Detsadulazen opastuksen ruadajien päivy

On otettu Рувики-späi
Detsadulazen opastuksen ruadajien päivy
Детский сад №135 Нижний Новгород.png
Tiippu Ammatilline siviilipruazniekku
Toizin ven. Праздник работника дошкольных учреждений, ven. День воспитателя и всех работников дошкольного образования
Merkičys yhteiskunnallizien yhtistyksien da valdivon huomavon kiinittämine päivykodiloin da toizien detsadulazen opastuksen laitoksien toimindah. Jogavuodine detsadulazen opastuksen ruadajien kunnivoiččemine da tämän ammatin popul’arizacii nuorižon keskes.
Pandih alguh 27. syvyskuudu vuvvennu 2003
Alguhpanii joukko Kogo Ven'an pedagougujulgavoloi
Pietäh  Ven'anmua
Päivymiäry 27. syvyskuudu
Liittyy syvyskuun 27. päiväh vuvvennu 1863, konzu Piiteris Vasiljevskoil suarel Sofja Andrejevna Lygebil' avai enzimäzen päivykoin linnas.

Lapsienkazvattajan da kaikkien detsadulazen opastuksen ruadajien päivy (ven. Де́нь воспита́теля и все́х дошко́льных рабо́тников) on ammatilline pedagougiekkah liittyi opastandualal ruadajien siviilipruazniekku Ven'al. Sidä pietäh joga vuottu 27. syvyskuudu. Sen pani alguh joukko Kogo Ven'an pedagougujulgavoloi.

Pruazniekan histourii

Lapsienkazvattajan da kaikkien detsadulazen opastuksen ruadajien päivy pandih alguh Kogo Ven'an pedagougujulgavoloin alguhpanos (lehtet ven. «Детский сад со всех сторон», ven. «Дошкольное образование», žurnualu ven. «Обруч») 27. syvyskuudu vuvvennu 2004. Sen kannatettih enimien detsadulazien piäprogrammoin kirjuttajat, päivykodiloin opastajat da äijät vahnembat[1]:

  • 27. syvyskuudu vuvvennu 1863 Piiteris Vasiljevskoil suarel professoru K. J. Lygebil’an akku da germuanielazen opastajan Fridrih Fröbel’an noudai Sofja Andrejevna Lygebil’ avai enzimäzen päivykoin linnas.

31. kevätkuudu vuvvennu 2008 Ven’an Federacien opastandan da tiijon ministerstvan käskyn mugah № 03-584 "Detsadulazen opastuksen ruadajien päivän piendäs" Valdivollizen poliitiekan da opastusalan normatiivu-oigevuksellizen ohjuandan departuamentan johtai I. M. Remorenko kannatti virrallizen pruazniekan perustandan da sen pidämizes avvutandan[2].

18. sulakuudu vuvvennu 2016 Ven'an Federacien halličuksen käskys № 703-р Ven’an Federacien halličuksen piälikkö Dmitrii Medvedev otti Lapsienkazvattajan da detsadulazen opastuksen ruadajien päivän Ven’an ammatillizien pruazniekkoin kalenduarah virrallizesti (ei ole huogavopäivänny)[3].

Perustetun pruazniekan tarkoituksekse rodih yhteiskunnallizien yhtistyksien da valdivon huomavon kiinittämine päivykodiloin da toizien detsadulazen opastuksen laitoksien toimindah sego jogavuodine detsadulazen opastuksen ruadajien kunnivoiččemine da tämän ammatin popul’arizacii nuorižon keskes da sih opastumine.

27. syvyskuudu vuvvennu 2004 enzikerdua piettih Detsadulazen opastuksen ruadajien päivy.

Kuulujat tapahtumat

Ligakuun lopus 1970-luvul Ulan-Uden linnan vallasolijoin alguhpanos piettih Detsadulazen opastuksen päiviä. Sinäpiän palkittih parahii ruadajii Druamuteatras (juattih palkindoloi da mustolahjoi). Detsadulazen opastuksen laitoksien ruadajat voidih sinäpiän ajella linnan yhteiskunnallizes transportas da kävvä parikmuaherskoih ilmai, vuoros olemattah[4].

Temuattine urokku "Kummannu voi olla joga vehkeh", kudamua pietäh päivykoin kazvattajih niškoi ven. С.Т.Е.М «Планета науки»-projektan hantuzis (Moskovu).

