Natalja Pugačova

On otettu Рувики-späi
Natalja Pugačova
Наталья Яковлевна Пугачева, удм..jpg
Piätiijot
Täyzi nimi
Roindupäivy 28. ligakuudu 1935(1935-10-28)
Roindupaikku Čutužmon, Udmurtien avtonoumine socialistine nevvostotazavaldu, Ven'an federatiivine socialistine nevvostotazavaldu, Nevvostoliitto
Kuolendupäivy 26. ligakuudu 2019(2019-10-26) (83 vuottu)
Kuolendupaikku Buranovo, Udmurtien tazavaldu, Ven'a
Muat Ven'a
Toiminduvuvvet 1970-2019
Joukot Buranovskije babuški
Palkindot Udmurtien tazavallan rahvahan artistu
Tarkastettu kirjutus

Natalja Jakovlevna Pugačova (udm. Наталья апай; 28. ligakuudu 1935, Čutužmon, Udmurtien avtonoumine socialistine nevvostotazavaldu, Ven'an federatiivine socialistine nevvostotazavaldu, Nevvostoliitto — 26. ligakuudu 2019, Buranovo, Udmurtien tazavaldu, Ven'a) on Udmurtien tazavallan rahvahan artistu, Buranovskije babuški -joukon pajattai. Joukon pajattajannu otti ozua muuzikkukilbah "Jevroviidenii-2012" da sai toizen sijan. Äijät kaččojat da žurnalistat sanottih händy "mielyttävimäkse buabolois"[1].

Eloskerdu

Natalja Jakovlevna (Begiševa) Pugačova oli roinnuhes 28. ligakuudu vuvvennu 1935 Udmurtien avtonoumizes socialistizes nevvostotazavallas Čutužmon-kyläs. Hänel oli seiččie vuottu, konzu algavui Suuri Ižänmualline voinu. Natalja sih aigah loppi enzimäzen kluasan da jatkua opastustu hänel ei puuttunuh. Ligakuul vuvvennu 1941 tytön tuattua Jakov F'dorovič Begiševua otettih voinale. Kai voinuvuozien jygielöi ruadoloi joudui ruadamah muamah Jevdokija Aleksejevna. Natalja Jakovlevna musteli, ku muamua nikonzu ei olluh kois. Perehen elättämizekse häi yöt da päivät ruadoi kahtes ruavos, enin aigua lapsii ei nähnyh[2][3]. Vuvvennu 1942 Nataljan tuattah kadoi viestittäh da vaste 70 vuvven peräs, vuvvennu 2012, tytär tiijusti, kunne häi oli pandu muah, da kävyi velleskalmale Voronežah[4].   

Jälles voinua Natalja Jakovlevna rubei ruadamah kolhozas. Ei varannuh nimittumua ruaduo: oli yleisruadajannu, lypsäjänny dai žiivatankaččojannu. Konzu neidizele täydyi 19 vuottu, händy työttih ruadoh rinnal olijah kohozah, Buranovo-kyläh. Sie Natalja tuttavui oman tulien ukonke – Afanasii Afanasjevič Pugačovanke. Terväh molodoit mendih yhteh. Pereheh rodih nelli lastu[4].

Natalja Jakovlevna ijän kaiken ruadoi Buranovon kolhozas, siepäi lähtigi eläkkehele. Buabo äijän aigua vietti perehenke da kodiruadolois, heil ukonke oli suuri talovus[2].

Vuvvennu 2012 Pugačoval tovestettih vagavu voimattomus – vačan ruakku. Hos toivuo voittua taudi oli vähä, Natalja Jakovlevna suostui leikkavukseh, kudai meni hyvin. Tuliet kuuzi vuottu inehmizel ei olluh ongelmua tervehyönke, kuni vuvvennu 2018 onkolougine taudi uvvessah ei andanuh tiediä ičes. Natalja Pugačovale luajittih vie yksi leikkavus, ga pellastua händy ei puuttunuh – häi kuoli 24. ligakuudu vuvvennu 2019, kaksi päiviä enne omua 84-roindupäiviä[5].   

Luomisruado

Natalja Pugačova nikonzu ei huaveilluh artistan leivis, hos lapsusaijas suvaičči pajattua da otti ozua oman kylän monih pidoloih. Eläkkehele lähtiettyy häi illoil rubei käymäh harjaituksile kylän kluubah, kus yhtes kyläläzienke pajatti rahvahan da kirjutettuloi pajoloi. Nenga rodih Buranovskije babuški -pajojoukko. Luomisruavon popul'arizaciekse Buranovon kul'tuurutaloin johtai da joukon ohjuaju Ol'ga Tuktareva rubei kiändämäh tundiettuloi ven'alazii da ulgomualazii pajoloi udmurtien kielele. Juuri nämmien pajoloin jälles buabolois tiijustettih ei vaiku Udmurtien eläjät, ga internetan käyttäjätgi monis mualois[2].

