Tulemjärven zavodu
| Tulemjärven zavodu | |
|---|---|
 | |
| Perustanduvuozi | 1896 |
| Salbuanduvuozi | 1934 |
| Perustajat | Suuri kniäzi P'otr Nikolajevič |
| Sijoittumine |
 Ven'an valdukundu: Kolatselgy |
| Ala | Metallurgii |
| Tuotando | čugunu |
| Verkosivusto | Завод, затерянный в лесах |
 Медиафайлы на РУВИКИ.Медиа | |
Tulemjärven zavodu on Anuksen gubernien čugunanvalanduzavodu, kudai perusti Kolatsellän kylän lähäl Stal'-vuitinomistaiyhtymys vuvvennu 1896.
Erähänny vuitinomistaiyhtymyksen alguhpanijois oli Suuri kniäzi P'otr Nikolajevič, kudai sai tuatas perindökse zavodan projektudokumentat da muan vuogrusobimukset, sendäh dokumentois puaksuh suau nähtä zavodan tostu nimie — ven. «Петровка». Raudua sulatettih zavodal vuvven 1899 heinykuus vuvven 1902 heinykuussah da se ei kattanuh tuotandon rakendamizeh piettylöi dengoi. Kaikkiedah zavodal valettih 51 8866 puudua čugunua.
Yleistiijot
Tulemjärven zavodu oli Kollasjoven oigiel rannal, enzimäine ravvan sulatuspäčči rubei ruadamah sie vuvvennu 1899. Alguainehennu oli gematiittu, silloi sidä sanottih "rauduläpettäjäkse", sen lähimäine kaivospaikku oli Kollasjoven vastazel rannal kahten kilometrin piäs zavodan korpusois Rogoselläl. Kaikkeidah kaivoksii oli kahtenkymmenen mail. Zavodan tilat vallittih sendäh, ku olis huogehembi da kebjiembi vediä ainehtu kaidua raududorogua myöte zavodale, sen lähevyös Ojajärves, kudaman kauti sai ielleh vediä tuottehii vetty myöte, da mieles oli luadie ruadudorogu Luadogan järven randassah, kuspäi sidä reknailtih vediä Piiterih. Rakendamizen kululoin pienendämizekse zavodan ymbäristös luajittih kirpiččy- da mečänpiluanduzavodat.
Čugunan valanduzavodal oli nygyaigaine laittehisto: germuanielazen Heinrich Stöhler -laitoksen kaupperan apparuatat, Ochellhauser Maschinenfabrik-Jiegen -laitoksen ilmupumpumašinat, a šamottukirpiččiä (tulenkestäi kirpiččy) tilattih anglielazel Cowen and Co -laitoksel. Suuren ravvan sulatuspäčin projektiiruičči tundiettu Berlinan inženieru Lyrmen. Päčin poltoainehennu käytettih hiildy. Rauduruvan olenduehtoloin täh (kivilajin kovus, ruvan vähätehokkus da niilöin olendu 90 gruadusil taivahanrandah päi) sidä ei suannuh suaja toizin, sih pidi kallehii muanalazii kaivosruadoloi, sendäh gematiitan louhindu rodih hyövymättömäkse.[1] Vuvvennu 1902 kaččomattah suavun rauduruvan da varustetun hiilen suuruoh, zavodu salvattih, syynny oli čugunan hindoin kaksikerdaine alenemine XX vuozisuan allun muailman kriizisan aigah. Ga kiinnostus minerualuresursoin tutkimizeh täl alovehel ei sammunuh. Vuvvennu 1913 zavodan ižändäkse rodih Teodor Bonaventurovič Teplic, kudai vuvven 1915 lopus möi sen kunnivokanzalazele S. G. Meijerale.[2]
Karjalan avtonoumizen socialistizen nevvostotazavallan Rahvahan Komissuaroin Nevvoston ponnistuksis Tulemjärven zavodal metallurgiituotandon elävyttämizekse ruvettih äijäl investiiruimah dengua, ga se ei tuonnuh nägyvii tuloksii, sen periä vuvvennu 1934 zavodu uvvessah salvattih. Suuren Ižänmuallizen voinan aigah Kolatselgy oli suomelazien vallan al, a zavodan huonukset kärzittih menetyksii. Iellizinny vuozinnu zavodal piettih lapsien da nuorižon kezäleirit. Murennuh tevolližusrakenduksien kompleksu sit pandih valdivollizile kirjoile histourien da kul'tuuran mustomerkinny.[3] Vuvvennu 2014 kanzoinvälizen ven'a-suomelazen projektan aigua kunnostetul zavodan alovehel luajittih Tulemjärven ruadurudapuusto[4], kudai on Priäžän kanzallizen piirin etnokul’tuurukeskuksen alazennu. Tänäpäi zavodan tevolližushuonuksis suau kaččuo pajua, šiht’arnua ruoččilazen ravvan sulatuspäčin alustanke, valandukorpussu, kattil- da mašinozastot. Toizis huonuksis jiädih vaiku alustat.
