Muailman n'amuloin päivy

Muailman n'amuloin päivy
Merkičys	mageitaijon merkičyksen huomuamine rahvaskul’tuuras, magieloinvalmistajien da einehtevolližuon ruadajien panoksen tunnustamine hyvien tundoloin suandah
Pietäh	magieloin suvaiččijat, magieloinvalmistajat, tehnolougat, mageilaitoksien ruadajat, lapset da ruavahat ymbäri muailmua
Päivymiäry	18. ligakuudu
Piendy	uuzien n'amuloin mavun oppimizet, ekskursiet mageifuabrikkoi myö, magieloin valmistusmuasteriopastukset, kižaprogrammat opastuslaitoksis, festivualit
Perindöt	mageilaitoksien uuzien tuottehien ezitys, kauppuakciet laukois, tiedokilvoin da kilbailuloin piendy, mieldykiinittäjien toziazieloin ilmoittamine n’amulois joukkoviestimis
Liittyy	Amierikan Yhtysvalloin kanzallizeh n'amuloin päiväh (4. kylmykuudu) Kanzoinvälizeh šokoluadukanfiettoin päiväh (28. talvikuudu) Muailman šokoluadan päiväh (11. heinykuudu)

Muailman n'amuloin päivy (ven. Всеми́рный день конфе́т) on Ven'an ei-virralline ligakuun 18. päivän pruazniekku, kudai on omistettu kaikenjyttymile mageipastoksile da n'amuloile. Tämä päivy yhtistäy ei vai magieloin suvaiččijoi, daigi kaikkii toizii, ket välittömästi otetah ozua magieloin tuotandoprotsessah, luguh ottajen tehnolougoi, magieloinvalmistajii da einehtevolližuon ruadajii. Pruazniekku on hyvä mahto merkitä magieloinvalmistamistaijon merkičysty rahvaskul’tuurah niškoi sego sen roulii hyvien tundoloin suamizekse.

Pruazniekan nimeh kaččomattah, tädä päiviä tietäh vai Ven'al. Toizis mualois toizinnu päivin pietäh muudu magieloile omistettuu pruazniekkua.

Pruazniekan histourii

N’amuloin roindan histourii lähtöy syväs muinažuospäi — oli se enämbi kolmie tuhattu vuottu tagaperin Muinazes Jegiptas. Yhty versiedy myö, enzimäzet n’amut roittih petties, konzu höžäkkö orju kaudoi kerras mondu astettu, muga segah mendih mezi, oriehat da inžirat. Päivypastos jäyhtynyh hyväletulii massu sissäh rodih magiekse, ga kodvazen mendyy magieloinpaimendajat jo ei voidu olla da eliä ilmai tädä suvaičussyömisty.

Päivännouzupuolen rahvas merkittäväh tabah vaikutettih magieloinvalmistamizen taijon kehittämizeh. Net samazet aruabat enzimäzinny ruvettih käyttämäh zuaharii n’amuloi valmistamizes, piäainehinnu endizelleh oldih eriluaduzet oriehat da kuivatut puunandimet. Ven’al luajittih karamielii kl’onasiropas, mejes da puatokas. Sillozel aijal kai magiet oldih luajitut käzil da puaksuh roittih magieloinvalmistamiskoitteluloin tuloksikse.

N’amuloin histories tärgei rouli oli XVI vuozisuan jevrouppalazil aptiekkariloil. Sana "kanfiettu" (confetto) lainattih itualien kieles, se tuli käyttöh juuri XVI vuozisual. Mielenkiindostu on se, gu ihan allus n’amuloi myödih aptiekois liečerohtoloinnu — zuaharoittuloi puunandimii tarittih rygemisty da nervoinliikkumistu vastah. Kanfiettu-sana kai rodih latinankielizes confectum-sanas — mi merkiččou "valmistettu (valmis) rohto".

XIX vuozisuan algupuolel Jevroupas ilmestyttin enzimäzet ammattimageipastoslaukat, kudamis kakaovoin’amuloi valmistettih käzin. Myödih niilöi čomis rauduvakois da ylen kalleheh. Myöhembi magieloinvalmistajat ellendettih, gu on jygei myvvä suuri pakkavus sen kallehuon periä, da keksittih joga n’amun eriže kiärimizen.

XIX vuozisuan Ven'al oli olemas mieldykiinittäi perindö: pruazniekkumurginoile kučutut neidizet peitoči pandih n’amuu omih sumkazih. Sellitys sil oli nengoine, sillozel aijal muas ei vie olluh kanfiettufuabrikkua, da gostien joga vastahottoh niškoi magieloinvalmistajat luajittih n’amuu oman receptan mugah, kudai piettih peitos.

Tapahtumat da piendytavat

Muailman n'amuloin päivänny pietäh äijy kaikenjyttymiä tapahtumua kui ruavos, mugai kois perehenke. Pruazniekan piendän piäpidoloi ollah uuzien na’mulajiloin oppimizien järjeständy, kudamil suau oppie eri valmistajien uuttu tuotehtu da vallita mieldy myö paras magiene. Kuulužikse roittih ekskursiet magieloinvalmistamisfuabrikoile, kus kävyjät iče voijah nähtä n’amuloin luajindua da oppie niilöin maguu kerras konveijeraspäi lähtiettyy.

