Udmurtien kielen päivy
| Udmurtien kielen päivy | |
|---|---|
 | |
| Tiippu | Kanzalline pruazniekku |
| Virrallizesti |
ven. День удмуртского языка udm. Удмурт кыллэн нуналыз |
| Pietäh |
 Udmurtii |
| Päivymiäry | 27. kylmykuudu |
Udmurtien kielen päivy (udm. Удмурт кыллэн нуналыз) on pruazniekku, kudai on omistettu udmurtien kielele. Sidä pietäh joga vuottu 27. kylmykuudu. Sinäpiän vuvvennu 2001 hyväksyttih zakon "Udmurtien tazavallan valdivollizis kielis da Udmurtien tazavallan kanzoin toizis kielis" (ven. «О государственных языках Удмуртской Республики и иных языках народов Удмуртской Республики»)[1].
Histourii
Udmurtien kielen päivän piendäs piätettih vuvvennu 2018 Kogo Udmurtien Удмурт Кенеш -liiton alguhpanos alovehienvälizes tiedo-praktiekallizes konferensies Jelabugas, kudai piettih Kogo Ven'an udmurtien rahvahan kerähmön 100-vuozipäivän nimeh[2]. А 27. kylmykuudu vuvvennu 2001 Udmurtien tazavallan zakonoinluajindas miärättih udmurtien kielen stuatussu valdivollizennu kielenny.
Pruazniekan tarkoituksennu on udmurtien kielen popul'arizacii. Se ozuttau kielen čomuttu da omaluadužuttu, nostau udmurtien kielen arvuo da azemua yhteiskunnas[3]. Udmurtielazet sanotah omua kieldy «анай кыл» (muamankieli), sendäh ku muaman maijonke lapsi suau suvaičuksen oman rahvahan, kul'tuuran, kielen da kodoimuan kohtah.
Piendy
Udmurtien kielen päivänny kaikes tazavallas pietäh erilazii pruazniekku- da opastuspidoloi. Ezimerkikse, Udmurtien tazavallan kanzallizes kirjastos sinäpiän pietäh vastavuksii uuzien kirjuttajienke, ezitetäh uuzii kniigoi, pietäh ozutteluloi da luvendoloi kielen da alovehen histouries[4]. Udmurtien kanzallizes teatras täkse päiviä luajitah uuzii muuzikku- da literatuuruozutelmoi. Kanzallizes muzeis pietäh temuattizii ekskursieloi, muzeinurokkoi da muasteripajoi.
""Terveh!" Udmurtien kieli kaikkih niškoi!"[5] on akcii, kudai on omistettu udmurtien kieleh da sen eričyksih tuttavumizele, tavan mugah sidä pietäh Iževskas Kanzoin ystävystalois, piirilöin kirjastolois da kul'tuurutalolois.