Muailman ekskursienvedäjän päivy
| Muailman ekskursienvedäjän päivy (International Tourist Guide Day) | |
|---|---|
 | |
| Pandih alguh | 1989 |
| Alguhpanii | World Federation of Tourist Guide Associations |
| Pietäh | экскурсоводами и гидами |
| Päivymiäry | 21. tuhukuudu |
Muailman ekskursienvedäjän päivy (angl. 'International Tourist Guide Day') on jogavuodine kanzoinväline ekskursienvedäjien da viettelijöin pruazniekku. Sidä pietäh 21. tuhukuudu Muailman matkailuviettelijöin liiton federacien perustandupäivänny (World Federation of Tourist Guide Associations, WFTGA). Sen virrallizesti hyväksyi WFTGA, enzikerdua se piettih 21. tuhukuudu vuvvennu 1990[1][2].
Histourii
Ekskursienvedäjinny (viettelijöinny) täs ollah ammattimiehet, kudamat pietäh kuvailu- da temuattizii ekskursieloi muzeilois, kazvitiedosadulois, rauhoitettulois alovehis, ozuttelulois libo jalgu- da liikendehmatkois nähtävyksii, arhitektuuran mustomerkilöin, sadu-puustoansambl’oin kaččojes. Ero ekskursienvedäjän da viettelijän välil ei ole tarkah miärätty.
Ekskursienvedäjän ammatti voi olla kaijan temuatiekan da libo temuatiekkoin joukkoloin hantuzis. Enimyölleh ekskursieloi pietäh muzeiloin tiedoruadajat, kudamil on ylen hyvii tiedoloi tiettylöis kyzymyksis. Viettelijän ammattinero tarviččou vähembäl erilizii tiedoloi, ga suuremban tiedoalan. Kanzoinvälizen tazon ekskursienvedäjäl da viettelijäl pidäy maltua yksi libo mondu vierahastu kieldy. Pidäy sežo tiediä psiholougiedu, olla pagizijannu da hyvän iändämyksenke. Kygy pidiä joukon huomavuo on ammatillizen viettelijän tärgevimii neroloi[2][3].
Kanzoinväline viettelijän (ekskursienvedäjän) päivy hyväksyttih Muailman matkailuviettelijöin liiton federacien Kolmandel konvenciel, kudai piettih vuvvennu 1989 Kipran tazavallan piälinnas Nikosijas. Piendypäivy sovitettih WFTGA:n perustandupäiväkse, tämä ei-kaupalline yhtistys pandih kirjoile 21. tuhukuudu vuvvennu 1987 Muailman matkailuviettelijöin liiton federacien toizel konvenciel, kudai piettih Venas. Pidiä Muailman ekskursienvedäjän päiviä kehoitti Muailman matkailuviettelijöin liiton federacien piämies Titina Louzidu[4][5].
Vuozien 2020 allus liittoh kuului 200 tuhattu viettelijiä enämbän migu 70 muailman muas. Liitto perusti kanzoinvälizen ammatillizien ekskursienvedäjien da viettelijöin matkailuyhtistyksien verkon[5].
Kuvuamine
Pruazniekkupäivy on omistettu ekskursienvedäjien da viettelijön ruavole. Sinäpiän liitto pidäy matkailuh da ekskursieloin toimindah liittyjii pidoloi da akcieloi alovehien, valdivoloin da muailman tazol. Pidoloin tarkoituksennu on ekskursienvedäjän ammatin arvon ozuttamine da popul’arizacii, sih yhteiskunnan, vallasolijoin paikan piäl da joukkoviestimien huomavon kiinittämine[4].
21. tuhukuudu vuvvennu 1990 pruazniekkua piettih enzikerdua, sidä piettih muailman viijestostu muas. Silloi pandih alguh Kanzoinvälizen ekskursienvedäjien da viettelijöin päivän piäperindö pidiä 21. tuhukuudu ilmazii ekskursieloi da luvendoloi, äijät muailman muzeit sinäpiän ruatah ilmai. Pruazniekan eri kohtakse rodih huomavon kiinittämine lapsih, ristikanzoih, kudamil on vigua tervehyös da sociualuturvuamattomih kanzalazih[4].
Ekskursienvedäjih da viettelijöih niškoi 21. tuhukuudu pietäh erilazii pidoloi: prezentacieloi, konferensieloi, pyöryžii stolii neron vaihtamizekse. Tämän alan virrastot palkitah parahii ruadajii kunnivokirjazil, diplomoil da tozil lahjoituksil[2][4].
