Mark Pimenov

Mark Pimenov
Mark Pimenov
Petroskoin linnan piälikkö
Roindu	23. ligakuudu 1799; Porfijevskoje-kylä, Šokšan pogostu, Petroskoi ujezdu, Anuksen gubernii
Kuolendu	20. sulakuudu 1865 (65 vuottu); Petroskoi
Pandu muah	Q32860381?;
Tuatto	Pimen Mojisejev (roinnuhes vuvvennu 1774)
Muamo	Matr'ona Tarasovna (roinnuhes vuvvennu 1774)
Palkindot

Mark Pimenovič Pimenov (1799—1865) on Ven'an yhteiskunnalline ruadai, Petroskoin linnan piämies, 1. gil'dien kauppumies, hyvyönluadii, Petroskoin enzimäine kunnivokanzalaine, kauppunevvoi.

Eloskerdu

Pimenovan vahnembat — kirjutetut muanruadajat oldih vepsäläzet, mendih venčale vuvvennu 1796. Mark oli enzimäzenny poijannu perehes. Jälles rodivuttih nelli nuorembua vellie — Grigorii, Nazarii, Ivan, Nikolai da kaksi sizärdy — Ksenija da Anna. Pimenovan sugunimi rodih suvun sugunimekse Mark Pimenovas da hänen vellis algajen^[1]. Sistemuattistu opastustu Pimenov ei suannuh, opastuslaitoksis ei opastunnuh.

Mark Pimenov rubei ruadamah käskijänny diädäl, kudai oli Šokšan prihodan myöjy muanruadai Pavel Voropaikin, häi sai da möi šokšan vagoikarvastu kvarciittua Piiteris. Vuozien 1820 allus Mark eli Piiteris. Jälles Voropaikinan kuolendua vuvvennu 1825 sai hänes perindökse hänen ruavon da vuitin varois^[1].

Vuvvennu 1836 Pimenov kirjuttihes piälinnan 1. gi'dien kauppumiehistöh.

Pimenovien taloi Petroskois, nygöi liečindyalan laitos.

Mark Pimenovan sildu Petroskois

Pimenov todevutti valdivollizii da yksittäzii kontraktoi rakenduskiven suandas da tuondas taloloin, sildoin da randupihoin rakendamizeh nähte Piiteris da linnoituksen nostamizeh nähte Kronštadtas. Pakkaskuul vuvvennu 1841 häi oli ainavonnu podr'adčiekannu Aničkovan sillan uvvistandas Piiteris. "Erinomazes ahkeruos" sillan rakendusruadolois Pimenovua palkittih Ahkeruos-kuldumedalil Aleksandrovskoil lental. Jälles oli podr'adčiekannu Kronštadtan fortifikaciihuonuksii nostajes, moizii kui Kniäzi Men'šikovan batarei, Risbank-fortu, Kronšlot-fortan Nikolain batarei, Pedri I kanualan laivudokat.

Kylmykuul vuvvennu 1842 Pimenov siirdyi Petroskoin 1. gil'dien kauppumiehistöh, muutti Piiterispäi Petroskoih. Möi leibiä, omisti jogi- da järvilaivoi.

Händy tundietah Anuksen gubernien suurimannu hyvyönluadijannu.

Mark Pimenov nosti omih varoih Petroskois Soborulagevol Yhteiskunnallizen savun rinnal kaksikerroksizen puuhizen taloin kivialustal, kudamas oli enzimäine Anuksen gubernien lapsien suojupaikku yösijaozastonke, kodikirikönke da teatruzualanke. Suojupaikku avattih 21. sulakuudu vuvvennu 1849 da enziallus sil oli Pimenovan nimi. Vähävarazien perehien lapsii opastettih sie kirjah, kirikön histourieh da horapajatandah. Tämän ližäkse brihačut opastuttih erilazih ammattineroloih, tytöt — kirjondamah. Urokat algavuttih kaheksan aigua huondestu da loppiettihes kuvven aigua ildua. Vuvves 1855 suojupaikal imperuattoru Nikolai I:n mustokse annettih Nikolain nimi. Vuvves 1849 vuodessah 1862 suojupaikku ruadoi Mark Pimenovan varoil, jälles sai varua gubernien erillizen veron da yksittäzien lahjoituksien hyvyös. Suojupaikan ruavon aigah (vuozinnu 1849—1918) sie sai opastuksen enämbi tuhattu orboilastu da vähävarazien perehien lastu^[2].

