Muailman čerepuahan päivy
| Muailman čerepuahan päivy | |
|---|---|
 Логотип | |
| Tiippu | Ei-virralline |
| Virrallizesti | World Turtle Day |
| Merkičys | Yhteiskunnan huomavon kiinittämine čerepuahoin luvun vähenemizen probliemoih |
| Pandih alguh | vuvvennu 2000 |
| Alguhpanii | Amierikan čerepuahoin pellastusyhtistys |
| Pietäh | joga vuottu |
| Päivymiäry | 23. oraskuudu |
| Liittyy | eläintiedoh |
Muailman čerepuahan päivy (англ. World Turtle Day) on ei-virralline pruazniekku, kudamua pietäh joga vuottu 23. oraskuudu. Se pandih alguh vuvvennu 2000 Amierikan čerepuahoin pellastusyhtistyksen alguhpanos (American Tortoise Rescue). Sen tarkoituksennu on yhteiskunnan huomavon kiinittämine čerepuahoin luvun vähenemizen probliemoih[1].
Perustandan histourii
Amierikan čerepuahoin pellastusyhtistys perustettih vuvvennu 1990 Kalifournies molodoloin luonnontutkijoin Sjuzan Tellem da Maršall Tompsonan alguhpanos. Kerran kezoirannal kävelles hyö löyttih heikkoloi da laihtunuzii hiekkumuan čerepuahan poigazii. Molodoit pellastettih niidy da piätettih omistua elaijan nämmien elättilöin avutandale[2]. Malibus Amierikan čerepuahoin pellastusyhtistyksen piäfatieran tyveh avattih suuri reabilitaciikeskus, kus volont’uorat hoijetah heikkoloi da voimattomii elättilöi, kazvatettih nuorii elättilöi, ku suas sit piästiä niilöi välläle. Ei-kaupallizen yhtistyksen perustandas sai pellastua enämbi 3000 elättii. Sjuzan Tellem da Maršall Tompson nevvotah čerepuahoin ižändöi ymbäri muailmua, ollah yhtehizes ruavos kanzallizien puustoloin, elättihuonuksien da abukeskuksienke. Vuvvennu 2000 tiedomiehet kehoitettih pidiä 23. oraskuudu Muailman čerepuahan päiviä[2]. Alguhpano kannatettih da terväh čerepuahoin pruazniekkua ruvettih pidämäh kogo muailmas.
Perindöt
Tavan mugah Muailman čerepuahan päivänny pietäh pruazniekku- da opastuspidoloi, akcieloi, luvendoloi, muasteripajoi.
Kirjastoloih da školih tullah nerokkahat čerepuahoin ižändät. Hyö tuvvah omii elättilöi, sanellah mielenkiinittäjii toziazieloi niilöis da omua neruo elättilön piendäs. Lapsih niškoi luajitah temuattizii kižoi, kilboi da kvestoi, taido- da dokumentufil’moin kaččomizii. Sego voijah pidiä kilbu "parahas čerepuahan ruutas". Ven'al monien pidoloin piähengenny on vahnu viizas Tortilla — nevvostolazen kirjuttajan Aleksei Tolstoin Kuldaine avain libo Buratinon Šeikkalut -pitkänsuarnukerdomuksen piähengi.
23. oraskuudu rahvas tavoitellah olla čerepuahan lihua syömättäh, kiemurdelijoin kuvii da niilöin pansarilois azuttuloi luajilmuksii ostamattah[1].
Niilöis kohtis, kus elätit munitah jäiččii, pietäh ekolougiizi akcieloi alovehien kabrastamizes.
Mielenkiinittäjät toziaziet
Muailmas on 357 lajii čerepuahua. Enin oza lajiloi on Amierikan Yhtysvallois, Meksiekas, Indies, Indonezies, Braziilies[3]. Ven'al on nelli lajii: keski-aazien čerepuahu, jevroupan suočerepuahu, ruskeikorvučerepuahu da loittozen päivännouzun čerepuahu[4].
