Loma

Материалы библиотеки имени Б.Н. Ельцина

Täs kirjutukses on käytetty materjualoi B. N. Jel'cinan nimizen prezidentan kirjaston fondoispäi

Ližiä tieduo

Материалы библиотеки имени Б.Н. Ельцина

Täs kirjutukses on käytetty materjualoi B. N. Jel'cinan nimizen prezidentan kirjaston fondoispäi

Materjualoih

Loma
Loma. Taidoilii Anatolii Janev. 1980-lugu
Käytändän ala	Opastus
Roindan päivymiäry	XIX vuozisuan toine puoliško (Ven'a)

Loma (ven. Кани́кулы) on pluananmugaine keskustus opastundas huogavoh da muuloih sociualutarkoituksih niškoi, niilöis piätetäh zakonois opastuskses, opastuksen kalenduaras da opastuslaitoksien omis aktois.

Etimolougii

Muinas-Riimas kezäräkki piädyi samah aigah, konzu huondeksel nägymäh rubei Sirius-tiähti, kudaman nimi oli Canicula ("pieni koiraine"). Nämmii päivii sanottih "dies caniculares" — "koiran päivät" (heinykuun 22. päiväs elokuun 23. päivässäh). Ihan nenga sanottih kezälomua, konzu on eniten räkki.

Ven'al

Ven'al vuodessah 1917 sana ven. каникулы tarkoitti kezähuogavon aigua. Vladimir Dal’an sanakniigas löydyy moine sellitys: "Loma on räkki kezäaigu, dai kižat, joudavu aigu opastuslaitoksis; tävvelline loma heinykuun 1. päiväs elokuun 15. päivässäh; erähis paikois algavuu kezäkuus, kai oraskuus".

Enne vallankumovustu alguškolis da prihodan opistolois loma jatkui kuuzi libo seiččie kuudu — "peldoruadoloin lopendupäiväs da niilöin algussah tulien vuon". Se ripui alovehes, algavui ligakuul-talvikuul, a loppih kevätkuul-oraskuul.

Talovuon korgeiškolan Opastuksen kehitysinstituutan piätiedoruadai, professoru Irina Abankina pani merkile:

Školalomat meil oldih yhtistetty pruazniekkoih libo luonnon ilmivölöih. Pädemätöi loma kevätkuun lopus — sulakuun allus oli sovitettu kevätviennouzuh, konzu monis alovehis oli jygei piästä školah. Uvven opastusvuvven algu 1. syvyskuudu on perindölline ven’alaine uuzi vuozi Pedrun eziaijois. Syvysloma on kylmykuun pruazniekoinnu.

Vuvvennu 1803 piästih ilmah "Rahvahan opastuksen ezisiännöt", kudamis oldih opastusuvvistuksen perustehet. Niilöis sanottih, ku opastusvuvvel pidäy algavuo 1. elokuudu da loppiekseh tulien vuon 1. heinykuudu.

Nevvostovallan aigah opastusvuozi algavui eri aigah. Monis školis se oli 14. elokuudu.

Vuvvennu 1935 piäzi ilmah Rahvahan komissuaroin nevvoston da Kogo Nevvostoliiton kommunizen bol’ševiekkoin partien azetus "Opastuksen ruavon järjestämizes da syväinpuolizes järjestykses algu-, perus- da keskiškolas". Dokumentan mugah opastusvuozi algavui 1. syvyskuudu. Oli hyväksytty loman aijat: syvysloma — 5. — 9. kylmykuudu, talviloma — 30. talvikuudu — 10. pakkaskuudu, keväloma — 24. — 31. kevätkuudu, kezäloma — opastusvuvven lopus elokuun 31. päivässäh.

Kyläškolis kevätloma paikallizis ololois rippujen Ruadajien deputuattoin nevvoston piirin toimehpaniikomitietan piätökses voijah siirdiä muukse aigua.

Nevvostoliiton Ministroin Nevvoston azetukses № 749 8. syvyskuudu vuvvennu 1970 hyväksyttih, ku urokat školis algavutah 1. syvyskuudu da loppietahes, luguh ottajen tutkindoloi da praktiekan, 1. — 7. kluasois — 30. oraskuudu, 8. kluasas — 10. kezäkuudu, 9. — 10. (11.) kluasois — 25. kezäkuudu.

Tuli lomale. Taidoilii F'odor Rešetnikov. Vuozi 1948

Nygyaigazis školis loman aigu on miärätty Federuallizes zakonas 29. talvikuudu vuvvennu 2012 № 273-ФЗ "Opastukses Ven’an Federacies".