Vuozien 1840 aigah Pimenov nosti da andoi Petroskoin magistruatan hantuzih kolme taloidu Petroskois gubernien da linnan olendupaikkoin sijoittamizih nähte, sil ehtol, ku maksettas vuogrumakson linnan luajittuh lapsien suojupaikkah.

Roindukyläs Šokšas vuvvennu 1842 Mark Pimenov nosti Čuvvonluadijan Miikulan kivikirikön gubernien arhitektoran Vasilii Tuhtarovan projektan mugah.

Vuvvennu 1849 Halliččijan senuatan käskys Mark Pimenovale, enzimäzele petroskoilazis, annettih Petroskoin linnan kunnivokanzalaine da kauppunevvoi -arvonimi.

Vuozinnu 1852—1854 Pimenov nosti omih varoih linnan bahadeln'ah nähte uvven taloin kirikönke da kahten abuhuonuksenke talohusruadoloih nähte da luovutti tämän taloin linnan hantuzih.

Vuozinnu 1853—1854 Pimenov oli Petroskoin linnan piälikönny. Luovutti linnale omih varoih ostetut pihafonarit.

Vuvvennu 1854 Mark Pimenov nosti omih varoih da luovutti linnan magistruatan hantuzih 100 metrin piduhizen sillan Lohijoves poikki (nygözen Lunačarskoin uuličan ulgokulmas).

Pimenov andoi piäsumman Pyhän Ristan kirikön nostamizeh Zarekan kalmužimal Petroskois.

Iona-Jašjärveläzen manasteris hänen varoih vuozinnu 1854—1855 nostettih Spuasan kivikirikkö kivijalloinke^[3]. Hänen varoih luajittih obrazet Spuasan kirikön kolmejarussihizen ikonostuassah nähte. Vuozinnu 1855—1856 Mark Pimenov nosti manasteris vellessyöndypertin keitändypertinke, gost'utaloin kunnivoittuloih käyjih nähte da melličän^[1].

Pimenovua palkittih Pyhän Annan 3. astien kunnivomerkil, Pyhän Stanislavan 3. astien kunnivomerkil, kolmel Ahkeruos-kuldumedalil (ven. «За усердие»).

Vuvvennu 1862 Pimenovan tervehys ylen äijäl paheni. Jälles pitkiä da jygiedy taudii häi kuoli 20. sulakuudu vuvvennu 1865. Hänen tahton mugah händy pandih muah Zarekan kalmužimale Petroskois Pyhän Ristan kiriköllyö.

Pereh

Akkah — Matr'ona Timofejevna (1801—1874). Lapsii ei olluh. Otti poijakse plem'anniekan Jefim Pimenovan, kudai sai perindökse Mark Pimenovan varat da ruavot.

Huomavukset

↑ ¹ ² ³ Н. А. Кораблев, Т. А. Мошина Пименовы: династия предпринимателей, благотворителей, общественных деятелей. — Петрозаводск: КарНЦ РАН, 2013. — 107 с.: 45 ил.
↑ История Петрозаводска: власть и горожане. — Петрозаводск: КарНЦ РАН, 2008. — 375 с. ISBN 978-5-9274-0328-8
↑ Династия семьи Пименовых Arhiviiruittu 5 kezäkuudu 2011 .

Kirjalližus

Пименов М. П.: [Некролог] // «Олонецкие губернские ведомости». 1865. 24 апр.
Кораблёв Н. А. Городские головы Петрозаводска (1778—1918). Биографический справочник / Н. А. Кораблёв, Т. А. Мошина. — Петрозаводск: Стандарт, 2008. — С. 32—35. — 82 с. — ISBN 5-87870-007-7.
Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. — С. 386—464 с.: ил., карт. ISBN 978-5-8430-0125-4 (т. 2)
Н. А. Кораблев, Т. А. Мошина Пименовы: династия предпринимателей, благотворителей, общественных деятелей. — Петрозаводск: Периодика, 2016. — 107, [2] с.: ил. (2-е издание, переработанное и дополненное)

Linkat

[Пименовы-1] ¹ ² ³ Н. А. Кораблев, Т. А. Мошина Пименовы: династия предпринимателей, благотворителей, общественных деятелей. — Петрозаводск: КарНЦ РАН, 2013. — 107 с.: 45 ил.

[История_Петрозаводска-2] История Петрозаводска: власть и горожане. — Петрозаводск: КарНЦ РАН, 2008. — 375 с. ISBN 978-5-9274-0328-8

[3] Династия семьи Пименовых Arhiviiruittu 5 kezäkuudu 2011 .

[1]

[2]

[3]