Myd Mečev

Myd Mečev
Myd Mečev
	Tiijosto:Мечев Мюд Мариевич.jpg
Roindupäivy	31. elokuudu 1929
Roindupaikku	Moskovu, Nevvostoliitto;
Kuolendupäivy	27. syvyskuudu 2018 (89 vuottu)
Kuolendupaikku	Moskovu, Ven'a;
Kanzalližus	Nevvostoliitto, Ven'anmua
Žanru	Gruafiekku, mualavustaido
Opastus	Moskovan korgei taido-tevolližuon opasitos

Myd Marijevič Mečev (31. elokuudu 1929, Moskovu – 27. syvyskuudu 2018, Moskovu) on Ven'an taidoilii-gruafiekku, kuvittai, ymbäristökuvien mualuaju, Ven'an Federacien rahvahan taidoilii (2000), Ven'an Taidoakadiemien ozanottai (2004)^[1].

Eloskerdu

Oli roinnuhes opastajan Marija Mečevan da taidoilijan Konstantin Pantelejev-Kiprejevan pereheh (1891—1946). Vahnembat pandih nimi poijale Kanzoinvälizen Nuorižopäivän pruazniekan čottah (ven. Международный Юношеский День), a ižännimen da sugunimen annettih muaman, senaigazen naizien emansipacien hyvyös. Vuvvennu 1936 tuatto oli repressiiruittu da suudittu.

Vuozinnu 1946—1949 Myd Mečev opastui Moskovan korgies taido-tevolližuon opasitos. Vuvvennu 1949 opiston opastujannu olles sai kolmanden sijan Kogo Nevvostoliiton karjal-suomelazen Kalevala-eeposan kuvittamizen kilvas.

Opiston loppiettuu tuli Karjal-Suomelazeh nevvostotazavaldah, eli Petroskois, Suolusmäin kohtas. Niilöinny vuozinnu taidoilii jatkoi Kalevala-eeposan kuvittamistu. Vuvvekse 1956 häi luadi enämbän 200 akvarellikuvua da tuušil piirustustu, Petroskoin Karelija-julguamos nägi päivänvalgien enzimäine kniigu taidoilijan kuvienke.

Ven'an pohjazen luondo rodieu erähäkse piäaihiekse taidoilijan luomisruavos.

Vuvvennu 1957 Myd Mecevua otettih Nevvostoliiton taidoilijoin liittoh, hänele annettih Karjalan avtonoumizen nevvostotazavallan taidoalan arvostettu ruadai -arvonimi.

Vuvvennu 1963 häi tuli järilleh Moskovah, kus jatkoi ruaduo Kalevala-eeposan kuvittamizes. Vuvvennu 1978 "Kalevala" gruaffizes kuvittamizes sai Ven'an Federatiivizen nevvostotazavallan I. J. Repinan nimizen valdivollizen palkindon da Nevvostoliiton Taidoakadiemien medalin, Suomen halličus palkičči händy Valgien rouzan kunnivomerkil da Elias Lönnrotan hobjumedalil.

Vuozinnu 1975—1990 taidoilii luadi enämbän 400 grav'uurua Povest' vremennih let -kniigah nähte. Vuvvennu 1994 Povest' vremennih let -kniigu Mečevan grav'uuroinke enzikerdua painetah Suomes nimel "Nestoran hroniekku".

Vuozis 1990 Myd Mečev kuvitti "Vahnan Sanan" kniigoi. Vuvvennu 1993 taidoilijua palkičči Ion-Puavil II Riiman pontifikuatan hobjumedalil "Gumanizmas da suavutuksis taijos".

Myd Mečev kuoli 27. syvyskuudu vuvvennu 2018 Moskovas. Taidoilijan kirjutetun perindöbumuagan mugah hänen rungan tuhkat havvattih 5. ligakuudu kyläkalmužimal Karjalas Kižin suarel.

Taidoilijan ruavot ollah ruokos Valdivollizes Tretjakovan gallereis, Valdivollizes muzeiozuttelukeskukses "ROSIZO", Karjalan tazavallan taidomuzeis, Valdivollizen Kremlin dvorčas, Ven'an kul'tuurufondas, Amierikan Yhtysvaldoin kongresan kirjastos, Vatikan apostolikirjastos, Suomen kanzallizes bankas, yksittäzis keräilemis Ven'al da ulgomual.

Palkindot

1957 — Karjalan avtonoumizen nevvostotazavallan taidoalan arvostettu ruadai
1965 — Ven'an federatiivizen nevvostotazavallan arvostettu taidoilii
1978 — Ven'an federatiivizen nevvostotazavallan I. J. Repinan nimine valdivolline palkindo
1988 — Nevvostoliiton Taidoakadiemien korrespondentu-jäsen
2000 — Ven'an Federacien rahvahan taidoilii
004 — Ven'an Taidoakadiemien tozine jäsen
2009 — Karjalan tazavallan kunnivokanzalaine
Suomen Valgien rouzan ordenan I astien Ritariristu

Pereh

Taidoilijan akkah — Ol’ga Vasiljevna Hlopina.

Omat kirjutustevokset

Мечев М. М. Портрет героя. — Петрозаводск, 1989

Huomavukset

↑ Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. — 464 с. : ил.,карт. — С. 215—216 ISBN 978-5-8430-0125-4 (т. 2)

Kirjalližus

Чегодаева М. А. Художник Мюд Мечев. Петрозаводск: ПетроПресс, 2004.

Linkat

[1] Карелия: энциклопедия: в 3 т. / гл. ред. А. Ф. Титов. Т. 2: К — П. — Петрозаводск: ИД «ПетроПресс», 2009. — 464 с. : ил.,карт. — С. 215—216 ISBN 978-5-8430-0125-4 (т. 2)

[1]