Zavodan alovehen ielolii histourii
Tietäh, ku enne tädä zavodua ruadoi Tulemjärven partikul'arnoi zavodu, kudai oli nostettu Tulemajoven suuh Gilkožan kylän lähäl vie vuvvennu 1762.[5]. Sen ižändänny oli Anuksen kupču Ivan Stepanovič Barmin, kudai oli vie Tivdien teräsrauduzavodan da erähien piluandumelliččöin omistajannu Karjalas. Häi pidi zavodan rakendamizeh da ruadamizeh 34 272 rubl'ua. Tämä laitos oli ainavonnu yksittäzenny zavodannu Anuksen gubernies, kudai nostettih erilazien tuottehien valmistamizekse.
Barminan vuvvennu 1779 pietyn kirjoilepanendan mugah zavodal oli plotin, vuvvennu 1777 nostettu sulatuspäčči, puindufuabriekku kolmen pal’l’anke da nellän gornanke, juakkorifuabrikku kolmen pal’l’anke, sepän paja stoikkien da kirvehien luajindah nähte, zadodal sežo oldih piluandu- da jauhondumelličät.
Zavodu heitti ruandan sendäh, ku ei olluh tarbehekse varua da ruadajua, alovehelhäi ruttoh rubei kehittymäh meččytevolližus. Vuvvennu 1778 zavodu heitti ruandan. Täkse päiviä Barminan zavodan jälgii ei jiännyh.[6]
Kačo ližäkse
- Anuksen kivenlouhinduzavodat
Huomavukset
- ↑ Шеков К. В., Потравнов А. Л. История геологических изысканий Тулмозерского месторождения железной руды (Северное Приладожье) // Труды КарНЦ РАН. No 1. Сер. Геология Докембрия. 2015.
- ↑ Потравнов А. Л., Хмельник Т. Ю. А. И. Грибушин. Тулмозерский железоделательный завод // Дорога горных промыслов. Петрозаводск. 2014. С. 315—325.
- ↑ Список объектов культурного наследия (памятников истории и культуры), находящихся на территории Ведлозерского сельского поселения, Пряжинского муниципального района (по состоянию на 10.04.2015 г.) // Объекты историко-культурного наследия Карелии. Официальный портал ГКУ РК "Республиканский центр по государственной охране объектов культурного наследия. URL: http://monuments.karelia.ru/ob-ekty-kul-turnogo-nasledija/spiski-ob-ektov-kul-turnogo-nasledija-po-rajonam-i-poselenijam-respubliki-karelija/prjazhinskij-r-n/spiski-ob-ektov-po-poselenijam/vedlozerskoe-sel-skoe-poselenie/ Arhiivukoupii 12 talvikuudu 2013 Wayback Machine
- ↑ Рудный парк «Тулмозерье» на сайте Института геологии Карельского научного центра РАН. URL: http://miningroads.ru/tulmo.html Arhiivukoupii 4 kevätkuudu 2016 Wayback Machine
- ↑ Баданов В. Частное предпринимательство в Карелии. Kačondan päivymiäry: 1. kevätkuudu 2014. Arhiviiruittu originualaspäi 5. kevätkuudu 2014
- ↑ Васильевская О. И. Частная металлургия Карелии в середине XYIII века (1730—1770 гг.). Государственное издательство Карело-Финской ССР. Петрозаводск. 1954. С. 60 — 64.