Järventagaine luonnonsuojelualoveh
| Järventagaine luonnonsuojelualoveh | |
|---|---|
 Fennoskandien suurin kuuzi | |
| kategourii — Kanzoinväline luonnonsuojeluliitto — IV Lajiloin libo eländykohtien huoldoaloveh) | |
| Piätiijot | |
| Pinduala | 2658 gektuarua |
| Perustandupäivy | 31 pakkaskuudu 1991 vuvvel |
| Sijoittumine | |
| 61°49′52″ с. ш. 34°32′25″ в. д.GЯO | |
| Mua | |
| Aloveh | Karjalan tazavaldu |
| Lähimäine linnu | Petroskoi |
 Медиафайлы на РУВИКИ.Медиа | |
Järventagaine luonnonsuojelualoveh on valdivolline kompleksuluonnonsuojelualoveh alovehellizen merkičyksenke Karjalan tazavallas Petroskoin linnukannas da Onieganrannikon piiris, eriže suojeltavu luonnonaloveh.
Yleistiijot
Luonnonsuojelualoveh perustettih Karjalan avtonoumizen socialistizen nevvostotazavallan Ministroin nevvoston azetukses № 19 vuvvennu 1991 pakkaskuun 31. päivänny[1].
Luonnonsuojelualoveh on sijoitunnuh Oniegujärven luodehozas Petroskoin lahten koillisozan rannal da Baranii Bereg -niemimuan alovehel Petroskoin linnukunnas da Onieganrannikon piiris. Karjalan piälinnaspäi Petroskoispäi sih on 17 kilometrii[2].
Luonnonsuojelualovehen kogonaine pinduala on 2658 gektuarua[1].
Suojelualovehen luonnon eričykset
Luonnonsuojelualovehen mua on monimutkalline javokselline muanpindu moniluguzien kallivokerrostumienke. Jälgimäzen jiätikön jälgilöi löydyy morienoin kerrostumis (0,5—10,0 metrii). Alovehel kazvau enimyölleh vahnua kuuzikkuo da pedäjikkyö, on sežo koivikkuo, lepikkyö da suoloi[1].
Luonnonsuojelualovehel kazvau Fennoskandien suurin kuuzi. Sen löyttih ekoulogat vuvvennu 2010 da silloi smietittih, ku kuuzel on 170—180 vuottu. Sen rungo diametras puun juurilluo on 1,5 metrii, a korgevuol 1,3 metrii muaspäi — 96 santimetrua. Puun korgevus on 36 metrii. Vuvvennu 2012 Kogo Ven'an Puut — elävän luonnon mustomerkit -ohjelman Komissii virrallizesti hyväksyi tämän kuuzen luonnon mustomerkikse da se otettih Ven'an pitkyigäzien puuloin luvetteluh[1].
Suojelualovehen luodehozas on Čortov stul -kohtu, geolougine luonnon mustomerki, kudamas on tulimäin luajittuloi kerrostumii, niilöil on läs 2 miljardua vuottu[1][3].
.jpg)
Käyndy
Piäzy Järventagazen luonnonsuojelualoveheh on ilmaine. Tulla sih suau Petroskoin keskučaspäi linnan da linnanymbäristön avtoubusoil, kudamat ajetah Solomannin mikroalovehen čurah da Suisarin kyläh[2].
Karjalan tazavallan Eriže suojeltavien luonnonalovehien direkcii pidäy ekskursieloi Troppu Fennoskandien suuriman kuuzen luo -nimel da luadi pättävii matkailijoin azetuskohtii kuuzen lähäl[2].
Pitkän Oniegujärven rannan da kezoirannan hyvyös Järventagaine luonnonsuojelualoveh on kuulužannu huogavokohtannu eläjien keskes[2][1].
Huomavukset
- ↑ 1 2 3 4 5 6 Особо охраняемые природные территории Республики Карелия / Министерство природных ресурсов и экологии Республики Карелия, Бюджетное природоохранное рекреационное учреждение Республики Карелия "Дирекция особо охраняемых природных территорий регионального значения Республики Карелия", Карельский научный центр Российской академии наук; [сост.: Кипрухин И. В. и др.]. — Петрозаводск : Министерство природных ресурсов и экологии Республики Карелия, 2017. — 432 с. : ил., фот. ; 25 см. — ISBN 978-5-4386-1458-6
- ↑ 1 2 3 4 Заповедная Карелия / Бюджетное природоохранное рекреационное учреждение Республики Карелия "Дирекция особо охраняемых природных территорий регионального значения Республики Карелия" — Петрозаводск : Бюджетное природоохранное рекреационное учреждение Республики Карелия "Дирекция особо охраняемых природных территорий регионального значения Республики Карелия". — 29 с.
- ↑ Легендарная Карелия. Урочище "Чёртов стул"