Opastusvuozi
| Opastusvuozi | |
|---|---|
 Pruazniekkurivi školas «Proton», 1. syvyskuudu vuvvennu 2017 | |
| Käytändän ala | Opastus |
Opastusvuozi (ven. Уче́бный год) on väliaigaine kauzi, kudai merkiččöy opastustoimindan kestuo opastuslaitoksis[1].
Ellendys
Opastusvuozi-ellendysty miärätäh kui vuvvekse otettuu opastusprocesan kierduo opastustoimindas.
Opastusvuottu merkitäh opastuksen toine toizen jälles olijoin kalenduaruvuozien noumeroil. Ezimerkikse, "opastusvuozi 2025/2026"[2].
Opastusvuvven kesto
Opastusvuvven algu da loppu erotah mualoin mugah. Opastuskaudeh nähte hyväksytäh muan zakonois. Urokkoin algu- da loppupäiväs opastuslaitos enimyölleh voi piättiä iče[3].
Jevroupan mualois opastusvuozi algavuu elokuul — syvyskuul da loppuu oraskuul — kezäkuul. Ezimerkikse, elokuun puolivälis ruvetah ruadamah školat Daanies, Suomes, Ruočis, syvyskuun enzimäzel puoliškol — Avstries, Francies, Ispuanies, Itualies. Germuanies da Šveicuaries alovehes rippujen opastuvuozi voi algavuo elokuun puolivälis dai syvyskuun lopus[3][4].
Amierkan Yhtysvallois da Kanuadas ei ole yhtehisty standartua. Päivymiäris piätetäh ozavaldivon/provincien zakonois, da urokat opastuslaitoksis algavutah sygyzyn allus da loppietahes kezän allus[3].
Latinan Amierikan erähis mualois opastusvuvven enzimäine päivy piädyy tuhukuun alguh (Argentiinu, Braziilii, Kosta-Rika). Čilis opastusvuozi algavuu 1. kevätkuudu, а Kubal da Meksiekas — syvyskuun allus.
Avstrualies da Uvves Zelandies lapset alletah opastuo pakkaskuun lopus — tuhukuul[3].
Afriekan mualois opastusakalenduarat erotah. Ezimerkikse, Suvi-Afriekan tazavallas da Tanzuanies opastusvuozi algavuu pakkaskuul, Sudanas — kevätkuul, Alžiiras, Tunisas, Jegiptas, Marokos, Efioupies, Somalis, Nigeries — syvyskuul.
Azies sežo ei ole samua algupäiviä. Ezimerkikse, 1. syvyskuudu opastusvuozi algavuu Kitais, Mongoulies, Kazahstuanas, Kirgiizies, Tadžikistuanas, Turkmienies, 2. pakkaskuudu — Singapuras, kevätkuun enzimäzinny päivinny — Suvi-Koreis, 1. sulakuudu — Korein rahvahan demokruattizes tazavallas, oraskuul — Tailandas, kezäkuul — Filippinoil, heinykuul — Indies da Nepalas da muijal[3].
Ven’al
Opastus jatkuu opastusvuvven aigah školan yhtes kluasas, korgeiškolan da keskiammattiopiston yhtel kursal.
Ven'al oapstusvuozi očnois opastundas algavuu 1. syvyskuudu, "Tiijonpäivänny". Ga opastuslaitoksen piätökses opastusvuvven algu voijah siirdiä, ga ei enämbiä migu kahtekse kuukse[5].
Očno-zaočnoin opastundan allus piättäy opastuslaitos.
Opastusvuozi loppuu opastuspluanan mugah, kudaman hyväksyy opastuslaitos[1]. Školan loppukluasois opastusvuozi loppuu loppuattestacieh[6].
Opastuskierrot
Školis
Ven’an Federacien opastukseh nähte -zakonan mugah[7] školat voijah iče piättiä opastuskierdolois — opastuo opastusnelländeksien, -kolmandeksien libo bimestroin mugah[8]. Moizii vuvven juandutaboi on muailman toizisgi mualois[9].
