Vojennoin kiändäjän päivy
| Vojennoin kiändäjän päivy | |
|---|---|
 Vojennoin kiändäjän päiväle omistettu kirjuozuttelu | |
| Tiippu | Vojennoi pruzniekku |
| Virrallizesti | Vojennoin kiändäjän päivy |
| Merkičys | vojennoloin perindölöin säilyttämine |
| Päivymiäry | 21. oraskuudu |
Vojennoin kiändäjän päivy on vojennoi pruazniekku, kuduadu pietäh 21. oraskuudu Ven'an ammundutarbehil varustettulois voimis.
21. oraskuudu vuvvennu 1929 Nevvostoliitos allekirjutettih käsky Ruadajien da muanruadajien Ruskien Armien johtokunnan vojennoi kiändäi -arvonimen luajindas.[1][2]. Ammattipruazniekku rodih vuvvennu 2000 Vojennoin yliopiston loppenuzien ehoitukses[3].
Ammatis
Vojennoi kiändäi on ammattimies, kudai ylen hyvin maltau vierastu kieldy, azuu kiännöksii aijoinalallizen, kiirehen merkičyksenke, tiedäy, kui ruadua erilazien vojennoloin dukumentoinke, nerokkahasti kiändäy oigevuontiijollizii dokumentoi da kättöohjavoloi joga vojennoih koneheh niškoi, maltau vojennoloi terminöi. Bojutoimiloin aigua vojennoit kiändäjät ollah tiijustelijoinnu, yhtytäh plenahotettuloin kyzelylöih, yhtes toizienke kävväh tiijustelumatkoih vihaniekan tagavoh[4].
Histourii
Ven'an enzimäine laitos, kuduan toimindah kuuluttih rahvahienkeskihizien välilöin sellittämine, vojennoloin da diplomuattoin ruaduo koskijoin dokumentoin kiändämine da kudaman ruadajien kunnas oli kiändäjiä, oli perustettu vuvvennu 1549 da sil oli ven. Посольский приказ-nimi. Sih kuului 22 kiändäjiä da 17 sellittäjiä, silloi vie ei olluh jagamistu vojennoloih da siivilikiändäjih[1].
Vuvvennu 1885 Ven’an valdukunnan ulgoazieloin ministerstvan Aazien departuamentan pävännouzupuolen kielien ozaston tyves järjestettih oficieroin kursit, kudamil valmistettih vojennoloi kiändäjii. Kursiloin kuundelijan sijale pyrgijiä oli ei vähembiä kymmendy hengie. Kursiloin opastuksen loppenuot sluužittih Keski-Aazies da Kavkuazal ujezdoin piälikkölöin, suudopiätöksien täyttäjien da rajavardoičusofiecieroin virrois[4][5].
Vuvvennu 1899 Vladivostok-linnas avattin Päivännouzupuolen instituuttu, kus ruvettih opastamah päivännouzupuolen tiedijiä ammattimiesty, kuduat maltettih japounien, kitain, mongoulien, mantšurian da korein kieldy, myöhembi ližättih vie tibietan kieli[1]. Valmistettihgi kiändäjii vojennoloin okrugoin štuaboin vierahien kielien kursiloil. XIX vuozisual da XX vuozisuan allus Ven’an armien korgeviman oficierukunnan suurin oza maltoi vierahii kielii[4]. Vuvvennu 1911 Kavkuazan, Amuran alovehen da Turkestanan vojennoloin ogrugoin štuaboin tyveh avattih eriomazet vojennoloin kiändäjien ogrugoin valmistusškolat.
21. oraskuudu vuvvennu 1929 Rahvahan komissuaran vojennoloin da meriazieloin sijahine da Nevvostoliiton vallankumovuksellizen vojennoin nevvoston piälikkö Iosif Unšliht allekirjutti käskyn Ruadajien da muanruadajien Ruskien Armien johtokunnan vojennoi kiändäi -arvonimen luajindas[6].
Tuhukuus vuvvennu 1940 Moskovan toizen valdivollizen vierahien kielien pedagouguinstituutan tyves oli avattu Vojennoi tiedokundu korgien vojennoin opastuslaitoksen stuatusanke[7]. Kezäkuus vuvvennu 1940 oli azuttu Kogo Nevvostoliiton päivännouzupuolen kielien instituutan vojennoi tiedokundu.