Luonnos čerepuahat eletäh järvilöis, jogilois, suoloil, hiekkumualois, mečis, mägipaltieloil, merirannikkoloil, valdumerilöis. Ga toiči niidy voibi nähtä linnan puustoloin vezistölöis. Ižändät, kudamat ei tahtota enämbiä pidiä huoldu elättilöis, työtäh niidy tegolambiloih da jogiloih. Moskovas da Moskovan alovehel sit on ruskeikorvučerepuahua da jevroupan suočerepuahua[5]. Elätit harjavutah linnan elokseh. Viluloin tulduu net peitytäh mudah da uinotah talvekse, a lämmän aigua suajah maimazii, löpšölöi da ruakkulajihizii, lämmitäh rannal, nostah sangieloih parzih da kivilöih.
Meričerepuahoil on oma pruazniekku — Muailman meričerepuahan päivy. Sidä pietäh joga vuottu 16. kezäkuudu. Päivy ei ole petties vallittu — 16. kezäkuudu vuvvennu 1909 oli roinnuhes amierikkalaine tiedomies, gerpetoulogu, ekoulogu, meričerepuahoin ammattimies Arči Karr. Kaiken ijän häi tutki meričerepuahoi, niilöin pezoitundukohtii da siirdoloi[6]. Vuvvennu 1956 Karr piästi ilmah kniigan ven. «Наветренная дорога», kudamas kiinitti huomavuo monien kiemurdelijoin lajiloin häviemizen varavoh ristikanzan toimindan periä. Tiedomiehen nimen on suannuh rauhoitettu aloveh Floridan päivännouzurannal — Kanzalline Arči Karran nimine koskemattoman luonnon rauhoitettu aloveh. Joga vuottu 16. kezäkuudu muailman eri mualois pietäh erilazii akcieloi. Nenga vuvvennu 2017 Jumeirah Group -laitos Dubain čerepuahoin reabilitacien projektan hantuzis piästi Persien lahteh 40 nuordu volont’uoroin pellastettuu elättii[7].
Huomavukset
- ↑ 1 2 Когда отмечают Всемирный день черепахи в разных странах. 4lapki.com (2023). Kačondan päivymiäry: 22. sulakuudu 2024.
- ↑ 1 2 American Tortoise Rescue. About (англ.). American Tortoise Rescue. Kačondan päivymiäry: 22. sulakuudu 2024.
- ↑ Виды черепах. Черепаха. ру. Kačondan päivymiäry: 23. sulakuudu 2024.
- ↑ Какие черепахи живут и водятся в России. Хомкин.ру (3. pakkaskuudu 2019). Kačondan päivymiäry: 23. sulakuudu 2024.
- ↑ Александр, Карина. В московском пруду обнаружили редких черепах, «кандидатов» в Красную книгу города. Комсомольская правда (25. kezäkuudu 2022). Kačondan päivymiäry: 23. sulakuudu 2024.
- ↑ Международный день морской черепахи. Музей Фелицына (16. kezäkuudu 2022). Kačondan päivymiäry: 22. sulakuudu 2024.
- ↑ Суворова, Арина. Шипят как змеи и весят 400 килограммов: день морских черепах отмечают во всём мире. Сетевое издание "Горсайт" (16. kezäkuudu 2022). Kačondan päivymiäry: 22. sulakuudu 2024.
Ližiä kirjalližuttu
- Гандольфи, С. Альдабра. Черепаха, которая любила Шекспира / С.Гандольфи; пер. с итал. К.Тименчик; ил. Е.Андреевой. — М.: Самокат, 2010.
- Гуржий, А. Аквариумные черепахи / А. Н. Гуржий. — М.: Дельта М, 2001.
- Карр, А. Наветренная дорога. — М.: Государственное издательство географической литературы, 1961.
- Хайфилд, Э. К. Черепаха: наглядное пособие по уходу / Э. К. Хайфилд, Н. Хайфилд; пер. с англ. — М.: Эксмо, 2010.
- Чегодаев, А. Е. Сухопутные черепахи: Содержание. Разведение. Кормление / А. Е. Чегодаев. — М.: Аквариум, 2001.
- Я познаю мир: Детская энциклопедия. Змеи, крокодилы, черепахи / Авт. Д. В. Семенов. — М.: АСТ, 2002.