Tiijonpäivy

On otettu Рувики-späi
Tiijonpäivy
Tiijonpäivy Karjalan tazavallan Pyhärven školas, vuozi 2024
Tiijonpäivy Karjalan tazavallan Pyhärven školas, vuozi 2024
Päivymiäry 1. syvyskuudu
Perindöt školasovat
kukkubukiettu
Karjalan tazavallas vuvves 2022 algajen kaikile enzimäzen kluasan opastujile lahjoitetah školavehkehkogomukset
Логотип РУВИКИ.Медиа Медиафайлы на РУВИКИ.Медиа

Tiijonpäivy (ven. День знаний) on valdivolline päivy, kudamale algu oli pandu Nevvostoliitos vuvvennu 1984 Nevvostoliiton Korgeviman Nevvoston Prezidiuman vuvven 1984 syvyskuun 1. päivän käskys № 373-11 "Syvyskuun 1. päivän kogo rahvahan pruazniekakse — Tiijonpäiväkse — ilmoittamizeh nähte"[1]. Pruazniekku on virralline erähis toizisgi endizis Nevvostoliiton mualois, Ven'al, Ukrainal[2] da Valgoven'al[3]. Pruazniekkupäivy on ruadopäivänny. Ku se piädynöy pyhähpäiväh pruazniekkurivilöi pietäh enzimässargen 2. syvyskuudu — nenga on, konzu ei kargavusvuon vuozi algavuu tossargen da kargavusvuon algavuu enzimässargen.

1. syvyskuudu on uvven opastusvuvven algu Ven'an enimih školan opastujih, studentoih da opastajih niškoi.

Perindön mugah školis pietäh pruazniekkurivilöi, kluassučuassuloi, tiedoloin, rauhan, turvalližuon, urholližuon da toizii urokkoi.

Histourii

Ven'an histouries ei kai opastuslaitokset allettu opastusvuottu 1. syvyskuudu. Ezimerkikse, Pedri I:n aigah erähis školis opastus algavui elokuun lopus, syvyskuun puolivälis da ligakuul, kyläkirjutusmaltoškolat ruvettih ruadamah 1. talvikuudu[4], sen panou merkile Vladimir Dal' ven. О поверьях, суевериях и предрассудках русского народа» -kirjutuksen Primietät-ozat «sinä Nauman mustopäivänny Pikku-Ven'al annettih lapsii školih, duumaittih, ku hyö silloi enämbän mieldy suajah»[5].

Nevvostoliitosgi 1930-lugussah ei olluh opastusvuvven tarkua algupäiviä. Nevvostoliiton Komissuaroin Nevvoston vuvven 1930 elokuun 14. päivän azetukses oli sanottu, ku "kaikkii 8—10-vuodehizii lapsii pidäy ottua školah sygyzyl"[4].

I Muailman voinan allettuu nuoret azientiedäjät kehoitettih pidiä jogavuodistu Kanzoinvälisty brihoin da neidizien päiviä, ku suas pidiä joga muas voinanvastazii pidoloi da rauhan urokkoi školis. Nuorižon kommunistizen internacionualan kehoitukses tämän pruazniekan piendypäiväkse vuvves 1932 algajen rodih 1. syvyskuudu. Jo 3. syvyskuudu vuvvennu 1935 Sovnarkoman da Kogo Nevvostoliiton bol'ševiekkoin kommunistizen puolovehen keskuskomitietan azetukses kaikis Nevvostoliiton školis opastuvuozi rubei algavumah 1. syvyskuudu, а loppumah eri luaduh: kolmes enzimäzes kluasas — 1. kezäkuudu, 4.—7. kluasois — 10. kezäkuudu da 8.—10. kluasois — 20. kezäkuudu[6][4]. Vuvvennu 1939 syvyskuun 1. päivänny Hitleran Germuanii algoi II Muailman voinan da tämän päivän voinanvastaine merkičys suureni.

