Muailman valgeipiänaizien päivy
| «Muailman valgeipiänaizien päivy» | |
|---|---|
 Valgeipiänaizien paruadu Moskovas vuvvennu 2015 | |
| Tiippu | Ei-virralline pruazniekku |
| Toizin | «Valgeipiänaizien päivy» |
| Merkičys | kaikkien naizien taza-arvožuksien puolistandu tukkien värih kaččomattah |
| Pandih alguh | vuvvennu 2001 |
| Pietäh | kanzoinväline päivy |
| Päivymiäry | 31. oraskuudu |
| Piendy | joga vuottu, 31. oraskuudu |
Muailman valgeipiänaizien päivy on ei-virralline kaikkien valgeipiänaizien pruazniekku, kudamua pietäh 31. oraskuudu.
Histourii
Enzikerdua pruazniekkua piettih Amierikan Yhtysvallois. Virrallizen versien mugah sen alguhpanijannu oldih amierikkalazet valgeipiänaizet — juristat da advokuatat, kudamii kolliegat miehet ei pietty taza-arvozinnu tukkien värin periä, duumaittih, ku hyö ollah mielettömät da kebjeimielizet. Miehet oldih tiel heijän virrois siirryndäle, vihjattih heijän intellektan alahazeh tazoh. Sit valgeipiänaizet piätettih puolistua omii oigevuksii da vuvvennu 2001 perustettih pruazniekan ičen kunnivokse[1]. Vuvvennu 2003 associacii kiändyi UNESCON puoleh da kyzyi andua pruazniekale kanzoinvälizen stuatusan. Hos ei kai yhtistykseh kuulujat kannatettu tädä alguhpanuo, Valgeipiänaizien päivy rodih kuulužakse da sen perindöt levittih muailmua myöte. Pruazniekkua piätettih pidiä 31. oraskuudu, tossupiän jälles Kanzoinvälisty feminizman päiviä[2].
Toizen versien mugah pruazniekku rodih jälles vuvvennu 2001 amierikkalazen komiedien enzi-ozutandua ven. «Блондинка в законе» (angl. Legally Blonde), kudai andoi potkastuksen Muailman valgeipiänaizien päivän perustandah[3]. Samannu vuon piettih enzimäine valgeipiänaizien kulgu Amierikas.
Ven'al Muailman valgeipiänaizien päiviä pietäh vuvves 2006[2].
Pruazniekan perindöt
Pruazniekan tarkoituksennu on puolistua naizien oigevuksii tukkien värih kaččomattah da vastustua stereotiippoi valgeipiänaizis. Vuvves 2001 valgeipiänaizet aktivistat pietäh temuattizii pidoloi omien oigevuksien puolistamizekse: konsertoi, festivualiloi da flešmoboi da vastavuksien kuulužien valgeipiänaizienke. Hyö roijah pagizutettavinnu, sanellah omua neruo steoreotiippoin vastustamizes da kai otetah ozua intellektuallizih kižoih.
Briljantukandu
Ven’al pietäh ainavuo palkindon juandupiduo valgeipiänaizih nähte — "Briljantukandu" (ven. «Бриллиантовая шпилька»). Palkindon suajikse ehoitetah valgeipiänaizii, kudamien suavutukset ruavos da persounallizes elokses roittih paistavimikse mennytvuon[2].
"Briljantukannan" enzimäine palkičendupido piettih 31. oraskuudu vuvvennu 2006 Novinskois passuažas da se sovitettih Merilin Monron roindupäiväkse[4]. Arvostelukundu valličči parahii yheksäs piänominacies: "TV-juondajat valgeipiänaizet", "Pajattajat valgeipiänaizet", "Ozuttelijat valgeipiänaizet", "Menestynnyöt valgeipiänaizet", "Akat valgeipiänaizet", "Valgeipiänaizet sportas", "Valgeipiänaizet vallas", "Arvostetut valgeipiänaizet" da "Valgeipiänaizien ammattisuvut". Palkindon enzimäzien voittajien joukos oldih Kristina Orbakaite, Jana Poplavskaja, Dana Borisova, Jelena Korikova da Julija Čepalova[5].
Valgeipiänaizih näh
- Muinas-Grecies valgiet tukat merkittih puhtahuttu da koskemattomuttu. Juuri sendäh suvaičuksen jumalua Afrodiittua puaksuh kuvattih pelvaspiänny[6].
- Moudu valgieloih tukkih rodih vie Muinas-Riimas. Silloi äijän myödih valgieloi tegotukkii.
- Enne kruaskan roindua naizet eri taval opittih vallata tukkii, ezimerkikse, käytettih izvestivetty libo oldih päivypastos.
- Luonnolline valgieloin tukkien väri ristikanzoil on harvah. Vuozinnu 2020 pelvaspiärahvahii oli kaikkiedah 14 % kogo miäräs. Tiedomiehien mugah vuvvekse 2202 valgeipiänaizii toinah ei rodei, sendäh ku heijän geenu on recessiivine[7].
- Statistiekan mugah enin kaikkie pelvaspiänaizii eläy Ven'al, Germuanies, Suomes, Ruočis, Norviegies da Daanies[8].
Samanluaduzet pruazniekat
- Muailman mustupiänaizien päivy
- Muailman ruskeipiälöin pruazniekku
Huomavukset
- ↑ Всемирный день блондинок 2025: какого числа, история и традиции праздника, Комсомольская правда. Kačondan päivymiäry: 10. sulakuudu 2025.
- ↑ 1 2 3 31 мая — Всемирный день блондинок: как у белокурых дам появился свой праздник, Известия (30 oraskuudu 2023). Kačondan päivymiäry: 3. oraskuudu 2025.
- ↑ 31 мая: какой сегодня праздник, что было в этот день, РИАМО (31 oraskuudu 2024). Kačondan päivymiäry: 10. sulakuudu 2025.
- ↑ Церемония вручения премии «Бриллиантовая Шпилька». web.archive.org. Новинский пассаж (31. oraskuudu 2006). Kačondan päivymiäry: 10. sulakuudu 2025.
- ↑ Блондинки vs брюнетки: вечная борьба за мужское внимание, РИА Новости (31 oraskuudu 2010). Kačondan päivymiäry: 10. sulakuudu 2025.
- ↑ Блондинки. История мифа. Доброе утро. 1 канал (31. oraskuudu 2012). Kačondan päivymiäry: 10. sulakuudu 2025.
- ↑ Сегодня Всемирный день блондинок. Love Radio. Официальный сайт радиостанции. Kačondan päivymiäry: 10. sulakuudu 2025.
- ↑ Блондинки в цифрах и фактах, Аргументы и факты (2 kezäkuudu 2016). Kačondan päivymiäry: 10. sulakuudu 2025.