Kanzoinväline biolougiellizen moniluadužuon päivy

On otettu Рувики-späi
Kanzoinväline biolougiellizen moniluadužuon päivy
Международный день биологического разнообразия.jpg
Tiippu Kanzoinväline
Pandih alguh Yhtistynnyzien Kanzukundien Piäassamblein rezol’ucii
Pietäh joga vuottu
Päivymiäry 22. oraskuudu

Kanzoinväline biolougiellizen moniluadužuon päivy (toizil Yhtistynnyzien Kanzukundien kielil: angl. International Day for Biological Diversity, aruab. اليوم الدولي للتنوع البيولوجي, isp Día Internacional de la Diversidad Biológica, kit. 生物多样性国际日, fran. Journée internationale de la diversité biologique ) on Yhtistynnyzien Kanzukundien kanzoinväline päivy, kudamua joga vuottu pietäh 22. oraskuudu.

Sen pani alguh Yhtistynnyzien Kanzukundien Piäassamblei (Rezol’ucii № A/RES/49/119 19. talvikuudu vuvvennu 1994)[1], enziallus pruazniekkua piettih 29. talvikuudu, jälles siirrettih oraskuun 22. päiväkse[2].

Kuvailu

Biolougielline moniluadužus on elävien organizmoin moniluadužus: baktierielois ekosistiemoissah[3]. Biolougielline moniluadužus kannattau yhtehisty tazapainuo, turvuau kaikel tarvittaval elokseh nähte (vezi, syömine, pyzyi ilmasto, talovuolline kazvo da muu). Ezimerkikse:

  • luonnon varois rippuu suurin oza muailman bruttokanzantuotandos;
  • monih rahvahih niškoi meri on piälimäzenny elonandajannu;
  • kannetah enämbän 80 % ristikanzan syömizis;
  • muan da valdumeren ekosistiemat toimitah "uglerodan syöjinny" da muut[4][5].

Biomoniluadužuon häviemine voi suattua nälgäh, zoonozoin leviemizeh, ilmaston muuttumizeh da toizih jälgivaikutuksih[6].

Biomoniluadužuon häviemizen tärgevimät syyt ollah ristikanzan aktiivine talovuolline toimindu, luonnon varoin tolkutoi käytändy[6][4], eläjien kazvo, ylimiäräine kulutandu, ymbäristön lijastamine[7].

Kanzoinväline biolougiellizen moniluadužuon päivän tarkoituksennu on yhteiskunnan huomavon kiinittämine eläin- da kazvimuailman ezittäjien häviemizeh da pienenemizeh[8][9].

UNESCON piälimäine johtai Odre Azule[10]:

Meil pidäy perinpohjin muuttua meijän kosketustu luondoh da yhtes meijänke planietal eläjien olendoloih, ruveta planiiruimah da rakendamah toven kaikile yhtehisty muailmua

Pihaozuttelu Kanzoinvälizekse biolougiellizen moniluadužuon päiväkse Piiteri

Histourii

Biolougiellizen moniluadužus -terminy rodih vuozinnu 1970[11]. Vuozikymmenien mendyy se tuli suureh käyttöh luonnontiijon käytöndöllizel da perustehellizel alal[12].

22. oraskuudu vuvvennu 1992 Rio-de-Žaneiros hyväksyttih Konvensii biolougiellizes moniluadužuos  (ven.) (olo.[8] — kanzoinväline oigevusdokumentu biomoniluadužuon säilyttämizeh nähte[13]. 29. talvikuudu vuvvennu 1993 konvensii tuli voimah[2]. Vuvven 2025 oraskuun tiedoloin mugah sen ratificiiruičči 196 valdivuo[14].

Jälles konvensieh liityi hyväksytty Kartahenskoi bioturvalližusprotokol (2000), Nagoiskoi protokol geenuvaroin suandah da niilöin käytändäs suaduloin hyödylöin oigienmugazes da taza-arvozes jagamizes (2010), Kartahenskoih bioturvalližusprotokolah liityi Nagoisko-kuala-lumpurskoi ližäprotokol vastuolližuos da korvuamizes (2010)[2].

