Kižin pogostan aidu
| Nähtävys | |
| Kižin pogostan aidu | |
|---|---|
 | |
| 62°04′02″ с. ш. 35°13′26″ в. д.GЯO | |
| Mua | |
| Sijoittumine | Kiži[d] |
| Arhitektoru (arhitektorat) | Aleksandr Opolovnikov |
| Stuatussu |
 ОКН № 1010021058 |
 |
|
 Медиафайлы на РУВИКИ.Медиа | |
|
Ven'an Federacien kanzoin |
Kižin pogostan aidu (ven. Огра́да Ки́жского пого́ста) on Ven'an Pohjazen XVIII vuozisuan tavallizen aijan makiettu, sen on luajittu A. V. Opolovnikovan projektan mugah vuvvennu 1959. Se on Kižin pogostan alguperäzen XVIII vuozisuan aijan elävytyksenny. Kuuluu UNESCON Muailman kul’tuuruperindön objektah "Kižin pogostu". Kul’tuuruperindön objektu federuallizen merkičyksenke[1].
Kuvailu
Aidu, kudaman piduhus on läs 300 metrii, on Kižin pogostan mollembas kirikös da kelloajallois ymbäri. Se on seinänmuodoine parzisalvos kaksipuolizen levonke alustal vierinkivilöis[2].
Aijas on kolme tulenduveriädy: piälimäine päivänlaskun, pohjaine da päivännouzun tulenduveriät.
Pokrovan kirikön rinnal aijan päivänalaskun čuras on pogostan piätulenduveräi. Sih kuulutah kaksipuolizet vorotat da aiduveräi järielöis paččahis. Vorotoin bokkupuolis ollah kohtikulmikkomuodozet viiziseinäzet tuohuslaukat. Joga laukan piäoččuseinäs on ikkun. Ikkunois ollah alah heittyjät ikkunlavvat. Kaksipuoline levo on yhtehine laukoil da tulenduveriäl, se on korgiembi aijan piäozan levuo. Aijan ulgopuoles tuohuslaukkoin ies on laudahine late. Sen piäl ollah levon agjat. Tulendurakendehen korgevus on 2,25 metrii, piduhus — 14 metrii[2]. Piävorotoin prototiipannu käytettih Il'l'an Vodlajärven pogostan vorottoi Puudogan piiris[3].
Pohjazen da päivännouzun tulendukohtis ollah aiduveriät, kudamat on luajittu vestettylöin rešotkoin muodozikse[2]. Kižin pogostan aiduveriät ollah kui Počozerskoin pogostan aiduveriät Arhangelin alovehel (nygöi ei ole olemas)[3].
Kolmen tulendukohtan ližäkse aijas on bašn’u. Se on luajittu pitkivimän päivänlaskun ozan lopus, sen luodehčupus da andau kogo rakendehele merkittävän omažuksen. Sen prototiipannu on bašn’u Oševenskois pogostas Arhangelin alovehel[3]. Se on kohtikulmikkomuodoine salvos, sit on povualu. Bašn’al on nellipuoline levo[2].
Hos virrallizis lähtehis olemas olijua aidua pietäh endizen elävytyksenny[4], iče Opolovnikov oli sidä mieldy, ku [5]:
Ihan mostu aidua Kižin pogostas ymbäri ei olluh, ga mostu luaduu sai olla.
Histourii
Mittuine oli alguperäine aidu nägyy P. Zotovan grav’uuras ven. «Вид Кижинского погоста с западной стороны от пролива Онега озера», kudai oli luajittu vuvvennu 1785 Nikolai Ozereckovskoin matkan kuvuamizekse Oniegujärvie myöte. XVIII vuozisuan dokumentois tulou ilmi, ku aidu oli puuhine da alustattah. Ga jo XIX vuozisuan allukse puuhine aidu vaihtettih kivihizeh kirpiččyvorotoinke da sit ei olluh puuhistu yläsalvostu[7].
.jpg)
XIX vuozisuan kivihizes aijas tietäh, ku se oli 2⅛ aršinua korgei (läs 1,5 metrii) da pogostan nelläs puoles sit oldih tulenduveriät. Mainitah tuohuslaukas[7].
Vuvvennu 1901 Ser'odka-kykän muanruadajan Mihail Afanasjevan lahjoituksih kirikön aidah luajittih uvvet rauduveriät. On tieduo sit, ku XX vuozisuan allus aijalluo oli vardoičuspertine. Nevvostoliiton aigah, enne voinua, vardoičuspertii käytti Kižin kylän laukku erilazien tavaroin varastoh niškoi[7].
Vuvven 1945 mennes aijas jiädih rauduvorotat da aiduveräi. Konzu aloveh sanottih rauhoitetukse alovehekse[8], Kižin arhitektuuruansambl’an säilyttämizekse pidi azettua kaikes pogostas da aijas ymbäri ogahakas raudulangu[7].
Vuvvennu 1956 vardoičusperti oli ylen pahas kunnos, sanottih, ku kirpiččykuarel tulenduveriäs raudurešotkanke ei ole nimittumua arhitektuuruarvuo. Pidi uvvistua aidu. Restauracien ruadoloih ottavui Moskovan arhitektoru A. V. Opolovnikov[7].
