Pakkasukon taloi Velikii Ust'ugas
| Nähtävys | |
| Pakkasukon taloi Velikii Ust'ugas | |
|---|---|
 Pakkasukon dvorču | |
| 60°44′57″ с. ш. 46°11′02″ в. д.GЯO | |
| Mua | |
| Sijoittumine | Velikii Ust'ug[d] |
 |
|
Pakkasukon taloi Velikii Ust'ugas on Velikii Ustu'gas Pakkasukon muatilan -temuattizen kompleksan piäobjektu. Puuhine dvorču on pedäjikös Suhona-joven rannal.
Kuvailu
Pakkasukon taloi Velikii Ust'ugas on Pakkasukon muatila -temuattizen kompleksan keskuksennu, se on Voulogdan alovehel 12 kilometrii piäs Velikii Ust'ugan keskuksespäi.
Kainis kuuzikujo vedäy puurakendukseh, kudaman tornit on čomendettu hobjazil tiähtilöil. Veriän piäl on kirjutus — "Tiedovoičendan ohjailukeskus".
Dvorčan sydämes on 12 zualua (sen verran, mi on kuudu vuvves) eri tiemoin mugah:
- ruadoperti, sie lugietah, mi päiviä jäi Uudeh Vuodessah;
- Pakkasukon magavoperti tiedoivoittuloin postelin, pieluksien da zirkalonke, kudai andau vägie;
- suarnalline laboratourii, kudamas Pakkasukon abuniekat tarkaillah vuvvenaigoin vaihtuo, kačotah, ku tuhut, lehtenlähtö da vihmat oldas aijalleh, a pakkazet kirkendettäs, a ei varaitettas rahvastu;
- sobavuarnakos ollah ruokos Pakkasukon suvaittavat ruutat, jogahizel on oma suarnalline histourii[1].
Dvorčas kaččojat voijah kävvä kirjastoh, observatourieh, tiedovoittuloin vehkehien pertih da uvvenvuvven kuuzien muzeih. Erähäs zualas on Pakkasukon muatilan makiettu, a labirintupertis voibi piästä kvestas läbi. Uvvenvuvven pruazniekkoi vaste taloin enzimäzele kerroksele azetetah pruazniekkukuuzi da ekskursien piätapahtumannu on vastavus Pakkasukonke Valduistuinzualas[2].
Ekskursii Pakkasukon taloih kuuluu kompleksuekskursieh kogo muatilua myöte.
Muatila eri vuvvenaijoinnu
Pakkasukon rezidencii Velikii Ust'ugas on avvoi ymbäri vuvven, ga enin matkailijua on talvikuul da uvvenvuvven loman aigua. Talvel Pakkasukon muatilas pietäh erilazii pidoloi. Talvikuun 31. päivän da pakkaskuun 1. päivän yöl sie pietäh suuri šouprogrammu.
Kezäl kompleksah tulou matkailijua, kudamih niškoi on avattu kanuattupuusto kallivoseinien da trolleiloinke. Sie pietäh temuattizii pruazniekkoi, ekskursieloi, muasteripajoi, ruatah ilolaittehet.
Vuvven 2024 tiedoloin mugah Velikii Ust'ug matkailijoin luvun puoles jiäy jällele vaiku Moskovas da Piiteris. Moskovas luajittih 27 % tilavustu, Piiteris — 15 %, Pakkasukon roindumual — 12 %[3].
Linnan rezidencii
Pakkasukon linnan rezidencii on Velikii Ust'ugan keskukses Nevvostoprospektal, talois 85, se on XIX vuozisuan erilline taloi, kudaman omistajannu oli kauppumies P'otr Krasil'nikov. Sit talois Pakkasukko otti vastah kävyjii enne muatiloin azundua vuvvennu 1999. Linnan rezidencies on kolme zualua — tiedovoittu zualu, valduistuinzualu da ruadopaja. Ekskursieloin aigah kävyjile sanellah, kui kehityttih Uvvven Vuvven vastuanduperindöt, kehitetäh luadimah mustolahjua, kuvuamahes uvvenvuvven ruutis da toivomah midätah Pakkasukon valduistuimes istujes, ga sidä enne pidäy kirjuttua omis mennyön vuvven hyvis ruadolois "Hyvien ruadoloin kniigah". Sit talois on sežo hyvittelykartočkan muzei da suuri mustolahjoin laukku[4]. Rinnalolijas talois on Pakkasukon poštu, kunne suatetah kai talvitiedoiniekale työtyt kirjazet.
Pakkasukon linnan rezidencies kehoitetah moizii ekskursiiohjelmii:
- muasteripajanke "Matkailu aijas"
- muasteripajanke Lahju kuuzahazele -uvvenvuvven bobazen čomendamizes
- interaktiivupido "Vahnan koin kižat"
- interaktiivu- da opastusprogrammu "Kummua pakkaslippahaspäi"
- muasteripajanke "Rastavan anheline"[5].
Huomavukset
- ↑ Объекты (рус.). dom-dm.ru. Kačondan päivymiäry: 20. kylmykuudu 2024.
- ↑ Резиденция Деда Мороза в Великом Устюге: фото, история, цены, отзывы, как добраться, Отдых в России. Комсомольская Правда.. Kačondan päivymiäry: 20. kylmykuudu 2024.
- ↑ Тур к Деду Морозу. Что нужно увидеть в Великом Устюге, РИА Новости (19 kylmykuudu 2024). Kačondan päivymiäry: 20. kylmykuudu 2024.
- ↑ Городская резиденция Деда Мороза. cultinfo.ru. Kačondan päivymiäry: 20. kylmykuudu 2024.
- ↑ Городская резиденция Деда Мороза в Великом Устюге - туры, цены, как добраться (рус.). dom-dm.ru. Kačondan päivymiäry: 20. kylmykuudu 2024.