Muailman kuulužikse buabat roittihes jälles Jevroviidenii-2012-kilbua Party for Everybody-pajonke, kilvas Udmurtien pajojoukko sai toizen sijan. Kirmiedy Natalja Pugačovua sanottih joukon buabolois mielenviehättäjimäkse[1].

Vuvvennu 2012 Natalja Pugačova sai Udmurtien rahvahan artistu -arvonimen suures panokses taijon kehittämizeh da korgeiluaduzes pajatanduneros [3].

Igih kaččomattah (Natalja Jakovlevna oli vahnimannu ozanottajannu Buranovon pajojoukos da Jevroviideniel sen perustandupäivis algajen), Pugačova pajatti kaikis konsertois, kudamih kučuttih artistoi, kävyi ozuttelumatkoih kui Ven'ua myöte, mugai ulgomuale[3]. Onkolougizes tavvis tiijustettuugi buaboi vai kodvazekse keskusti muuzikkutoimindan. Leikkavuksen jälles parattuu häi jatkoi pajatandua konsertois, pidolois da vastavuo ihailijoinke. Loppi ezitykset vuvvennu 2019, puolivuottu enne kuolendua, konzu hänen tervehys ruttoh paheni[1].

Mieldykiinittäjät toziaziet

Jälles Jevroviideniedu Ven'an joukkoviestimis oli tieduo, ku Natalja Pugačovan ukko ei laskenuh händy kilbah: varai, ku häi löydäy ičelleh nuoremban died'oin[3]. Yhtelläh Natalja Jakovlevna nämmii tiedoloi vastusti da sanoi, ku ukko ainos kannatti hänen ozanotandua joukos. Suutui vai konzu akku oli ozuttelumatkoil, sit kaikkii kodiruadoloi häi joudui ruadamah[4].

Moskovasе Buranovskije babuški -joukkoh nähte luajittih vastavus Alla Pugačovanke. Natalja Jakovlevna sanoi kuulužale kaimaksele: "Terveh! Toinah myö olemmo teijänke loittozet omat?» Primadonnu häbevyi. Hänele abuh tuli Maksim Galkin, kudai nagrajen sanoi: "Toinah, toinah…"[4].

Jälles Jevroviidenien ezitysty pajojoukko huavai kävvä restoruanah, ga vardoičči kačoi gostii piäspäi jalgoissah da ei kiirehtännyh heidy laskie. Kyzyi, ket hyö ollah, da ilmoitti, ku restoruanas murginoijah vaiku tundietut pajattajat. Natalja Jakovlevna seizatui vardoiččijan edeh da sanoi: "Pugačovahäi olen!" Mies häbevyi[6].

Kačo ližäkse

  • Udmurtien kul'tuuru
  • Grigorii Vereščagin

Kirjalližus

  1. Бурановский сельсовет: история и современность / сост. В. С. Зорина, А. И. Вологжанина; [редкол.: А. К. Ивашкин и др.]. – Ижевск: Удмуртия, 2009. - 214, - ISBN 978-5-7659-0590-6.
  2. Толстухина, Мария Николаевна. Сказ о том, как простые бабушки из удмуртского села Бураново храм построили / Мария Толстухина. – Ижевск: Удмуртский издательский дом, 2020. - 266.
  3. Туктарева О. Н. Бабушки из Бураново. Как это было. – Ижевск: Удмуртия, 2023. – 208 с.: ил.

Huomavukset

  1. ↑ 1 2 3 «Евровидение», ревность и рак: Жизненный путь «бурановской» бабушки Пугачевой. Телерадиокомпания «Петербург» (27. ligakuudu 2019). Kačondan päivymiäry: 29. kylmykuudu 2023.
  2. ↑ 1 2 3 Наталья Яковлевна Пугачева — биография. Kratkoebio. Kačondan päivymiäry: 1. talvikuudu 2023.
  3. ↑ 1 2 3 4 Александр Неверов. Наталья Пугачева. 24СМИ. Kačondan päivymiäry: 1. talvikuudu 2023.
  4. ↑ 1 2 3 4 Валентина Емельянова. Наталья Пугачёвалэн дуннеез - гурт (удм.). Удмурт дунне (28. ligakuudu 2015). Kačondan päivymiäry: 1. talvikuudu 2023.
  5. ↑ Александра Хрисанфова. Умерла солистка участвовавших в «Евровидении» «Бурановских бабушек». РБК (26. ligakuudu 2019). Kačondan päivymiäry: 1. talvikuudu 2023.
  6. ↑ Зинаида Рябинина. Тамаша Маша (удм.). Удмурт дунне (5. sulakuudu 2013). Kačondan päivymiäry: 1. talvikuudu 2023.
Lähteh - "https://olo.ruwiki.ru/w/index.php?title=Natalja_Pugačova&oldid=126351249"