Vuvven 1958 lopus piätettih uvvessah luadie puuhine salvettu aidu pogostas ymbäri. Opolovnikov käytti ezimerkinny Vodlajärven Il'l'an pogostan aidua Puudogan piiris da Počozerskoin pogostan aidua Arhangelin alovehel. Ezimerkinny čuppubašn’ale oli Oševenskoin pogostan aijan bašn’u.
Opolovnikovan projektan mugah ruadoi oniegantagavon kirvesmiehien joukko M. K. Miševan johtol da vuvvennu 1959 ruavot paiči bašn’an nostandua oli loppiettu[7][2].
Vuvvennu 1962 piettih arheolougine tutkimusmatku pogostan alguperäzen aijan löydämizekse. Sen aigah ei lövvetty puuhizen aijan jiännöksii. Azientiedäjät smietitäh, ku nämmä puuhizet jiännökset oli peittänyh nygyaigaine kiviaidu[7].
Vuvvennu 1996 Kižin pogostan ansambl’an aidu sai virrallizen arhitektuuran paikallizen merkičyksenke mustomerkin stuatusan[9]. Vuvvennu 2016 tämä stuatussu muutettih federuallizekse, mih nähte luajittih kirjutus vuvvennu 2017 Kul’tuuruperindön objektoin yhtehizeh valdivollizeh luvetteluh[1].
Nygözen aijan läs 60-vuodizen histourien aigah sidä mondu kerdua kohendettih. Vuvvennu 1968 kohendettih kivisalvostu. Vuvvennu 1991 vaihtettih venčat da luajittih ristu. Vuozinnu 2005, 2008 kohendettih päivännouzun aiduveräi. Mondu kerdua kohendettih levuo: vuozinnu 1991, 2003—2005 (pohjaine da luodehpuoli), 2018, 2021. Piettih kohendusruadoloi tuohuslaukois: vuvvennu 1996 pandih uuzi veräi, vuvvennu 2000 — laukkoi luajittih nygyaigazih tarbehih, vuozinnu 2004—2005 — kohendettih levo[4].
Sroičan kirikön alustu
Vuvvennu 1980 arheolougizen tutkimuksen aigah löyttih, ku nygözen aijan oza liidehozas on alustal, kudai ei koskei nygyaigazeh da vahnah aidah. Karjalan kodialovehmuzein ruadai L. I. Kapusta tiijusti, ku tämä alustu on XVIII vuozisuan lopus nostettavakse huavatun kivizen Sroičan kirikön alustannu. Se pandih vuodessah 1786, a kirpiččyseinii nostettih ikkunoissah. Ga ruadoloi ei puuttunuh loppie. Hos oli sil aigua movvannu nostua kivikirikkölöi, Kižin pogostu oli säilytännyh puuhizen arhitektuuran stiilin. Löytyn alustan muzejefikacii piettih pädemättömänny, sih niškoihäi pidi pal’l’stua alustu da rikkuo pogostan olii landšaftu[7].
Gallerei
Kižin pogostan tulenduveriät (2017)
Kižin pogostan pohjaine aiduveräi (2021)
Počozerskoin pogostan kalmužiman aiduveräi (1946)
Kižin pogostan päivänlaskun aiduveräi (2016)
Kižin pogostan aijan bašn’u (2013)
Oševenskoin pogostan aijan bašn’u (XX vuozisuan algu)
Ruskiel väril on merkitty Kižin pogostan aijan oza, kudai on Sroičan kirikön alustua korgiemba
Huomavukset
- ↑ 1 2 Приказ Министерства культуры Российской Федерации № 1305 от 04.08.2017 / Министерство культуры Российской Федерации. — Москва, 2017. (Kačondan päivymiäry: 16 syvyskuudu 2025)
- ↑ 1 2 3 4 5 Паспорт 1010021058, 1989.
- ↑ 1 2 3 Ополовников, 1977, с. 234.
- ↑ 1 2 Каталог памятников, 2021.
- ↑ Ополовников, 1970, с. 142.
- ↑ Озерецковский Н. Я. Путешествие по озерам Ладожскому и Онежскому. — Санкт-Петербург : При Имп. Акад. наук, 1792. — С. Tab.VIII. (Kačondan päivymiäry: 16 syvyskuudu 2025)
- ↑ 1 2 3 4 5 6 7 8 Гущина, 2011, с. 13—25.
- ↑ Постановление Совета Министров К-ФССР № 604 от 02.10.1945 "О состоянии охраны памятников архитектуры в К-ФССР".
- ↑ Постановление Председателя Правительства Республики Карелия № 626 от 08.07.1996 / Правительство Республики Карелия. — Петрозаводск, 1996. (Kačondan päivymiäry: 16 syvyskuudu 2025)
Kirjalližus
- Ополовников А. В. Русь деревянная: образы русского деревянного зодчества / Ополовников А. В, Островский Г. С. — Москва : Детская литература, 1970. — 200 с.
- Ополовников А. В. Русский Север. — Москва : Стройиздат, 1977. — 255 с.
- Паспорт памятника истории и культуры СССР. Музей-заповедник «Кижи». Погост Кижский. Ограда / составитель В. Г. Копнин. — Петрозаводск, 1989. — 13 с.
- Гущина В. А. Ограда Кижского погоста // Кижский вестник. — Петрозаводск : Карельский научный центр РАН, 2011. — Вып. 13. — С. 13—25. — 296 с.
- Каталог памятников. Сектор «Русские Заонежья». Ограда // Архитектурные памятники: каталог памятников деревянного зодчества острова Кижи и Кижского ожерелья. — 2021.