Bogdanov Nikolai Ivanovič

RUWIKIS on kirjutustu toizis ristikanzois sugunimenke Bogdanov.

Bogdanov Nikolai Ivanovič
Roindupäivy	17. pakkaskuudu 1904(1904-01-17)
Roindupaikku	Piiteri
Kuolendupäivy	1959
Mua	Nevvostoliitto
Tiedoala	vepsän kieli
Ruadokohtu	Karjalan tiedokeskuksen Kielen, literatuuran da histourien instituuttu
Opastus	Leningruadan valdivonyliopisto
Oppiarvo	filolougientiedoloin kandiduattu
Tiedo-ohjuaju	Dmitrii Bubrih
Tundietah	enzimäine vepsän kielen tutkii
Arvonimet da palkindot

Nikolai Ivanovič Bogdanov (ven. Николай Иванович Богданов; 17. pakkaskuudu vuvvennu 1904, Piiteri – 1959) on enzimäzii vepsäläzii tiedomiehii, filolougientiedoloin kandiduattu, Ven'an tiedoakadiemien Karjalan tiedokeskuksen Kielen, literatuuran da histourien instituutan vahnin tiedoruadai.

Eloskerdu

Nikolai Bogdanov oli roinnuhes 17. pakkaskuudu vuvvennu 1904 Piiteris. Hänen tuattah Ivan Jefimovič Bogdanov (1855-1920) oli vepsäläine Šimjärven kyläspäi rodužin (ven. Шимозеро). Seiččietostuvuodizennu händy, ku oli suadu kirjoihmenemättäh, työttih Piiterih žestiruavon muasterin opastuksih. Opastuksen suaduu rubei ruadamah Aleksandran valanduzavodal. Bogdanovan muamah Jevgenija Romanovna (1864–1938) oli rodužin Tverin alovehelpäi. Kaksikymmenvuodizennu jäi leskekse da lapsenke muutti Piiterih, kus ruadoi käskyläzenny da lapsenkaččojannu rikkahis perehis. Konzu hänel oli 38 vuottu meni miehele Ivan Jefimovič Bogdanovale, kudai oli jo kahteh kerdah leskenny da kudamal jo oli omua nelli lastu.

Nikolai Bogdanovan lapsus- da nuorusaigu meni vepsäläzes Šimjärven kyläs, ku pereh Piiterispäi tuatan Aleksandran valanduzavodal viijenkymmenen vuvven ruattuu, muutti sinne. Ivan Jefimovič Bogdanov nosti kyläh kaksikerroksizen taloin.

Nikolai Bogdanov loppi kirikköprihodan školan, sit toizen kluasan školan Anuksen ujezdan M’atusovo-kyläs, kudai oli 150 kilometrin piäs omas kyläspäi.

Viizitostuvuodizennu kevätkuul vuvvennu 1919 Bogdanov algoi ruavon Šimjärven voulostin sodakomitietan kirjuttajannu. Vuvven 1920 syvyskuus oli opastajannu oman kylän alguškolas. Vuvvennu 1922 rubei ruadamah Särgijärven školas, ku škola omas kyläs salvattih. Sit voimatui muamah da Bogdanov jätti ruavon da kiändyi järilleh kodikyläh. Yheksän vuvven aigah ruadoi eri kohtis, oli myöjänny, hallindon ozanottajannu, laskunpidäjänny.

Vuvven 1931 kezäskuus ruadoi Šimjärven alguškolas. Kodvazen mendyy händy pandih školan inspektorakse, sit Oštan opastusozaston piälikökse.

Vuozien 1930 allus ruvettih kehittämäh vepsän kirjukieldy. Vepsän kielen tutkimizekse luajittih tutkimusmatkoi, niilöi oli Šimjärven čupulgi. Karjalan tiedomies Irina Vinokurova huavuau, ku juuri silloi Bogdanov tuttavui tutkimusmatkois olluzih vepsän kielen tutkijoih, kudamat kezäl vuvvennu 1931 luajittih vepsän kielen kirjaimikon latinalazel pohjal da enzimäzen vepsän kielen aberin. Nikolai Bogdanov Oštan opastusozaston piälikönny rubei kuulumah vuvvennu 1932 perustettuh vepsän kielen komissieh Leningruadan alovehen Uuven kirjaimikon komitietan tyves. Sen johtajannu oli M. M. Hämäläinen. Sit Bogdanov oli vepsän kielen komissien piälikönny.

Enämbän vuottu Bogdanov oli vepsän kielen ozaston johtajannu da opastajannu, se avattih Lodienoin pedagougutehnikuman tyveh vuvvennu 1933. Bogdanov opasti sie vepsän kieldy da muantieduo.

Bogdanov tarvičči korgeiškolan opastuksen da 30-vuodizennu, vuvvennu 1934, piäzi opastumah Leningruadan valdivonyliopiston suomi-ugrilazele tiedokunnale, kudaman loppi vuvvennu 1938. Sih aigah, konzu häi rubei opastumah, häi oli naizis da hänel oli kolme tytärdy.

