Šegel'man Ilja Romanovič

Ilja Romanovič Šegel'man
Roindupäivy	20. kylmykuudu 1944(1944-11-20)
Roindukohtu	Kirgizii
Kuolendupäivy	3. talvikuudu 2020(2020-12-03) (76 vuottu)
Kuolendukohtu	Petroskoi, Ven'a
Kanzalližus	Nevvostoliitto →  Ven'anmua
Toimindu	tiedomies, sambo-harjaittelii
Palkindot da arvonimet

Ilja Romanovič Šegel'man (ven. Илья Романович Шегельман; 20. kylmykuudu 1944, Kirgizii — 3. talvikuudu 2020, Petroskoi) on Nevvostoliiton da Ven'an professoru, tehniellizien tiedoloin douhturi, Ven'an inženieruakadeemien kirjazienvaihtai, sego sambo-harjaittelii. Ven'an arvostettu harjaittelii.

Eloskerdu

Pereh oli rodužin Bobruiskaspäi. Häh rodihes Kok-Jangak-linnas (Kirgiizien socialistine nevvostotazavaldu).

Voinan jälles perehenke eli Bobruiskas. Viijentostu vuvven ijäs lähti ruadoh, yhtelaigua äijän sportuičči.

Piäzi opastumah Leningruadan meččytehniellizeh akadiemieh (kus sai inženieru-tehnolougan diploman da myöhembi puolisti kandiduatan da douhturin väitösruavot), vähäzen oli meččyruadolois. Vuvvennu 1968 akadiemien loppiettuu händy työttih Karjalan tazavaldah Ven'an tiedoakadiemien Karjalan tiedokeskuksen Meččyinstituuttah (meččytevolližuon tutkimusinstituuttu). Instituutan nuorimas tutkijas häi kazvoi sen johtajassah, yliopiston opastuslaitoksen johtajas Petroskoin valdivonyliopiston innovacii- da tuotandotoimindas vastuajah vararektorassah.

Yhtes tiijollizen, pedagougizen da keksijän toimindanke häi oli harjaittelijan hommis: ihan allus se oli vai pieni sambo-sportuozasto, ga jo vuvvennu 1976 hänes rodih Karjalan sambo- da dz’udoliiton piälikkö. Häi valmisti Karjalan joukkovehtu. Hänen opastujat ollah Muailman da Ven’an čempionat-voittajat, enämbi 200 Karjalan čempionua sambos, bojusambos, dz’udos, lähiborčas. Hänen kazvatettuloin opastujien joukos ollah Maksim Antipov — arvostettu sportumuasteri, Muailman sambo-čempionuattukilboin voittai da kaksikerdaine medalistu, Sergei Kamilov — kanzoinvälizen tazon sportumuasteri, muailman bojusambo-kilboin kaksikerdaine čempion, Jevroupan čempion, Rašad Muradov — kanzoinvälizen tazon sportumuasteri, Artuš Asr’an ― bojusambon Muailmanmal’l’an voittai, Igor’ Varavva ― muailman da Jevroupan monikerdaine čempion veteruanoin keskes.

Perusti Puutevolližustuotandoloin tehnolougieloin kehittymizen tiijollizet perustehet -tiedoškolan, Patentuittavien tevollisobjektoin da luadiioigevuksien toiminnallizen da tehnolougiellizen tarkastelendan da sintezan metoudu -tiijollizen suunnan, oli tiedosanakniigat internietas -projektan Kuulužat tiedomiehet nimel ozanottai. On enämbän migu 600 painetun tiedoruavon kirjuttajannu da enämbän migu 380 keksindön da hyödymodelipatentan luadijannu (176 keksindyö Nevvostoliiton aigua, Ven’an Federacien 200 patentua, Valgo-Ven'an 6 patentua), opasti da valmisti nelli douhturii da 20 tehniellizien da ekonoumiekkutiedoloin kandiduattua.