Levien käytön suadih n’amuloin valmistamizen muasteriopastukset, kudamil ozanottajat opastutah nerokkahien magieloinvalmistajien johtol luadimah šokoluadutr’ufelii, karamielii da muudu magiedu. Moizii opastuksii järjestetäh kui ammatillizis magieloinvalmistamisškolis, mugai kauppu- da vesseldyskeskuksis.

Ven’an opastuslaitoksis pietäh temuattistu piduo lapsile. Kižaprogrammoih kuulutah n’amuloin histouries sanelemizet, tiedokilvat eri n’amulajiloin tiedämizes da teatruezitykset. Moizien pidoloin ozannu ollah n’amuloin muvvos olijoin kiitändylahjoin lapsile juandu, mi panou heidy hyvin iččie vedämäh, sanua kuulemah da opastumah.

Ven’an linnois tädä päiviä pietäh aiga leviesti. Ezimerkikse, vuvvennu 2025 Voskresensk-linnas päivy piettih Cementnik-kul’tuurutalois kižaprogrammal, kudamah tuldih lapset, kel on jo kuuzi vuottu. Festivualii järjestetäh eri alovehil, niilöil magieloinvalmistamisalan ezittäjät ozutellah omii suavutuksii.

Ven’an suurimat magieloinvalmistamizen biznessujoukot käytetäh tädä päiviä omien suavutuksien ezittämizekse. Yhtistetyt magieloinvalmistajat -biznessujoukko tavan mugah ezittäy tuotandostatistiekkua, kudai kuvuau läs 800 erilastu n’amulajii.

Kirjastolois pietäh tiijonandajua piduo, kudamil sanellah na’muloin yhtevykses kirjalližuoh.

Joukkoviestimis ezittämine

Muailman n'amuloin päiviä leviesti ezitelläh Ven’an joukkoviestimis. Federuallizet tiijoituskeskukset jullatah pruazniekan histouriedu koskijua materjualua sego magieloih liittyjiä mieldykiinittäjiä šeikkua. Parlamentskaja-lehti jo tavan mugah ilmoittau pruazniekan piendäs, sanellen n’amuloin vahnanaigastu histouriedu da kehitysprotsessua.

Alovehellizet joukkoviestimet jullatah matarjualua paikallizis magieloinvalmistajis laitoksis da niilöin vuitis pruazniekan piendäh. "AltaPress" keriäy mieldykiinittäjiä toziaziedu suvaittavis magielois, alovehellizet parluamentujulgavot sellitetäh magieloinvalmistamistevolližuon merkičysty talovuoh niškoi.

Erigastronoumiijulgavot käytetäh tädä päiviä opastusmaterjualoin julguamizekse n’amuloin oigies valličendas, niilöin hyövys da pahuos. Magieloinvalmistajat laitokset järjestetäh kilbua da akciedu sociualuverkolois omien tuottehien edehpäi menemizekse.

Yhtenjyttymät pruazniekat

Magieloin pruazniekkoin kalenduaras on mondu päivymiäriä, mit ollah omistettu erilajiloin mageipastoksile. Kanzalline n'amuloin päiviä Amierikan Yhtysvallois (angl. National Candy Day) pietäh 4. kylmykuudu da se on amierikkalaine vastineh ven’alazele ligakuun 18. päivän pruazniekale. Amierikan Yhtysvallois tämä päivymiäry ei ole vallittu petties — kylmykuudu perindöllizesti pietäh pruazniekkuostoskavven allunnu, konzu magieloi tuaste ostetah lahjoikse.

Kanzoinväline šokoluadukanfiettoin päiviä pruaznuijah talvikuun 28. päivänny da se piädykauti omistettih šokoluadutuottehile. Tämä pruazniekku korrostau šokoluadukanfiettoin erinomastu sijua kaikkien magieloin keskes da niilöin roulii uvvenvuvven lahjoinnu.

Eri paikku on Muailman šokoluadan päiväl, kuduadu pietäh 11. heinykuudu. Enzimäzinny tädä päiviä piettih francielazet vuvvennu 1995 , sen jälgeh pruazniekan piendy levii ymbäri muaimua myö. Mieldykiinittäjiä on se, gu šokoluadal on äijy erilastu päivymiäriä: 10. pakkaskuudu — Kargien šokoluadan päivy, 28. heinykuudu — Maidošokoluadan päivy, 13. syvyskuudu — Kanzoinväline šokoluadan päivy, 22. syvyskuudu — Valgien šokoludan päivy.

Sugupruazniekkoi mugaže ollah Magien puatokan da päivännouzupuolen magiezien päivy, kudamua pietäh samannu päivänny — 18. ligakuudu. Kaikkii nämmii päivii yhtistäy tahto merkitä magieloinvalmistajien taiduo da ilo, kudamua tuvvah magiet ristikanzan jogapäiväzeh elokseh.

Huomavukset