Priäžän etnopuusto
| Priäžän etnopuusto | |
|---|---|
 Priäžän etnopuuston tulenduaiduveräi tervehtyssanoinke karjalan kielel da Priäžän kylän keskučan kartanke. | |
| Perustandan päivymiäry | 2021 |
| Perustai | Priäžän etnokul'tuurukeskus |
Priäžän etnopuusto on Karjalan tazavallan Priäžän kylän keskučas olii entopuusto, kudamas etnizeh tabah on azetettu puuhizet lebokoda, laučat, infolavvat, elättilöin kuvat.
Yleistiijot
Terveh-nimelline etnopuusto luajittih Priäžän keskuččah vuvven 2021 lopus juuri sih kohtah, kunne puaksumbah kaikkie tullah rahvas. Sit ymbäri ollah kai tärgiet laitokset: Priäžän piirin hallindo, Etnokul'tuurukeskus, Joudoaijan da luomisruavon keskus, Priäžän piirin rahvahan kirjoihpanenduozasto, hoteli da avtoubussoin azetuskohtu.
Etnopuustos ollah suuret puuhizet aiduveriät, kudualoih on kirjutettu tervehtyssana karjalan kielel da pandu Priäžän keskučan kartu; puuhine lebokodaine da puuhizet elättilöin kuvat; kaksipuolizet infolavvat, kudamis on tieduo Priäžän piiris da Priäžän kyläs, Priäžän čupun luonnos da nähtävyksis. Niilöis on saneltu Priäžän čupun kuulužimis kohtis: Karjalan Kielen Kois da sit ruadajas kielipezäs, Kindahan kyläs, vahnois časounois da äijis toizis objektois. Ezile tullah karjalazet šipainiekat, riäpöi, muur'oi, garbalo da muut aziet.
Etnopuustos on luajittu čuurutroppazet, istutettu uuttu puudu, tuhjostu da kukkua. Illoil puuston alovehel da lebokodazes palau tuli.
Priäžän etnopuusto on luajittu Priäžän mua – hyvinvastuandan čuppu -projektan aigua, kudaman kannatti vuvvennu 2021 Karjalan tazavallan Kanzallizen da alovehellizen poliitiekan ministerstvu kannatettavien alovehien etnokul'tuurizen kehityksen projektoin hantuzis. Nämmien projektoin suurimii ruadoloi on Karjalan alovehien etnokul'tuurine kehitys da kandurahvahien kielien nägyvih tuondu da kehitändy.
Meil niilöis kohtis, kunne rakkahembal tullah turistat, ei nävy objektois meijän muan kanzalline koloriittu. Priäžän piirin keskučasgi – Priäžäs ei olluh mostu simvoulistu kohtua, kudamas gost'at da paikallizet eläjät voidas nähtä da ellendiä, mi on Karjal iččenäh, sendäh oli piätetty luadie Priäžän keskuččah Etnopuusto, kudamah tulduu jogahine vihjuas piirin kanzallizet eričykset, sellittäy projektan todevutandua Priäžän etnokul'tuurukeskuksen johtai Tatjana Seppänen.
— Oma Mua, 2022, № 33
Puuston lähäl, Priäžän Etnokul'tuurukeskuksen taloin luo, on luajittu lagevo kyykkäh kižuandah niškoi. Se azuttih Etnokul'tuurukeskuksen ruadajat Karjalaine rokotus -projektan aigua. Hyö puaksuh sanellah gostile vahnas karjalazes kižas, ozutetah, kui pidäy kižata sih, a omua kižakohtua tännesäh ei olluh. Sih kohtah Etnokul'tuurukeskuksen ruadajat azetettihgi kyykkäinfolavvan.
Etnopuusto on hyvänny huogavokohtannu priäžäläzih da kylän gostih niškoi. Sit ainos on rahvastu: nuorembua da ruavahembua polvie lapsienke da vunukoinke, tulou käymäh turistuagi.
Gallerei
Kirjalližus
Jelena Ruppijeva. Etnopuusto Priäžän kylän keskučas // Oma Mua. — 2022. — 31. elokuudu (№ 33).