Virrallizesti Tiijonpäivy oli hyväksytty Nevvostoliiton Korgeviman Nevvoston Prezidiuman käskys № 373-11 15. kezäkuudu vuvvennu 1984 "Syvyskuun 1. päivän kogo rahvahan pruazniekakse — Tiijonpäiväkse — ilmoittamizeh nähte", sen tävvendi Nevvostoliiton Korgeviman Nevvoston Prezidiuman käsky № 3018-Х "Pruazniekkoih da mustopäivih nähte" 1. ligakuudu vuvvennu 1980 uvvel pruazniekkupäiväl[1].

Perindöt

1. syvyskuudu opastajat da heijän vahnembat lahjoitetah opastujile kukkii, hyvitelläh uvven opastusvuvven allunke.

Perindön mugah valdivon tundietut virgumiehet hyvitelläh Tiijonpäivänny opastajii da opastujii. Eri opastuslaitoksih kävväh piirilöin haldivoloin ruadajat, muan da linnoin johtajat[7].

Vuodessah 1984 syvyskuun 1. päivänny piettih pruazniekkurivii, sit Rauhan urokkua[7], sit toizii urokkoi aigulistan mugah, ližäkse se oli kogonaine opastuspäivy (5-6 urokkua). Vuvves 1984 algajen 1. syvyskuudu urokkoi školis ei pietä, pietäh vaiku pruazniekkurivilöi (konzu opastujat seizatutah rivilöih omien kluassoinke yhtes) da toizii pruazniekkupidoloi, kudamis eri huomavuo kiinitetäh enzimäzen kluasan opastujih. Vuvves 2017 syvyskuun 1. päivänny kaikis kluasois urokat algavutah avvonazes urokas "Ven'a, kudai kaččou tulieh aigah».

Keskiastien eri aloin opastuslaitoksis da korgeiškolis pruazniekkurivilöi tavan mugah ei pietä (enzimäzen kursan opastujih niškoi pietäh pruazniekkukerähmyö, ga vahnembien kursoin opastujat opastutah)[8][9].

  • Ven'an piämies Vladimir Putin Tiijonpäivänny Kurganan keskiškolas № 7, vuozi 2013

    Ven'an piämies Vladimir Putin Tiijonpäivänny Kurganan keskiškolas № 7, vuozi 2013

  • Pruazniekkurivi Donbasas Doneckas, 1. syvyskuudu vuvvennu 2013

    Pruazniekkurivi Donbasas Doneckas, 1. syvyskuudu vuvvennu 2013

  • 2013. Донецк 334.jpg

    Kelloine — Tiijonpäivän atribuuttu

  • Tiijonpäivy Moskovan Suvorovan sodaopistos

    Tiijonpäivy Moskovan Suvorovan sodaopistos

Vuvvennu 2014 Moskovan erähäs školas Vera-fondan kannatuksel piettih akcii "Lapset kukkazien sijah", kudaman mugah Tiijonpäivänny opastujat da vahnembat ei ostettu opastajile kallehii kukkubukiettoi, a lahjoitettih min voidih dengua läžijöile lapsile da orboloile. Joga vuottu täh akcieh yhtytäh Ven'an uvvet opastuslaitokset[10][11].

Tiijonpäivy Karjalan tazavallas

Karjalan tazavallan Pyhärven alguškolan enzimäzen kluasan opastujat suadih školavehkehkogomukset. Vuvvennu 2024 Pyhärven alguškolah tuli opastumah 6 hengie.

Karjalas vuvves 2022 algajen Karjalan tazavallan piämiehen Artur Parfenčikovan alguhpanos kaikile enzimäzen kluasan opastujile lahjoitetah halličuksespäi školavehkehien kogomukset[12][13][14]. Niilöis on tetrattii, piirdindy, kirjutindu, viivatindu, tetrattiloin kantu, vezimualua, plastiliinua, väribumuagua, pahvii da äijy muudu. Nämmii školavehkehkogomuksii kerätes otetah huomavoh vahnembien da opastajien mielii.