Yhtehisty loman aigua Ven'an studentoih niškoi ei ole. Korgeiškolien johtokundu iče valmistau aigulistan ottajen huomavoh opastuspluanan, kursan, opastuksen muvvon da tuotandopraktiekan. Tavan mugah studentat lähtietäh lomale tutkindokavven jälles. Lomien kesto rippuu vuvven opastuspäivien luvus. Korgeiškolis, kudamis opastusvuozi jagavuu kolmeh libo nelläh papstuskaudeh, voi olla ližähuogavuo opastusmoduliloin välis.

Kolledžois da tehnikumois kezähuogavon pohjannu ollah samat perustehet kui korgeiškolisgi: enzimäi on tutkindokauzi, sit tuotandopraktiekku da loma. Niilöih studentoih niškoi, kudamil ei ole tuotandopraktiekkua, loma tavan mugah algavuu kezäkuun puolivälis da lopus, jälles tutkindoloi. Studentoil, kudamil on tuotandopraktiekku, loma algavuu heinykuun lopus — elokuun allus.

Lomien aijas opastujat voijah tiijustua dekanuatas, opastuslaitoksel verkosivustol libo persounallizes kabinietas.

Toizis mualois

Eri mualois lomat ollah eri aijoinnu. Germuanies opastusvuozi tavan mugah algavuu 24. elokuudu — 17. syvyskuudu. Talviloma on pakkaskuun lopus algajen tuhukuun liikkujah päivässäh. Sygyzyl školaniekat huogavutah ligakuun lopus tavan mugah kaksi nedälii. Rastavan loma algavuu 20. — 23. talvikuudu da loppuu 3. — 11. pakkaskuudu.

Suomes tavan mugah kezäloma on kezäkuun 1. päiväs elokuun puolivälissäh. Rastavan loma on 22. talvikuudu — 8. pakkaskuudu. Äijänpäivän lomale opastujat piästäh kevätkuun lopus libo sulakuun allus.

Amierikan Yhtysvallois lomien aigu eruou joga ozavaldivon, školaokrugan, opastuslaitoksen da opastujien ijän mugah. Sygyzyl školaniekat tavan mugah huogavutah syvyskuul libo ligakuul, talvel — tuhukuul libo kevätkuul, keviäl — kevätkuul libo sulakuul, kezäl — kezäkuus algajen elokuun loppussah.

Kitais oapstusvuozi jagavuu kahteh opastuskaudeh, sendäh on vaiku talvi- da kezäloma. Kezäloma — heinykuul da elokuul, talviloma — pakkaskuun puolivälis tuhukuun puolivälissäh.

Japounies opastusvuozi algavuu sulakuun toizes nedälis. Kezäloma on heinykuun lopuspäi elokuun lopussah, talviloma on talvikuun lopuspäi pakkaskuun enzimäzeh nedälih suate, kevätloma algavuu kevätkuun puolivälis.

Filippinoil Opastusministerstvu miäriäy loman aijat. Opastusvuozi algavuu elokuul da loppuu kezäkuul. Keviäl školaniekat huogavutah yhten nedälin sulakuul. Rastavan loma algavuu 24. talvikuudu da loppuu enzimäzenny enzimässargen jälles 6. pakkaskuudu. Školien johtajat voijah omas tahtos ližätä kolmessah huogavopäiviä opastusvuvven aigah.

Suvi-Afriekan tazavallas opastusvuozi algavuu pakkaskuun puolivälis da on juattu nelläh nelländekseh: pakkaskuu-kevätkuu, sulakuu-kezäkuu, heinykuu-syvyskuu da ligakuu-talvikuun algu. Talvikuul algavuu kezäloma, kudai kestäy puolentostu kuudu, tulieh opastusvuodeh suate.

Tanzuanies uuzi opastusvuozi algavuu jälles uvvenvuvven pruazniekkoi. Kaikis pitkevin kezäloma on talvikuul. Tuliet lomat algavutah pyhäkuunnu Ramadan. Školaniekat huogavutah yhten kuun heinykuul.

Terveh, pionieroin kezä! Taidoilii German Bezukladnikov. 1992

Školalomien aigu

Ven'an joga opastuslaitos voi iče hyvyksyö loman aijat pohjavujen Ven’an Federacien Opastusministerstvan nevvoloih.

Nevvoloin mugah opastuksen nelländeh opastussietiemah niškoi opastusvuvvennu 2025/2026 ollah moizet loman aijat:

• syvysloma — 25. ligakuudu — 2. kylmykuudu;
• talviloma — 31. talvikuudu — 11. pakkaskuudu;
• kevätloma — 28. kevätkuudu — 5. sulakuudu;
• kezäloma — 27. oraskuudu — 31. elokuudu.