Sanakniigoin, opastuskniigoin, monogruafieloin, opastusnevvoloin keskes on: viizi painostu sanakniigas "Meččytevolližus da meččytalovus" (Petroskoi, 2000, 2004, 2005, 2008, 2011); "Biznesanpidäjän sanakniigu" (Petroskoi, 2004); "Meččytevolližuon biznessusanakniigu" (Piiteri: 2005); "Talovuolline turvalližus" (Petroskoi, 2005); "Nygyaigazen meččyruavon tehniellizet laittehet". Piiteri, 2005, yhtesluadijat Skripnik B. I., Galaktionov O. N.); "Intellektualizen omažuon markinat da kilbailu" (Petroskoi, 2012, yhtesluadijat Kester J. M., Rudakov V. I.); "Toimindalline da tehnolougielline tarkastelendu: metoudu innovacii-tehniellizien piätöksien kehittämizekse meččytevolližuoh niškoi" (Petroskoi, 2012); "Ohjailuinnovacieloin ohjuandu" (Moskovu, 2017, yhtesluadijat Asaul A. N., Asaul M. A., Meščer’akov I. G.); "Innovaciitoimindan tuloksien suojelu" (Petroskoi, 2012, yhtesluadijat Kester J. M., Vasiljev A. S.); "Puutevolližusyhtymine: teourii da praktiekku", Petroskoi, 2009, yhtesluadii Voronin A. V.); "Mečänviendy avtopoujezdoil/ Tehniekku, tehnolougii, ohjavo" (Piiteri, 2008, yhtesluadijat Skripnik V. I., Kuznecov A. V., Pladov A. V.)

Vuvvennu 2005 hänele annttih Ven'an arvostettu harjaittelii -arvonimi. Händy palkittih Arvoruadolois Ižänmuan hyväkse -I da II astien kunnivomerkin medaliloil, Ven’an Federacien piämiehen kiitoskirjoil, Sampo-kunnivomerkil, Ruavon veteruanu -medalil, Pedri Suuren II astien kunnivomerkil, Ven’an Federacien Federacien Nevvoston Federuallizen kerähmön kunnivokirjazel, Sambo 75 vuottu-, Sambo 80 vuottu -medaliloil da toizil palkindoloil, häi on Karjalan tazavallan vuvven laureattu (vuozinnu 1999, 2004, 2011), Korgeviman ammattiopastuksen kunnivoruadai, Ven’an meččytalovuon kunnivoruadai, Karjalan avtonoumizen socialistizen nevvostotazavallan arvostettu uvvistai da keksii, Karjalan tazavallan arvostettu harjaittelii.

Händy vallittih Zakonoinluajindukerähmön III kučundukerähmön deputuatakse (vuozinnu 2002—2006).

Pereh

• Vellet: Mark (1947—2018) — Ven’an Federacien arvostettu rakendai; Robert — Karjalan tazavallan arvostettu mašinoinluadii; Vadim — Litvan socialistizen nevvostotazavallan tävvelline sportugimnastiekan muasteri (1956), sevoitar David — Karjalan tazavallan arvostettu ekonomistu;
• Poigah Roman — Ven’an Federacien sportumuasteri (sambo), Karjalan tazavallan arvostettu harjaittelii;
• Diädäh B. N. Odlis — Oniegan traktoruzavodan johtai.

Palkindot da arvonimet

• Karjalan avtonoumizen socialistizen nevvostotazavallan arvostettu uvvistai da keksii (1989);
• Karjalan avtonoumizen socialistizen nevvostotazavallan Rahvahan talohuon arvostettu ruadai (1989);
• Meččytevolližuon kunnivoruadai (2004);
• Ven'an korgeviman školan arvostettu ruadai (2007);
• Arvoruadolois Ižänmuan hyväkse -II astien kunnivomerkin medali.

Huomavukset

Linkat

• Карелия: энциклопедия: в 3 т. / гл. ред. А. Ф. Титов. — Петрозаводск: ИД «ПетроПресс», 2011. — Т. 3: Р — Я. — С. 278. — 384 с. — 3 000 экз. — ISBN 978-5-8430-0127-8.
• Создатель школы самбо в Карелии Илья Шегельман умер от коронавируса (рус.). Kačondan päivymiäry: 2. talvikuudu 2025.