Muailman lumiukon päivy
| Muailman lumiukon päivy | |
|---|---|
 | |
| Tiippu | Ei-virralline |
| Pietäh | kogo muailmas |
| Päivymiäry | 18. pakkaskuudu |
| Liittyy | lumiukkoh, talveh, lumeh |
Muailman lumiukon päivy on ei-virralline kanzoinväline pruazniekku, kudai on omistettu talven erähäle simvolois. Sidä pietäh joga vuottu 18. pakkaskuudu.
Ven'al Lumiukon päiviä pietäh 28. tuhukuudu.
Histourii
Perindö pidiä Muailman lumiukon päiviä rodih vuvvennu 2011. Pakkaskuun 18. päivy ei olluh petties vallittu: nägemäl nämmä noumerat juohatetah lumiukkuo vastanke. A talven keskipuoli on paras aigu lumiukkoloin da toizien talvivestoksien azundah nähte, silloi tavan mugah on jo äijy lundu[1].
Ollah sidä mieldy, ku pruazniekan alguhpanijannu on germuanielaine Kornelius Grec, hänel on suurin lumiukkoloin kuvien keräilemy, vuvvennu 2008 se puutui Ginnesan rekordoin kniigah[2].
Enzimästy kerdua lumiukkolois mainitah XIV—XV vuozisualoil, ga histourientutkijoin mielen mugah net roittih äijiä aijemba. Ollah sidä mieldy, ku enzimäzet lumiukot roittih Jevroupas XII vuozisual. Pyhä Francisk Assizskoi uskoi, ku net voijah puolistua ristikanzua pahois hengis — nämmä pahat haldiet voijah duumaija, ku lumiukko on ristikanzannu da jovvutah sih elämäh, a keviäl lumen sulettuu kuoltah. Taloloin pahois hengis pellastamizekse sit ruvettih luadimahgi lumiukkoloi taloloin luo[3].
Omas kniigas ven. «История снеговика: от ледникового периода до блошиного рынка» tutkii Bob Ekštein lujoittau, ku enzimästy kerdua lumiukkoloin luajindas mainitah XIV vuozisual. Erähäs keskiaijan kirikkökniigas, vuvven 1380 päivykirikkökniigas, on kuva lumiristikanzas, kudai sulau robl’olluo. Se kuva on Iisussu Hristosan nuagličendan kuvuamizen rinnal. Kirjuttai sanou, ku keskiaijan Päivänlasku-Jevroupas enämbän kaikkie lumiukkoloi luajittih kovannu vuvven 1511 talvennu, Br’ussel’an uuličoil silloi rodih enämbi 110 lumivestostu[4].
Ven’al
Ven’al lumiukkoloi luajittih vahnois paganallizis aijois. Niidy kunnivoittih da kyzyttih niilöil abuu da pakkazien lopundas.
Lumibuabat da Lumineičoi ollah vaiku ven’alazet personuažat. Uskottih, ku moizien talvi-ilmivölöin, kui udu, tuučču da tuhu, luadijoinnu ollah naishaldiet. Niilöin kunnivoiččemizekse luajittih sit lumibuaboloi. Tavannu oli luadie ei yhty, a kolme lumibuabua enzilumes. Jogahizel oldih omat tarkoitukset. Yksi vastai lämmäs da lumehizes talves, toine — tulies uudizes, a kolmas, kaikis pienin, kudamal oli Krišn’a-nimi, oli ozantuojannu taloih[5].
Ei nareko on olemas sanondu «talvi-muatušku», «pakkaine-buat’ušku». A pakkaskuudu toiči nenga sanottihgi — «lumiukko».
