Magieloinvalmistajan päivy
| Magieloinvalmistajan päivy | |
|---|---|
 | |
| Tiippu | Kanzoinväline |
| Virrallizesti | Рastry Chefs Day |
| Pietäh | 3. oraskuudu |
| Piendy | käyndy magieloin mavun oppimizih, muasteriopastuksih da ammattikilboih |
Magieloinvalmistajan päivy (ven. Де́нь конди́тера, angl. Рastry Chefs Day) on magieloinvalmistustevolližusalan ruadajien jogavuodehine ammattipruazniekku, kudamua pietäh 3. oraskuudu.
Magieloinvalmistajan päivän ilmestymine liittyy Kogo Nevvostoliiton magieloinvalmistustevolližusalan tiijollizen tutkimusinstituutan perustamizeh Nevvostoliitos vuvvennu 1932[1][2][3].
Pruazniekan roindan histourii
Magieloinvalmistamizen taijon alguperä menöy syväle muinažuoh da on lujah kiini mejen aktiivizeh käyttöh, a sit zuaharipeskun, kuduan enzikerdua opastuttih suamah zuaharikordehen mehus Indies nenga vevvennu 850 meijän aijanluguu.
Magieloinvalmistamizen taijon ilmestymine da levei leviendy algavui Itualies XV vuozisuan loppupuolel — XVI vuozisuan allus. Enne sidä suurin oza magielois tuodih Jevrouppah Päivännouzupuolespäi, eniten aruaboispäi, kudamii pietäh magieloinvalmistamishomman perustajinnu Muinazes muailmas. Sana ven. "кондитер" rodih itualienkielizes "candière"-verbis, kudai merkiččöy "keittiä zuaharis", sendähgi riimalazet keittäjii kučuttih täl sanal. Yhtelläh myöhembi, konzu tämä taido lähti leviemäh XVIII vuozisual Jevrouppua myö, moizii muasteriloi ruvettih kuččumah "konditoroikse", jällel — "konditeroikse". Sillozen aijan magieloinvalmistamishomman piäsuavutuksii oli muijotuksen löydämine, sen hyvyös ruvettih pastamah droždeipiirualoi[1][4].
Enzimäzet marmeluadat roittih Ristupohodoin aigua Lähäzeh Päivännouzuh. Griekkalazet magieloinvalmistajat huomattih, gu nostua rauduastielois päivypastoh fruktumehut, ilmu niis vedäy liijat viet da net sajetah. XX vuozisual jevrouppalazet marmeluadan valmistajat ruvettih sih ližiämäh Ven'alpäi tuoduu kalaliimua, se andoi syömizele erinomazen mavun da sagien kogomuksen. Enzimäzien kanfiettoin ilmestyndy liittyy muinazih jegiptalazih, heil petties puutui sevoittua yhteh fiinikat, oriehat da mejet[5].
Šokoluadan histourii algvui XVI vuozisuan algupuolel Meksiekas, konzu Hristofor Kolumb oppi paikallizien eläjien juomizen kakaopuun pabulois, da se ei roinnuh hänele mieldy myö. Ga ispuanielaine valloittai Kortes ellendi šokoluadan mavun arvon da ennusti sen suurdu tuliedu aigua Jevroupas. Ven'an enzimäzet šokoluadufuabrikat perustettih XIX vuozisuan puolivälis, a jo XX vuozisuan allus muas toimi enämbi 140 fuabrikkua. Niilöis kuulužin oli "Babajevskaja".
Vuozinnu 1930 einehtevolližus Nevvostoliitos rubei ravieh kehittymäh. Parandettih lihan tuotanduo, maidosyömizien valmistandua, leivän pastandua da toizii einehtevolližuon aloi. Vuvvennu 1932 piätyi rahvahan talovuon kehittämizen enzimäine viizivuodispluanu, sen tulokset ozutettih, gu magieloinvalmistandan tevolližuon kehittämizekse ei tävvy tiedoperustua. Sih niškoi pidi kerätä da panna kundoh kai sil aijal olijat kanfiettoin, pečen’n’oin da tortien reseptat, tutkien ainehet, luguh ottajen kallehii ulgomualoispäi tuoduloi. Sentähgi piätettih avata tiijolline tutkimusinstuuttu, kudai perustui Krasnii Okt’abr’ -mageipastosfuabrikan ammattimiehien tiedoloih da maltoloih V. S. Gr’uneran johtol, kudamas myöhembi rodih tehniellizien tiedoloin douhturi da professoru[3].
3. oraskuudu vuvvvennu 1932 perustettih Kogo Nevvostoliiton magieloinvalmistandan tevolližuon tiijolline tutkimusinstituuttu. Jällespäi juuri sil päiväl ruvettih pidämäh Magieloinvalmistajan päiviä[2].
Vuozien 1940 allus instituutan ammattimiehet yhtes alan toizien azientiedäjienke piästettih ilmoih enzimäzet yhtenmugazet Reseptukogomukset da tehnolougiellizet ohjavot pečen’n’an da priädniekköin tuotandoh niškoi.