19. talvikuudu vuvvennu 1994 Yhtistynnyzien Kanzukundien Piäassamblei ilmoitti Kanzoinvälizes biolougiellizen moniluadužuon päiväs da hyväksyi pidiä sidä 29. talvikuudu (se on päivy, konzu Konvensii biolougiellizes moniluadužuos tuli voimah)[1]

Talvikuul vuvvennu 2000 Piäassamblei piätti siirdiä pruazniekku oraskuun 22. päiväkse (konvensien allekirjutandan päivy)[15].

Vuvvennu 2015 muailman ielolijat johtajat hyväksyttih 17 piämiäriä pyzyjän kehityksen alal (ollah kirjutettu Kačeltavis kyzymyksis pyzyjan kehityksen alal vuodessah 2030), kus erähänny piämiärii oli biomoniluadužuon hävittämizen loppemine[16].

Vuvvennu 2022 talvikuul 196 valdivuo hyväksyi Kun’min-Monreal’an kogo muailman programman biomoniluadužuon säilyttämizekse[4]. Dokumentas on 23 ruaduo luonnon varoin pyzyjäkse kehittämizekse, biomoniluadužuon säilyttämizekse, ekosistiemoin elävyttämizekse. Dokumentan ruadoloin todevuttamizekse valdivoloil pidäy kehittiä kanzallizii stratiegieloi da toimindoin pluanoi biomoniluadužuon säilyttämizekse[17].

Kniiguozuttelu Kanzoinvälizekse biolougiellizen moniluadužuon päiväkse Gus’-Hrustal’nii -linnan kirjastos

Perindöt

Joga vuottu ilmoitetah Kanzoinvälizen biolougiellizen moniluadužuon päivän tiemu. Yhtistynnyzien Kanzukundien piäsekretari piästäy ilmah kirjazen mustopäivän kunnivokse.

Sinäpiän kogo muailmas pietäh erilazii pidoloi: luvendoloi ymbäristön suojelemizes, ekolougizii pruazniekkoi, ozutteluloi[18], vezistölöin, meččien puhtastandan akcieloi da muudu.

Piästetäh ilmah sežo erillizii Kanzoinvälizele biolougiellizen moniluadužuon päiväle omistettuloi julgavoloi[2].

Päivän tiemat

  • 2002 — "Meččien biomoniluadužus"[19].
  • 2003 — "Biomoniluadužus da kurjuon vastustamine — kučut pyzyjäh kehitykseh niškoi"[2].
  • 2004 — "Biomoniluadužus: eineh, vezi da tervehys kaikkih nähte".
  • 2005 — "Biomoniluadužus: eloksen kaičus meijän muuttujas muailmas".
  • 2006 — "Puolistua biomoniluadužuttu kuivis piirilöis"[2].
  • 2007 — "Biomoniluadužus da ilmaston muuttumine".
  • 2008 — "Biomoniluadužus da muatalovus".
  • 2009 — "Invazionnoit lajit".
  • 2010 — "Biomoniluadužus kehityksen tarbehih da kurjuon vaivoin alendamizekse"[2].
  • 2011 — "Meččien biomoniluadužus".
  • 2012 — "Merien biomoniluadužus".
  • 2013 — "Vezi da biomoniluadužus".
  • 2014 — "Suariloin biomoniluadužus".
  • 2015 — "Biomoniluadužus pyzyjän kehityksen tarkoituksih"[2].
  • 2016 — "Biomoniluadužuon tieman aktualizekse roindu, rahvahan eloksen da heijän eloloin kannattamizekse"[8].
  • 2017 — "Biomoniluadužus da pyzyi matkailu".
  • 2018 — "Biomoniluadužuon toimindan 25-vuozipäivän piendy.
  • 2019 — "Meijän biomoniluadužus, meijän einehet, meijän tervehys"[7].
  • 2020 — "Meijän piätökset luonnon hyväkse".
  • 2021 — "Myö olemmo piätöksen oza #ForNature".
  • 2022 — "Yhtehizen tulien aijan kehitändy kaikkeh eläväh niškoi"[2].
  • 2023 — "Sobimuksis toimindoih: biomoniluadužuon endizeh kundoh suandu".
  • 2024 — "Rodei pluanan ozakse".
  • 2025 — "Sobu luonnonke da pyzyi kehitys".