— Filosoufientiedoloin kandiduattu, docentu Larisa Butil’skaja[6]
Alguudah myöte lumiukkoloi yhtistettih ylen suurih da vihakkahih lumimonstroih kovien talviololoin periä[2]. Jälles niilöih ruvettih ližiämäh simvoloi, kudamat oldih akkiloičusvehkehinny da tuodih lykkyy da puolistuksen pahois hengis. Ezimerkikse, morkouhku nenän sijas oli hyväkse uudizekse, rengi piäs — hyvinvoindakse da kyllyökse. Vastan tarkoituksennu oli pahoin hengien karkoittamine[7].
Yhtelläh XIX vuozisual lumiukkoloin kuvii rodih poštukartočkois muheloittajien lapsienke yhtes. Ven'alazes kul'tuuras niidy ruvettih kuvuamah Pakkasukon da Lumineiččoinke.
Ven’al on oma Lumiukon päivy, kudamua pietäh 28. tuhukuudu.
Pruazniekan perindöt
Nygyaigaine lumiukko, kudamas on kolme lumikiämii da nenän sijah morkouhku, on roinnuhes XIX vuozisuan lopukse, konzu lumivestokset monis mualois roittih Rastavan da Uvven Vuvven piendän ozikse. Jevroupas ruvettih čomendamah lumiukkoloi, riputettih niilöih tuličieppizii da erilazii kodivehkehii. Rastavan da uvvenvuvven poštukartočkat lumiukkoloinke hedi roittih kuulužikse.
Lumiukkoloi luajitah erimuodohizii da erisuuruhizii. Monis mualois on omua ainavoluadustu luajindutabua. Ezimerkikse, Japounies, kus lumiukkuo sanotah Juki-Daruma, sidä luajitah kahtes lumikiämes. Rumiinies on perindö čomendua lumiukkoloi čosnokkusbuusil, net karkoitetah pahoi hengii.
Lumiukon päivy on mielikuvituksen da neron päivy. Sidä enimyölleh pietäh lapsien keskes školis da päivykodilois, kus luajitah erilazii lumiukole omistettuloi pidoloi: kižaohjelmii, muasteripajoi, ozutteluloi, konsertoi, piirdofil’moin kaččomizii aihien mugah[8].
Linnan uuličoil da lagevoloil, puustoloisgi pietäh lumivestoksien kilboi[9].
Huomavukset
- ↑ World Day of the Snowman, little humans (18 pakkaskuudu 2021). Kačondan päivymiäry: 23. pakkaskuudu 2025.
- ↑ 1 2 18 февраля — День снеговика (рус.). ГдеЭтотДом.РУ (18. pakkaskuudu 2024). Kačondan päivymiäry: 23. pakkaskuudu 2025.
- ↑ Хватова, Яна. Защитники от злых духов. Как на Руси появились снеговики, AiF (06.01.2017). Kačondan päivymiäry: 23. pakkaskuudu 2025.
- ↑ Jennifer Schuessler. Snow Men (Published 2007), The New York Times (2 talvikuudu 2007). Kačondan päivymiäry: 23. pakkaskuudu 2025.
- ↑ Владимир Иванов. Кто такой снеговик? История.РФ. Kačondan päivymiäry: 23. pakkaskuudu 2025.
- ↑ Бутыльская Лариса Владимировна. Социокультурные аспекты изучения русской новогодней открытки. cyberleninka.ru. Гуманитарный вектор. Серия: Филология, востоковедение (2013). Kačondan päivymiäry: 23. pakkaskuudu 2025.
- ↑ Ирина Орлонская. Отмечаем День снеговика: Почему в России выбрали 28 февраля вместо мирового 18 января - особенности праздника, Пронедра (17 января 2023). Kačondan päivymiäry: 23. pakkaskuudu 2025.
- ↑ Анастасия Заикина. День снеговика в 2025 году: дата и история зимнего праздника, как отметить, Lenta.RU (17 января 2025). Kačondan päivymiäry: 23. pakkaskuudu 2025.
- ↑ День снеговика (рус.). ЭТНОМИР. Kačondan päivymiäry: 23. pakkaskuudu 2025.