Vasilii Gordejev
| Vasilii Arhipovič Gordejev | |
|---|---|
 | |
| Roindupäivy | 1878 |
| Roindukohtu | Pelduozen kylä, Pyhärven kylänevvosto, Priäžän piiri |
| Kuolendupäivy | 1942 |
| Kuolendukohtu | Permin aloveh |
| Toimindu | cantastoria |
Vasilii Arhipovič Gordejev (1878—1942) on Pyhärven kylänevvoston Pelduozen kyläs rodivunnuh karjalaine runonpajattai.
Eloskerdu
Vasilii Gordejev oli roinnuhes köyhäs paimoin perehes Pyhärven kylänevvoston Pelduozen kyläs. Häi oli ainavonnu poijannu tuatal. Školah ei käynnyh. Kuni ei täydynyh 20 vuottu — ruadoi kois, kalasti. Sen jälles oli meččyruadolois, ruadoi muadu. Konzu roittih kolhozat, rubei ruadamah kolhozas. Vasilii Gordejev kirjutti omas elokses:
Vuvvennu 1933 rodih kolhozu, dai minä menin kolhozah. Kolhozas ruavoin raznoid ruavot. Niitin, kalat sain kolhoznikoil. Talven vein kolhoznoih drovat.
— Karjalan runonpajattajat:verkotiedosanakniigu
Vasilii Gordejeval oli kolme lastu: kaksi tytärdy da poigu.
Voinan aigua häi oli evakos Molotovan (Permin) alovehel Kononovan kyläs. Sinne kuoligi vuvvennu 1942.
Vasilii Gordejevan jälgeläzet tuodih Pelduozen kyläspäi Pyhärven kyläh runonpajattajan koin. Se tässäh seizou kyläs Čarniemen uuličal.
Runonpajatandu
Runonpajatanduneron Vasilii Gordejev oli suannuh tuatas, kudai oli suarnansanelijannu. Vasilii Gordejevan died'oi — Kosti Gordein Häkki — oli runonpajattajannu.
Vuvvennu 1871 Suomen rahvahanrunohuon keriäjät Aksel Borenius da Arvid Genetz oldih tutkimustmatkas Karjalas, kudaman aigah käydih lyydiläzillyö. Pelduozes hyö vastavuttih Vasilii Gordejevan died'oinke Kosti Gordein Häkinke da kirjutettih hänes runuo.
Vasilii Gordejev tiezi eeppizii da uinotuspajoloi, suarnoi Smuuttuaijas, Pedri Suures da starinoi Ilja Muromcas.
Karjalan tiedokeskuksen Kielen, literatuuran da histourien instituutas on ruokos materjualu, kudaman kirjutettih Vasilii Gordejevas nevvostolazet tiedomiehet, konzu vastavuttih hänenke vuvvennu 1938.
Vuvvennu 1939 Vasilii Gordejev otti ozua runonpajattjien da suarnasanelijoin kerähmöh Petroskois[1].