Pruazniekkua vaste WFTGA:n toimehpanii nevvosto valliččou Muailman ekskursienvedäjän päivän tieman, kudai miäriäy tulien vuvven ruadoloi:
- Vuozi 2023 — "Rethinking tourism; Regenerating our profession", "Matkailun uvvessah ellendämine. Ammatin elävytändy"[6].
- Vuozi 2024 — "Tourist Guides; Our Guardians in promoting and encouraging Green Tourism", "Matkailuviettelijät — meijän abuniekat Vihandan matkailun kehittämizes"[4].
- Vuozi 2025 — "Tourist Guides as Peace Ambassadors", "Ekskursienvedäjät rauhan kannattajinnu"[7].
Ven’an ekskursienvedäjien da matkuoperuattoroin liitto on Muailman matkailuviettelijöin liiton federacien täyzivaldazennu ozanottajannu. Muailman ekskursienvedäjän päiväkse Moskovan, Piiterin da toizien alovehien kul’tuurualan ruadajat perindön mugah valmistetah ilmazii ekskursiiohjelmii temuattizih pidoloih da jalguekskursieloih nähte. Nenga Moskovas 21.—23. tuhukuudu edukädehizen registracien ehtoloil piettih enämbi 360 ilmastu piduo[8][9].
Ekskursienvedäjän päivy ei kuulu Ven’an virrallizien ammatillizien pruazniekkoin luvetteluh. Ven’an viettelijät da ekskursienvedäjät pietäh 25. kevätkuudu Kul’tuurualan ruadajan päiviä, kudai hyväksyttih Ven’an Federacien piämiehen käskys vuvvennu 2007, da kanzoinvälizii pruazniekkoi: Kanzoinvälisty muzeiloin päiviä, Muailman ekskursienvedäjän päiviä, Muailman matkailun päiviä[10].
Liittyjät pruazniekat
- Kul'tuurualan ruadajan päivy (Ven'a) (25. kevätkuudu)
- Kanzoinväline mustopaččahien da histouriellizien kohtien päivy (18. sulakuudu)
- Kanzoinväline muzeiloin päivy (18. oraskuudu)
- Muzeiloin yö (piendypäivy joga vuottu vaihteleh)
- Kanzoinväline matkailun päivy (27. syvyskuudu)
Huomavukset
- ↑ Международный день экскурсовода, РИА Новости (21 tuhukuudu 2021). Kačondan päivymiäry: 22. tuhukuudu 2025.
- ↑ 1 2 3 У. Светачёва. Всемирный день экскурсовода 2025: какого числа, история и традиции праздника, «Комсомольская правда», сетевое издание. Kačondan päivymiäry: 22. tuhukuudu 2025.
- ↑ Н. Михайлова, В. Владимирова, П. Белявский. Профессия экскурсовод: кто это, отзывы, где учиться, чем занимается, как стать, зарплата, плюсы, минусы в 2025 году, «Комсомольская правда», сетевое издание. Kačondan päivymiäry: 22. tuhukuudu 2025.
- ↑ 1 2 3 4 5 Sebastian Frankenberger. International tourist guide day 2024 — WFTGA, WFTGA (21 tuhukuudu 2024). Kačondan päivymiäry: 22. tuhukuudu 2025.
- ↑ 1 2 WFTGA | Aims, WFTGA. Kačondan päivymiäry: 22. tuhukuudu 2025.
- ↑ International Tourist Guide Day - WFTGA, WFTGA. Kačondan päivymiäry: 22. tuhukuudu 2025.
- ↑ Frankenberger, Sebastian. International Tourist Guide Day 2025: Tourist Guides as Peace Ambassadors - WFTGA, WFTGA (20 tuhukuudu 2025). Kačondan päivymiäry: 22. tuhukuudu 2025.
- ↑ Full Members — Российская ассоциация экскурсоводов и туроператоров, WFTGA. Kačondan päivymiäry: 22. tuhukuudu 2025.
- ↑ День гида в Москве 2025 — как записаться, выбрать экскурсии, вся подробная информация. RUSSPASS. Kačondan päivymiäry: 22. tuhukuudu 2025.
- ↑ Справочная информация: «Праздничные (нерабочие) дни, профессиональные праздники и памятные дни» — Март. КонсультантПлюс. Kačondan päivymiäry: 22. tuhukuudu 2025.