On olemas moizii opastusalah liittyjii kanzallizii da kanzoinvälizii pruazniekkupäivii:

  • "Lapsienkazvattajan päivy" (kevätkuun toine piätteniččy, Amierikan Yhtysvallat);
  • "Tiijonpäivy" (1. syvyskuudu, Ven'a);
  • "Opastajan päivy" (10. syvyskuudu, Kitai);
  • "Ukrainan lapsienkazvattajan da detsadulazen opastuksen ruadajien päivy" (2. syvsyskuudu);
  • "Muailman ppastajan päivy" (5. ligakuudu);
  • "Opastajan päivy" (5. ligakuudu, Ven'a);
  • "Kanzallizen oapstandan päivy" (14. ligakuudu, Pol'šu);
  • "Opastajan päivy" (20. kylmykuudu, Vjetnam);
  • "Opastajan päivy" (27. kylmykuudu, Ispuanii).

Pivot

Detsadulazen opastuksen ruadajien päivänny pietäh moizii pidoloi kui:

  • Temuattizii pidoloi päivykodilois;
  • Kerähmölöi, pedagougoin nevvostoloi, seminuaroi detsadulazen opastuksen ruadajih niškoi;
  • Parahien ruadajien palkičuspidoloi, kiitändykirjazien da muuloin palkindoloin juandupidoloi.

Vuvvennu 2004 Piiteris paikalline lehti luadi mondu piduo linnan detsadulazen opastuksen ruadajieh niškoi[4].

Vuvvennu 2022 Ven’an Federacien opastusministrestvu  (ven.) (olo. pani rattahile jogavuodizen akcien "SanoPassiboOpastajale" (ven. «СкажиСпасибоПедагогу»). Sociualuverkolois jullattih fotokuvii, videoloi runoloinke da histourieloinke, kudamis kiännyttih opastajien  (ven.) (olo. da lapsienkazvattajien  (ven.) (olo. puoleh[5].

Vuvvennu 2023 Samaran alovehel Borskoje-kyläs Suuren opastajan nedälin pidoloin hantuzis piettih alovehen detsadulazen opastuksen ruadajien konferensii. Oli sežo parahien ruadajien pruazniekalline palkičuspido da konsertu. Otradnois Rossija-kul’tuurutalois piettih alovehen detsadulazen opastuksen ruadajien festivuali "Kai algavuu lapsusaijas"[6][7].

Vuvvennu 2024 Moskovan alovehel opastusministru da opastusvaraministru piettih Kogo muan Ven'an lapsienkazvattai -kilvan palkičusseremounii. Juattih kunnivokirjazii, diplomoi, dengualahjoi. Annettih sežo moizii arvonimilöi kui "Ven’an Federacien lapsien da nuorižon kazvatandan alan kunnivoruadai", "Kunnivo-opastai", kunnivomerkilöi "Ven’an Federacien opastusalan paras ruadai" da muuloi[4].

Samannu vuon Tatarstuanas Kukmoran piiris Tujembašan kyläkirjastos luajittih kniiguozuttelu "Detsadulazen opastuksen ruadajien päivy", kudamas ezil oldih metoudiekkukniigat da kaunehkirjalližus[8].

Omii pidoloi piettih Voulogdan alovehelgi Požarskois kul’tuurutalois, Groznois Tazavallan kul’tuuru- da taidokeskuksen pruazniekkuzualas sego Čuvašien päivykodilois[9].

Sociulougine tutkimus

Vuvvennu 2008 Moskovan sociolougien kolledžu da erähät lehtet muan 10 alovehel piettih sociolougizen tutkimuksen päivykodiloin lapsienkazvattajien keskes. Heil kyzyttih: "Pidäygo ammatillizien pruazniekkoin kalenduarah ližätä Detsadulazen opastuksen ruadajien päivy?" Pruazniekan perustandua kannatettih 81,6 % lapsienkazvattajii. Ihan samua kyzyttih toizien ammattiloin rahvahil da enimät (66,7 %) oldih sidä mieldy, ku mostu pruazniekkua tarvitah. Tämän tutkimuksen tulokset työttih tämän alan ammattiliittoh da Opastusministerstvah[4].