Liittyjät päivät

Huomavukset

  1. ↑ 1 2 Document Viewer (рус.). docs.un.org. Kačondan päivymiäry: 20. oraskuudu 2025.
  2. ↑ 1 2 3 4 5 6 7 8 9 International Day for Biological Diversity - 22 May. www.cbd.int (7. kevätkuudu 2025). Kačondan päivymiäry: 20. oraskuudu 2025.
  3. ↑ Биологическое разнообразие (неопр.). www.who.int. Kačondan päivymiäry: 20. oraskuudu 2025.
  4. ↑ 1 2 3 Что такое биоразнообразие и как его сохранить? ООН Женева. Kačondan päivymiäry: 20. oraskuudu 2025.
  5. ↑ International Day for Biological Diversity | United Nations, United Nations. Kačondan päivymiäry: 20. oraskuudu 2025.
  6. ↑ 1 2 Еле живая природа. По всей планете вымирают животные и растения. Чем это грозит человечеству?, Lenta.RU (6 pakkaskuudu 2023). Kačondan päivymiäry: 20. oraskuudu 2025.
  7. ↑ 1 2 Зачем празднуют Международный день биологического разнообразия, Парламентская газета (22 oraskuudu 2019). Kačondan päivymiäry: 20. oraskuudu 2025.
  8. ↑ 1 2 3 Международный день биологического разнообразия, РИА Новости (22 oraskuudu 2016). Kačondan päivymiäry: 20. oraskuudu 2025.
  9. ↑ Иван Обухов. Какой сегодня праздник: 22 мая – Международный день биологического разнообразия, Профиль (22 oraskuudu 2023). Kačondan päivymiäry: 20. oraskuudu 2025.
  10. ↑ Международный день биологического разнообразия. ЮНЕСКО. Kačondan päivymiäry: 20. oraskuudu 2025.
  11. ↑ Власова Е. А. Содержание понятия о биологическом разнообразии в профильном курсе биологии. Ярославский педагогический вестник (2009). Kačondan päivymiäry: 20. oraskuudu 2025.
  12. ↑ Биологическое разнообразие, Большая российская энциклопедия. Kačondan päivymiäry: 20. oraskuudu 2025.
  13. ↑ Конвенция о биологическом разнообразии (рус.). www.un.org. Kačondan päivymiäry: 20. oraskuudu 2025.
  14. ↑ List of Parties. www.cbd.int. Kačondan päivymiäry: 20. oraskuudu 2025.
  15. ↑ 55/201. Конвенция о биологическом разнообразии. unisdr.org. Kačondan päivymiäry: 20. oraskuudu 2025.
  16. ↑ Международный день биологического разнообразия. ГКУ «Дирекция особо охраняемых природных территорий Санкт-Петербурга». Kačondan päivymiäry: 20. oraskuudu 2025.
  17. ↑ 22 мая: Международный день биологического разнообразия, Экологический информационный центр «Экоинфо». Kačondan päivymiäry: 20. oraskuudu 2025.
  18. ↑ Всемирный День биологического разнообразия в ГДМ, РИА Новости (21 talvikuudu 2002). Kačondan päivymiäry: 20. oraskuudu 2025.
  19. ↑ International Day for Biological Diversity - 22 May 2002. www.cbd.int (14. talvikuudu 2006). Kačondan päivymiäry: 20. oraskuudu 2025.

Kirjalližus

Linkat

Lähteh - "https://olo.ruwiki.ru/w/index.php?title=Kanzoinväline_biolougiellizen_moniluadužuon_päivy&oldid=126360958"