Tiijonpäivy taijos

Hos poštumarkoi Tiijonpäiväkse Nevvostoliitos ei piästetty ilmah, sie äijän kerdua painettih tälle pruazniekale omistettuloi merkittylöi taidokanvertoi.

Nevvostoliiton vuvven 1986 merkitty taidopoštumarku Tiijonpäiväkse
Tiedoloin da tiijonpäivy, Litvan poštu, 2015

Poštumarku Tiijonpäiväkse oli piästetty ilmah Litvas vuvvennu 2015, tarkembah sanojen, se oli omistettu Tiedoloin da tiijonpäiväkse (lit. Mokslo ir žinių diena), kudamua pietäh sie 1. syvyskuudu.

Kačo ližäkse

Huomavukset

  1. ↑ 1 2 Указ Президиума Верховного Совета СССР от 15.06.1984 N 373-XI «Об объявлении 1 сентября всенародным праздником — Днём знаний» — текст документа на сайте КонсультантПлюс
  2. ↑ В Украине сегодня отмечают День знаний (рус.). NEWSru.ua (1. syvyskuudu 2014). Kačondan päivymiäry: 1. syvyskuudu 2014. Arhiviiruittu 3. syvyskuudu 2014
  3. ↑ В Беларуси празднуют государственный праздник — День знаний (рус.). Гродненский государственный медицинский университет (1. syvyskuudu 2014). Kačondan päivymiäry: 1. syvyskuudu 2014. Arhiviiruittu originualaspäi 3. syvyskuudu 2014
  4. ↑ 1 2 3 День знаний в России: история праздника (рус.). РИА Новости (1. syvyskuudu 2012). Kačondan päivymiäry: 1. syvyskuudu 2012. Arhiviiruittu 2. syvyskuudu 2012
  5. ↑ Полное собрание сочинений Владимира Даля (Казака Луганского). — СПб., М.: Издание товарищества М. О. Вольф, 1898. — Т. 10. — С. 385.
  6. ↑ Об организации учебной работы и внутреннем распорядке в начальной, неполной средней и средней школе. Постановление Совета Народных Комиссаров СССР и Центрального Комитета ВКП(б) // Под знаменем Ленина : газета. — Первоуральск, 1935. — 9 сентября (№ 204 (1160)). — С. 2.
  7. ↑ 1 2 Анастасия Анушевская. Откуда пошла традиция праздновать День знаний 1 сентября? (рус.). Аргументы и факты (1. syvyskuudu 2014). Kačondan päivymiäry: 1. syvyskuudu 2014. Arhiviiruittu 1. syvyskuudu 2014
  8. ↑ Традиции и новации праздника 1 сентября Arhiivukoupii 3 syvyskuudu 2014 Wayback Machine. (ven.) rudocs.exdat.com
  9. ↑ НЕ долгожданное первое сентября — день знаний с грустью на лице (неопр.). ЕГЭ по жизни — маркетинг головного мозга (1. syvyskuudu 2021). Kačondan päivymiäry: 26. kylmykuudu 2021. Arhiviiruittu 26. kylmykuudu 2021
  10. ↑ Дети вместо цветов — Благотворительный фонд помощи хосписам «Вера». Kačondan päivymiäry: 1. syvyskuudu 2017. Arhiviiruittu 28. oraskuudu 2019
  11. ↑ Воспитанники Екатеринбургского СВУ впервые приняли участие в акции «Дети вместо цветов» : Министерство обороны Российской Федерации. Kačondan päivymiäry: 1. syvyskuudu 2017. Arhiviiruittu 1. syvyskuudu 2017
  12. ↑ Артур Парфенчиков: все первоклассники Карелии получат в подарок школьные наборы
  13. ↑ Всем карельским первоклассникам подарят школьные наборы
  14. ↑ Карельским первоклассникам 1 сентября снова подарят школьные наборы
Lähteh - "https://olo.ruwiki.ru/w/index.php?title=Tiijonpäivy&oldid=126347084"