Enzimäzen kluasan opastujih niškoi nevvotah andua ližäpäivii kolmanden nelländeksen aigah — 16. tuhukuudu — 22. tuhukuudu.

Kolmandeksen opastussistiemas opastusvuozi jagavuu kolmeh tazazeh ozah, jogahine kudamis jagavuu kahteh aijas yhtenjyttyzeh modulih. Školaniekat opastutah viijen nedälin aigah, sit nedälikse piästäh lomale.

Kolmandeksen järjestelyn sistiemas Ven’an Federacien opastusministerstvu andoi moizet aijat:

• enzimäzet — 4. — 12. ligakuudu;
• toizet — 15. — 23. kylmykuudu;
• kolmandet — 31. talvikuudu — 11. pakkaskuudu;
• nelländet — 21. tuhukuudu — 1. kevätkuudu;
• viijendet — 28. kevätkuudu — 4. sulakuudu.

Lomien ližäkse ollah ližähuogavopäivät valdivollizien pruazniekkoin aigah, niilöih kuulutah Rahvahan yhtenäžyön päivy, Ižänmuan puolistajan päivy, Voiton päivy da muut.

Kul'tuuras ilmendymine

Kinos

• ven. «Добро пожаловать, или Посторонним вход воспрещён» (1964);
• ven. «Каникулы Бонифация» (1965);
• ven. «Сто дней после детства» (1975);
• ven. «Каникулы в Простоквашино» (1980);
• ven. «Каникулы Петрова и Васечкина, обыкновенные и невероятные» (1984);
• ven. «Королевство полной луны» (2012);
• ven. «Camp Rock: Музыкальные каникулы» (2008).

Kirjalližuos

• Nikolai Nosov ven. «Шурик у дедушки» (1956);
• Jurii Nagibin ven. «Эхо» (1960);
• Rene Gossini, Žak-Žak Sampe ven. «Каникулы малыша Николя» (1962);
• Anatolii Aleksin ven. «В Стране Вечных Каникул» (1966);
• L’ubov’ Voronkova ven. «Гуси-лебеди» (1966);
• Jevgenii Nosov ven. «Варька» (1967);
• Vladislav Krapivin ven. «Бегство рогатых викингов» (1975);
• Anatolii Gladilin ven. «Секрет Жени Сидорова» (1975);
• Juz Aleškovskii ven. «Кыш и я в Крыму» (1975);
• Silvija Truu ven. «Месяц как взрослая» (1978);
• Jevgenii Veltistov ven. «Миллион и один день каникул» (1979);
• Kir Buličov ven. «Гостья из будущего. Каникулы в космосе или планета Пять-Четыре» (1986);
• Anatolii Ribakov ven. «Каникулы Кроша» (1998);
• Tamara Mihejeva ven. «Асино лето» (2008);
• Narine Abgar'an ven. «Манюня пишет фантастичЫскЫй роман» (2011);
• David Grossman ven. «С кем бы побегать» (2011);
• Tinatin Mžavanadze ven. «Лето, бабушка и я» (2022);
• Natalja Jevdokimova ven. «Лето пахнет солью» (2023);
• Ol’ga Bočkova ven. «Правдивые истории из жизни Никиты» (2024).

Huomavukset

Kirjalližus

• Барканов С. В. Социальные и педагогические условия развития системы каникулярного отдыха и оздоровления детей: Дис. … канд. пед. наук (13.00.02). — Кострома: КГПУ им. Некрасова, 2004. — 247 с.
• Ишимова А. И. Каникулы 1844 года, или Поездка в Москву. — Санкт-Петербург: тип. Имп. Акад. наук, 1846..
• Кижаева Д. В. Школьные каникулы в сети или онлайн лагерь как альтернатива классической смене детского отдыха и оздоровления // Аспирант. — № 2. — С. 87—89.
• Мирон Н. И. Лаконично о студенческих каникулах // Мир науки, культуры, образования. — 2015. — № 1 (50).
• Платонова Р. И., Иванова Я. Н., Михина Г. Б. На пути к новой модели организации школьных каникул // Азимут научных исследований: педагогика и психология. — 2020. — № 1 (30).
• Циркуляры и приказы Министерства народного просвещения Российской империи. — М., 1878.
• Шмаков С. А. Летний лагерь: вчера и сегодня. Методическое пособие. — Липецк: ИГ «Инфол», 2002. — 384 с.

Linkat

• Как проводили летние каникулы в последние 70 лет. От корабликов из спичек до тетриса, Yupi, ICQ и смартфонов