Sulakuus 1942 Moskovan toizen valdivollizen vierahien kielien pedagouguinstituutan päivänlaskupuolen kielien vojennoi tiedokundu muutettih Ruskien Armien vierahien kielien vojennoikse instituutakse[8]. Sih rubei kuulumah Kogo Nevvostoliiton päivännouzupuolen kielien instituutan vojennoi tiedokundu. Suuren Izänmuallizen voinan aigua sie valmistettih da työttih frontale da vojennoloih haldivoloih läs nelliä puolenke tuhattu vojennoidu kiändäjiä da tostu ammattimiesty.
Elokuus vuvvennu 1956 Vierahien kielien vojennoi instituuttu oli hajotettu, sen vojennoloin kiändäjien valmistandutehtävät annettih Vojennoin diplomuattuakadiemien vierahien kielien tiedokunnale. Vuvvennu 1963 Vierahien kielien vojennoi instituuttu avattih uvvessah.
Nevvostoliiton hajuomizen jälgeh instituuttu rubei kuulumah Rahavaroin da oigevuon vojennoih akadiemieh. Vuvvennu 1999 Ven’an Federacien Puolistusministerstvan Vojennoin yliopiston piälikön käskys päivannozupuolen da päivänlaskupuolen kielien tiedokunnat yhtistettih Vierahien kielien tiedokundah[7].
21. oraskuudu 2000 Vojennoin yliopiston loppenuot ehoitettih ruveta pidämäh Vojennoin kändäjän päiviä.
Vojennoloi kiändäjii valmistetah Vojennois yliopistos vierahien kielien tiedokunnal Kiännös da kiännöstiedoteorii -ammatin mugah[5][3][4]. Vojennoloi kiändäjii käytetäh tiijusteluruadolois da plenahotettuloin kyzelylöis sego otetah tiijustelijoin joukkoloih vihaniekkoin tagavos toimindah niškoi[9].
Kuulužat vojennoit kiändäjät
- Berežkov Valentin Mihailovič
- Kremer Ilja Sem’onovič
- Bezimenskii Lev Aleksandrovič
- Hitruk F’odor Saveljevič
- Maršak Samuil Jakovlevič
- Etuš Vladimir Abramovič[6]
- Strugackii Arkadii Natanovič
- Ovčinnikov Vsevolod Vladimirovič.
Huomavukset
- ↑ 1 2 3 День военного переводчика в России, РИА Новости (21 oraskuudu 2022). Kačondan päivymiäry: 7. oraskuudu 2025.
- ↑ Илья Полонский. День военного переводчика. Военное обозрение (21. oraskuudu 2018). Kačondan päivymiäry: 7. oraskuudu 2025.
- ↑ 1 2 Дмитрий Гончарук. Звание «Военный переводчик» появилось в СССР 90 лет назад, Парламентская газета (21 oraskuudu 2019). Kačondan päivymiäry: 7. oraskuudu 2025.
- ↑ 1 2 3 4 День военного переводчика. РОО «Московские Суворовцы» (21. oraskuudu 2024). Kačondan päivymiäry: 7. oraskuudu 2025.
- ↑ 1 2 Образование. Военный университет имени князя Александра Невского Министерства обороны Российской Федерации. Kačondan päivymiäry: 7. oraskuudu 2025.
- ↑ 1 2 21 мая – День военного переводчика. Владимирская областная научная библиотека. Kačondan päivymiäry: 7. oraskuudu 2025.
- ↑ 1 2 Их оружие – слово. Красная звезда (31. pakkaskuudu 2025). Kačondan päivymiäry: 7. oraskuudu 2025.
- ↑ Военный институт иностранных языков отмечает 82-ю годовщину со дня образования. Военный университет имени князя Александра Невского Министерства обороны Российской Федерации (1. tuhukuudu 2022). Kačondan päivymiäry: 7. oraskuudu 2025.
- ↑ Юлия Анасян. Какой сегодня праздник: календарь на 21 мая в России и мире, народные приметы, кто родился, Lenta.RU (21 oraskuudu 2024). Kačondan päivymiäry: 7. oraskuudu 2025.
Kirjalližus
- Банман П. П. Военный переводчик: требования и компетенции // Вестник Пермского национального исследовательского политехнического университета. Проблемы языкознания и педагогики. — 2015. — № 2 (12).