Mielenkiinittäjät toziaziet

  • Germuanielaine opastai Fridrih Fröbel enzimäine otti käyttöh päivykodi-terminän (ven. детский сад). Hänen teourien mugah lapsiekazvattajat oldih savunkaččojat, a lapset — kukkazinnu da jumalan kazviloinnu[9];
Lapsienkazvattai opastamas kazvattiloin nuorembua joukkuo
  • Vuvvennu 1859 Ven’an valdukunnan Helsingforsas (Helsinkis) avattih enzimäine päivykodi[10];
  • 20. talvikuudu vuvvennu 1917 hyväksyttih Detsadulazen opastuksen deklaracii, kudamah pandih sen piäperustehet — kaikkien suadavus da ilmažus[1];
  • 1930-luvul ruvettih piästämäh ilmah Detsadulaine opastus -žurnualua. Sen tiedoloin mugah päivykoin kazvattiloi oli läs 2 miljonua[11];
  • Vuvvennu 1959 Ven'al roittih enzimäzet juaslijoukot, kudamih otettih jo kaksikuuhiziin lapsii[12];
  • Valdivollizen statistiekan federuallizen palvelun tiedoloin mugah vuvvennu 2025 Ven'al on enämbi 45 000 tuhattu päivykodii[1];
  • Ven’an Federacien kanzalaskoudeksen 575. stat’t’an mugah opastandualan ruadai ei voi ottua vastah kolmen tuhanden kallehembua lahjua[13].

Huomavukset

  1. ↑ 1 2 3 День воспитателя в России 2025: дата, история и традиции праздника работников дошкольного образования, Lenta.RU. Kačondan päivymiäry: 4. syvyskuudu 2025.
  2. ↑ Указ № 03-584 "О праздновании Дня работников дошкольного образования" (рус.) (PDF). web.archive.org. Kačondan päivymiäry: 4. syvyskuudu 2025.
  3. ↑ Распоряжение №703-р (рус.) (PDF). static.government.ru. Kačondan päivymiäry: 4. syvyskuudu 2025.
  4. ↑ 1 2 3 4 День воспитателя в 2025: какого числа, история, кого поздравляют - Российская газета, Российская газета (20 syvyskuudu 2024). Kačondan päivymiäry: 4. syvyskuudu 2025.
  5. ↑ День воспитателя: дата, история и традиции, РБК Life. Kačondan päivymiäry: 4. syvyskuudu 2025.
  6. ↑ Конференция работников дошкольного образования, посвященной Дню воспитателя и всех дошкольных работников | ГБУ ДПО ЦПК "Ресурсный центр" (рус.). rcneftegorck.ru. Kačondan päivymiäry: 4. syvyskuudu 2025.
  7. ↑ В Отрадном чествовали работниц детских садов, Вестник города Отрадного (5 ligakuudu 2023). Kačondan päivymiäry: 4. syvyskuudu 2025.
  8. ↑ Книжная выставка «День дошкольного работника» 2024, Кукморский район — дата и место проведения, программа мероприятия., Культура.РФ. Kačondan päivymiäry: 4. syvyskuudu 2025.
  9. ↑ 1 2 День воспитателя 2024: какого числа отмечают, история праздника и традиции, РЕН ТВ (27 syvyskuudu 2024). Kačondan päivymiäry: 4. syvyskuudu 2025.
  10. ↑ Как в России появились детские сады и как они были устроены | Familio.Media, Familio.Media (1 kezäkuudu 2021). Kačondan päivymiäry: 4. syvyskuudu 2025.
  11. ↑ День воспитателя и всех дошкольных работников, РИА Новости (27 syvyskuudu 2024). Kačondan päivymiäry: 4. syvyskuudu 2025.
  12. ↑ Андреева, Юлия. День воспитателя в России: история и традиции праздника, Пятый канал (27 syvyskuudu 2024). Kačondan päivymiäry: 4. syvyskuudu 2025.
  13. ↑ День воспитателя 2024: когда отмечается и что подарить педагогам - Газета.Ru, Газета.Ru. Kačondan päivymiäry: 4. syvyskuudu 2025.

Linkat

Lähteh - "https://olo.ruwiki.ru/w/index.php?title=Detsadulazen_opastuksen_ruadajien_päivy&oldid=126353964"