Ruskeala (mägipuusto)
| Nähtävys | |
| Ruskeala-mägipuusto | |
|---|---|
| suom. Ruskeala-vuoripuisto | |
 Ruskeala-mägipuusto sygyzyl vuvvennu 2014. Nägöala upotetule mruamorukarjerale | |
| 61°56′46″ с. ш. 30°34′53″ в. д.GЯO | |
| Mua | |
| Sijoittumine | Karjalan tazavallan Sordavalan piiri |
| Stuatussu | |
| Verkosivusto | ruskeala.ru |
 |
|
 Медиафайлы на РУВИКИ.Медиа | |
|
Ven'an Federacien kanzoin |
Ruskeala-mägipuusto (ven. Го́рный парк «Рускеа́ла») on matkailukompleksu Karjalan tazavallan Sordavalan piiris. Kompleksan pohjannu on kul'tuuruperindön objektu, histourien mustomerki — pohjuvezil täytetty endine mruamorukarjeru.
Alguperä
Ven'an tiedoakadiemien korrespondentu-jäsenen, Ven'an tiedoakadiemien Karjalan tiedokeskuksen Kielen, literatuuran da histourien instituutan tutkijan Irma Mullozen mugah Karjalan paikannimilöis, kudamien lopus on -la, on ristikanzan oma libo suguh liittyi nimi, se ristikanzu oli kylän perustajannu libo sen eläjänny. Ruskei ven'akse on "красный"; nenga sanottihgi ruskeipiäristikanzoi, min periä sai roita ližänimigi. Sit Ruskealan voulostikeskuksen nimi on "Ruskea-suvun eländypaikku"[1].
Muantiedo
Matkailukompleksu on 30 kilometrii piäs Sordavalaspäi, Tohmajoven rannal.
Puuston luo on loppui liinien "Sordavalu — Ruskeala" raududorogustansii Ruskela-mägipuusto.
Yleistiijot
Karjeran piduhus pohjazes suveh on 460 metrii, levevys on läs 100 metrii. Karjeran laijan korgevimas kohtaspäi sen pohjassah on 50 metrii. Vien läbinägyvys on 15—18 metrii[2].
Vahnan karjeran seinis on muanalazien štol’nien da štrekoin sistiemu, net on yhtistetty pystyoigieloil šahtoil. Suurin vuitti toimindupaikois jälles Suurdu Ižänmuallistu voinua oli upotettu; pumpata vezii ei ole mahtuo. Mägitoimindoin piduhus on mondu kilometrii. Sie on säilynyh ei suuris mruamorubloukis luajittu zavodan hallindon taloi da oza isvestin poltandupäččilöis.
Histourii
Kivilouhimot, kudamat löydi Vällän ekonoumiellizen seuran ozanottai Samuil Alopeus, allettih louhimah vuvvennu 1765, Jekaterina II:n halličendan allus. Enzimästy louhimistu ohjai "kiviruadoloin muasterin abuniekku" Andrei Pil'ugin. Händy nevvottih itualielazet ammattimiehet.
.jpg)
Ruskealas oli luajittu viizi karjerua, kudamis poruomizen da porohuazettamizen avul suadih nelliä värii mruamorua — tuhkanharmuadu, harmai-vihandua, valgiedu harmualoin täblienke da valgei-sini-harmuadu. Täs ruavos ruadoi läs 500 paikallistu eläjiä.
Ruskealan mruamorua käytettih, konzu srojittih Piiterin taloloi da dvorčii sen ymbäristös. Sil on piälystetty Isaakien kirikön seinät (Og'ust Monferran iče kävyi luohimoloile valliččemah tarvittavii kivii), on luajittu Kazanskoin kirikön lattiet, Ermituažan ikkunpielizet. Vie Ruskealan mruamorua suau nähtä Mruamoran dvorčan ikkunoin piälystämizes da Mihailovskoin zamkan oččuseinäs. XX vuozisuan toizen puoliškon Piiterin metron Primorskaja- da Ladožskaja-stansien muanalazet zualat sežo luajittih Ruskealan mruamoras.
Sil aigua, konzu srojittih Isaakien kirikkyö, vuozinnu 1818—1958, Ruskealah moni kerdua kävyi arhitektoru Og'ust Monferran.
Vuvvennu 1846, konzu oli nostettu viel ruadai piluandu- da silendyszavodu da työnnytetty izvestin tuotando mruamoran hallelmuksis, luohimolois ruadajien lugu oli läs 800 hengie.
Vuvvennu 1859 Ruskealah kävyi Francien kirjuttai Aleksandr D'uma[3], sih nähte häi kirjutti nelliozazes tevokses ven. «Путевые впечатления. В России».