Pruazniekan piendytavat
Magieloinvalmistajan päivy ei kyzy noudamah päivän piendän erinomazii perindölöi. Sih huolimattah äijis mualois movvas on kävvä magieloin mavun oppimizih, muasteriopastuksih da ammattikilboih parahan magieloinvalmistajan valličemizekse.
Sinäpiän mielyttäi lahju kaikile magieloinvalmistajile ollah keitändypetin erilazet vehkehet, pastanduastiet, ammattiperedniekku, sertifikuatat ostoksih erialalaukois sego magieloinvalmistamizen taijon nerokkahien da kuulužien muasteriloin opastuksih.
Mieldykiinittäjät toziaziet
- Chupa Chups on ainavo n’amu, kudai oli kosmosas. Vuvvennu 1995 Mir-orbiittustansien kosmonaftat kyzyttih työndiä heile n’amuu. Chupa Chups ozuttihes turvallizimakse jälgisyömizekse painottomukses.
- Magieloinvalmistajan päivyvuoro keskimiärin kestäy 16 čuassuu, 12 kudamis häi on alalleh jalloilleh. Moine ruado tarviččou kestämisty, toinah sentähgi magieloinvalmistajien keskes on äijy miesty[6].
- Ven'al mageipastostevolližus rubei kehittymäh Pedri Suuren haldivoiččemizen aigua. Samal aigua algai tulemah magieloinvalmistajua endizis muaorjis. Ezimerkikse, muanruadai Nikolajev muaorjuos osti kaiken oman perehen da järjesti hyvinmenijän abrikossupastilan valmistajan perehyhtymyksen Moskovas. Hänen poijat, tuatan dielon perinyöt, otettih ičelleh Abrikosovat-sugunimen. Ligakuun vallankumovuksen jälgeh mageipastoslaitokset kanzallistettih da Abrikosovien fuabrikku nimitettih "Babajevskoikse"[7].
- Kuulužin ven’alaine n’amu on kaikiletiettävy Linnun maido -n’amupakkavus. Ihan allus se oli tortu, kudamua valmistettih Rot Front -fuabrikal. Sen valmistamizen sekrietty peittyy agar-agar -ainehes, kuduadu suajah veziheinis da kudai on želatiinan vastinehenny Suvi-Aazien eläjile[8].
- Mondu vuozisadua tagaperin tortu oli pyöryžy leiby — sangei plekku, hyvin pastettu mollembas puoles[6][9].
Huomavukset
- ↑ 1 2 Сегодня, 3 мая в России отмечается День кондитера. Комбинат питания. Kačondan päivymiäry: 5. kylmykuudu 2025.
- ↑ 1 2 Сладкий праздник — День кондитера. Северо-Кавказский федеральный университет. Kačondan päivymiäry: 5. kylmykuudu 2025.
- ↑ 1 2 День кондитера в России. Что за праздник и как его отмечают. gastronom.ru. Гастроном (02.05. 2023). Kačondan päivymiäry: 5. kylmykuudu 2025.
- ↑ 5 самых известных кондитеров: чем они покорили свет (англ.). femina.in. Kačondan päivymiäry: 5. kylmykuudu 2025.
- ↑ День кондитера. Пекарь и кондитер. Kačondan päivymiäry: 5. kylmykuudu 2025.
- ↑ 1 2 Интересные факты про кондитеров, торты и конфеты. Фабрика упаковки. Kačondan päivymiäry: 5. kylmykuudu 2025.
- ↑ Мармеладная фамилия. article.unipack.ru (1. heinykuudu 2016). Kačondan päivymiäry: 5. kylmykuudu 2025.
- ↑ Как появился торт «Птичье молоко» /История знаменитого московского десерта из СССР (28. elokuudu 2019). Kačondan päivymiäry: 5. kylmykuudu 2025.
- ↑ 13 интересных фактов про День кондитера. 100-Фактов.ру. Kačondan päivymiäry: 5. kylmykuudu 2025.
Kirjalližus
- Шарифулин Сергей Ринатович, Курагина Алина Викторовна. Факторы успешности кондитерского дела // Сервис в России и за рубежом. — 2017. — С. 102—114.
- Канарская З.А., Хузин Ф.К., Ивлева А.Р., Гематдинова В.М. Тенденции развития технологии кондитерских изделий // Вестник Воронежского государственного университета инженерных технологий. — 2016.
- Маринова Людмила Михайловна. Современные тенденции в пищевой промышленности России // Промышленность: экономика, управление, технологии. — 2013. — С. 79—82.
- Сучкова Е.В. Развитие познавательного интереса обучающихся к профессии «Повар, кондитер» через конкурсные технологии // Научные исследования в образовании. — 2009.
- Вислоухова Светлана, Шевчук Алла. Кондитерские изделия нового поколения // Наука и инновации. — 2017. — С. 30—33.