Nelländekset
Nelländessistiemas opastusvuozi jagavuu nelläh ozah[10]:
- enzimäine nelländes — syvyskuus ligakuun loppussah;
- toine nelländes — kylmykuus talvikuun loppussah;
- kolmas nelländes — pakkaskuus kevätkuun loppussah;
- nelläs nelländes — sulakuus oraskuun loppussah.
Nelländessistieman opastundan aigah školaniekoil on loma nelli kerdua vuvves[8].
Trimestrat
Trimestrusistieman aigah opastusvuozi jagavuu moduliloih periuattehel "5 + 1": jälles viitty opastusnedälii on nedälin kestäi loma[10].
Bimestrat
Opastusvuozi jagavuu viideh opastuskaudeh (bimestrah), kudamat kestetäh seiččie nedälii, niilöin välis on viizi kaksi nedälii kestäjiä lomua. Kuvves bimestru on kezäloma, kudai kestäy kaksi kuudu[8].
Kolledžois da korgeiškolis
Keskiammattiopistolois da korgeiškolan opastuslaitoksis opastusprocesan yksikönny on semestru (libo opastuskauzi) (fran. semestre sanas lat. sēmestris (*secsmestris) "kuuzikuuhine"). Semestru yleismieles on vuvven puoliško. Opastuskavven — semestran lopul on tutkindokauzi[11].
Lomat
Opastusvuodeh kuulutah lomatgi — se on opastusprocesan aigu, konzu ei ole opastundua[2].
Lomien kestuo miärätäh opastusstandartois.
Huomavukset
- ↑ 1 2 Вопрос: Что такое календарный год, что такое учебный год? Корректно ли говорить о "полугодиях" учебного года применительно к временным периодам с сентября по декабрь и с января по август и издавать приказы о выплате стипендий учащимся в соответствии с указанными временными рамками? (ответ службы Правового консалтинга ГАРАНТ, декабрь 2013 г.). base.garant.ru. Kačondan päivymiäry: 22. syvyskuudu 2025.
- ↑ 1 2 Сфера образования — документация. docs.istina.msu.ru. Kačondan päivymiäry: 22. syvyskuudu 2025.
- ↑ 1 2 3 4 5 По школьному календарю: когда начинается учебный год в разных странах (неопр.). Forbes.ru (3. syvyskuudu 2024). Kačondan päivymiäry: 22. syvyskuudu 2025.
- ↑ Как устроен учебный год в разных странах мира: где-то начинается в январе, а где-то летние каникулы – всего месяц, gol.ru (31 elokuudu 2022). Kačondan päivymiäry: 22. syvyskuudu 2025.
- ↑ Учебный год начинается 1 сентября \ 2025-2024-2023 год \ Акты, образцы, формы, договоры \ КонсультантПлюс. www.consultant.ru. Kačondan päivymiäry: 22. syvyskuudu 2025.
- ↑ Статья 59. Итоговая аттестация \ КонсультантПлюс (неопр.). www.consultant.ru. Kačondan päivymiäry: 22. syvyskuudu 2025.
- ↑ Статья 28. Компетенция, права, обязанности и ответственность образовательной организации \ КонсультантПлюс (неопр.). www.consultant.ru. Kačondan päivymiäry: 22. syvyskuudu 2025.
- ↑ 1 2 3 Ирина Кочковая. Триместры, четверти, модули, биместры в школе. В чем различие?, roditeli.maximumtest.ru (5 elokuudu 2022). Kačondan päivymiäry: 22. syvyskuudu 2025.
- ↑ Как устроены школы в разных странах мира, Известия (1 syvyskuudu 2017). Kačondan päivymiäry: 22. syvyskuudu 2025.
- ↑ 1 2 Школьные каникулы 2025/2026. Расписание по четвертям и триместрам, РБК Life (18 elokuudu 2025). Kačondan päivymiäry: 22. syvyskuudu 2025.
- ↑ Семестр: что это такое, сколько месяцев длится в учебном году в колледже, ВУЗе | Университет Синергия. synergy.ru. Kačondan päivymiäry: 22. syvyskuudu 2025.
 |
|
|---|