Vuozinnu 1939—1947 karjeru ei toiminuh. Ruado mruamoru-izvestizavodal oli jatkettu vuvvennu 1947 da kesti 1990-luguh suate. Sil aigua bloukois louhittih vähä mruamorua, sego louhittih mruamorua izvestin, dekoratiivumuruzih, izvestijauhoh da erisuuruhizeh kivimurendeheh näh.
Vuvvennu 1998 mruamoran piäkarjeru rodih valdivon vardoittavannu da sai kul’tuuruperindön objektan stuatusan.
Vuvvennu 1999 mruamoran piäkarjeru otettih kanzoinvälizeh turistumatkah "Valpassinine dorogu" (ven. «Голубая дорога»).
Vuvvennu 2010 Ruskealas oldih ven. «Тёмный мир»-fil'man enimät kuvavukset.
Vuvvennu 2013 Hiidensellän kyläs da Ruskealan mägipuustos meni ven. «Седьмая руна»-sarjufil'man suurin vuitti kuvavuksis[4].
Vuvves 2017 algajen mägipuustos pietäh jogavuodistu kezämuuzikkufestivualii "Ruskeala Symphony"[5].
Vuvvennu 2017 Muanalaine Ruskeala -matkailuprojektu (ven. «Подземная Рускеала») sai Gran-Prin IV Kogo Ven'an matkailupalkindos vuvven 2017 "Vuvven maršruuttu" nominacies "Paras Ekolougien vuvvele omistettu maršruuttu"[6].
1. kezäkuudu vuvvennu 2019 Sortavalan raudutiestansiespäi Ruskealan mägipuustossah rubei käymäh matkailuretrojuna höyryl, sydämes se on luajittu Nikolajevskoin ekspresan stiilin mugah[7].
Tuhukuul vuvvennu 2025 puuston johtokundu pahoittelihes vandaloin periä, kudamat kirjutetah da piirustetah mruamorukallivoloile, da kehoitti vedämäh iččie kul’tuurizeh luaduh rikkomattah alguperästy luonduo[8].
Huomavukset
- ↑ Основатель Рускеалы был рыжим? О значении названия популярного туристического бренда Карелии. Карелия.Ньюс. Kačondan päivymiäry: 30. kezäkuudu 2025.
- ↑ Парк Рускеала (рус.). Kačondan päivymiäry: 20. elokuudu 2026.
- ↑ Александр Дюма о своем посещении Рускеалы. Kačondan päivymiäry: 30. kezäkuudu 2025.
- ↑ Анастасия Филатова. Юлия Снигирь снова рискует жизнью (рус.). 7days.ru. 7дней.ru (30. kezäkuudu 2025).
- ↑ Музыкальный фестиваль «Ruskeala Symphony» собрал шесть тысяч зрителей (рус.). ptzgovorit.ru. Kačondan päivymiäry: 30. kezäkuudu 2025.
- ↑ Всероссийская премия туристических маршрутов. Russian Travel Tour Awards. » Объявлены победители финала Всероссийской туристской премии «Маршрут года» 2017. tourawards.ru. Kačondan päivymiäry: 30. kezäkuudu 2025.
- ↑ РЖД запустит ретропоезд на юге Карелии. Интернет-журнал «Республика» (30. kezäkuudu 2025).
- ↑ Неизвестные уродуют мраморные скалы горного парка в Карелии, КарелИнформ (11 tuhukuudu 2025). Kačondan päivymiäry: 30. kezäkuudu 2025.
Kirjalližus
- Морозова Л. В. Владимир Иванович Вернадский в Карелии. Геологическая экскурсия в Рускеала. Карельский республиканский Совет Всероссийского общества охраны природы. Карельский экологический журнал "Зелёный лист"; 2012 г., декабрь, № 2. С. 25-26.
Linkat
- Карьер мраморных ломок в пос. Рускеала (рус.). Объекты культурно-исторического наследия Карелии. Kačondan päivymiäry: 30. kezäkuudu 2025.
- Vladimir Kezling. Северное Приладожье / Горный парк «Рускеала» (рус.). kezling.ru (8. heinykuudu 2010). — Фоторепортаж о мраморном карьере. Kačondan päivymiäry: 30. kezäkuudu 2025.
- Рускеальский мраморный карьер (рус.). Дайвинг-центр ORCA. Kačondan päivymiäry: 30. kezäkuudu 2025.
- Рускеала: Мраморный карьер. «Рускеала» (2010). Kačondan päivymiäry: 30. kezäkuudu 2025.