalline linduloin päivy";
  • Oraskuun toine suovattu — Yhtistynnyh Kuningaskundu "Muailman muuttolinduloin päivy";
  • Ligakuun toine suovattu — Latinan Amierikan muat "Muuttolinduloin päivy";
  • Ligakuu — Kolumbii;
  • Sulakuu — Kosta-Rika.

Huomavukset

  1. ↑ И. И. Лукашук. [http://cawater-info.net/bk/water_law/pdf/lukashuk.pdf Международное право Особенная часть Учебник для студентов юридических факультетов и вузов]. — Изд. 3-е, перераб. и доп. – М.: Волтерс Клувер, 2005. - 517 с., 2005.
  2. ↑ 1 2 3 4 5 Артемова, Оксана. Международный день птиц в 2025 году: традиции и интересные факты, ВФокусе Mail (13 pakkaskuudu 2025). Kačondan päivymiäry: 20. kevätkuudu 2025.
  3. ↑ 1 2 ОГНЕВА, Елена. Happy Bird Day! В Ульяновской области отмечают Международный день птиц, AiF. Kačondan päivymiäry: 20. kevätkuudu 2025.
  4. ↑ 1 2 3 4 A passion for birds : American ornithology after Audubon : Barrow, Mark V., 1960- : Free Download, Borrow, and Streaming : Internet Archive (англ.). Internet Archive. Kačondan päivymiäry: 20. kevätkuudu 2025.
  5. ↑ 1 2 3 4 5 6 7 8 9 10 11 12 13 14 15 16 17 18 19 20 21 Черненкова, Марина. Международный день птиц 2024: История и традиции праздника, Общественная служба новостей (31 kevätkuudu 2024). Kačondan päivymiäry: 20. kevätkuudu 2025.
  6. ↑ Международный день птиц, РИА Новости (20240401T0130). Kačondan päivymiäry: 20. kevätkuudu 2025.

Kirjalližus

Linkat

Lähteh - "https://olo.ruwiki.ru/w/index.php?title=Kanzoinväline_linduloin_päivy&oldid=126358424"