Opastundan aigah otti ozua vepsänkielizien opastuskniigoin luadimizeh, kiändämizeh da kohendamizeh. Yhtes toizien kirjuttajienke valmisti luvendukniigan – veps. “Lugend knig” toizeh kluassah niškoi. Bogdanov kiändi opastusnevvon da arifmietiekan kaksi opastuskniigua, kaksi muantiijon opastuskniigua da luonnontiijon opastuskniigan. Häi sežo valmisti vepsänkielizet opastuskniigat ei-tävvellizeh keskiškolah nähte: «История народов СССР» da luvendukniigan viijendeh kluassah nähte. Ga niilöis painettuloinnu ei ole tieduo.

Elokuul vuvvennu 1938 Bogdanovua työttih ruadoh Karjalan kul'tuuran tiedo-tutkimuksellizeh instituuttah, eznimäi ruadoi fol'klouruozastos nuorembannu tiedoruadajannu, sit siirdyi ruadoh kieliozastoh, sen johtajannu häi oli vuvven 1941 heinykuussah.

Bogdanov on Suuren Ižänmuallizen voinan ozanottai. Loppi voinan diviizien piälikön abuniekannu 29. kevätkuudu vuvvennu 1946. Otti ozua bojuloih Karjalan frontal, 2. Valgoven'an frontal Pol'šas da Germuanies.

Sulakuul vuvvennu 1946 uvvessah rubei ruadamah instituutas.

Pakkaskuul vuvvennu 1947 rodih istituutan tiedosekretarikse. Samal aigua rubei pidämäh luvendoloi vepsän kieles Petroskoin valdivonyliopistos suomi-ugrilazen filolougien laitoksel.

23. kezäkuudu vuvvennu 1952 puolisti kandiduatan väitösruavon, sen aihiennu oli "Vepsän kielen sanaston kehittämizen histourii" (ven. "история развития лексики вепсского языка). Hänen väitösruavon ohjuannu oli Dmitrii Bubrih. Nevvostoliitos se oli enzimäine väitösruado vepsäläzih nähte. Estounien fennougristu Paul' Ariste nenga kirjutti hänes:

N. I. Bogdanov oman väitösruavonke on pionieru täl alal. Hänen ruado ližäkse on kirjutettu kieles, kudai on vähembi tutkittu migu toizet lähimäzet sugukielet. "Vepsän kielen sanaston kehittämizen histourii" on enzimäine väitösruado sit kieles iččenäh.

Syvyskuul vuvvennu 1952 Bogdanov rodih Karjalan tiedokeskuksen Kielen, literatuuran da histourien instituutan kielitiijon ozaston piälikökse.

Kuoli vuvvennu 1959 viijenkymmenen viijen vuvven ijäs.

Bibliogruafii

On läs kymmenen tiedokirjutuksen kirjuttajannu.

• К вопросу о возвратных формах глагола в диалекте Михайловского сельсовета Олонецкого района К-ФССР // Известия Карело-Финской научно-исследовательской базы Академии наук СССР. Петрозаводск, 1947. N 1/2. С. 132–134.
• К вопросу о начинательных глаголах в вепсском языке // Известия Карело-Финской научно-исследовательской базы Академии наук СССР. Петрозаводск, 1948. N 2. С. 87–88.
• К истории вепсов: (по материалам топонимики) // Известия Карело-Финского филиала Академии наук СССР. Петрозаводск, 1951. N 2. С. 24–31.
• История развития лексики вепсского языка: автореферат диссертации на соискание ученой степени кандидата филологических наук. Л., 1952. 22 с.
• Лексика как источник истории народа // Труды Карело-Финского филиала Академии наук СССР. Петрозаводск, 1954. Вып. 1. С. 60–67.
• Вепсский язык на данном этапе развития // Научная сессия, посвященная подведению итогов научно-исследовательских работ Филиала за 1953–1954 гг., 18–21 апр. 1955 года: тез. докл. Петрозаводск, 1955. С. 169–171.
• Rohkeita ja neuvokkaita: Kertomuksia sodasta / Suom. A. Kempi; Tait. L. Korostyshevski. Petroskoi: Karjalan ASNT: n valtion kustannusliike, 1956. 69 s.: kuv. [Богданов Н. О смелых и умелых.]
• К вопросу о древнем значении слова kansa в прибалтийско-финских языках // Известия Карельского и Кольского филиалов Академии наук СССР. Петрозаводск, 1958. Т. II. С. 166–169.
• Вепсский язык на современном этапе развития // Прибалтийско-финское языкознание. Петрозаводск, 1958. С. 76–82.

Palkindot da arvonimet

• Ruskien Tiähten kunnivomerki
• Medali "Germuanien voittamizes"
• Medali "Ruadourholližuos"
• Karjalan avtonoumizen socialistizen nevvostotazavallan Korgeviman Nevvoston Prezidiuman kunnivokirjaine.

Huomavukset

Kirjalližus

• Ученые Карельского научного центра Российской академии наук : биографический словарь / [гл. ред. А. Ф. Титов; отв. ред. Ю. В. Савельев; редкол.: Е. В. Жирнель и др.]. — 3-е изд., доп. и перераб. — Петрозаводск : Карельский научный центр РАН, 2012. — 419, [1] с. ; 21 см. — Библиогр. в конце ст. — Алф. указ.: с. 409—419. — ISBN 978-5-9274-0490-2